Read lunyore ISAYA 51 Bible Online

ISAYA 51 - lunyore bible

ISAYA 51

¹OMWAMI aboolanga mbu, “Mumbulile, inywe abarunanga obuhoni, inywe abeetsanga okhuruna obukhonyi khu ise. Yitsulile Aburahamu ouli olwanda olwa mwarulamwo, khandi ekware yamachina eyamwayabwa mwo.

²Mwitsul'le kuka wenywe Aburahamu, nende Sara, abamwibula. Olwa ndalanga Aburahamu, yali sila omwana, nebutswa ndamulamila ikhabi nimuhelesia abaana. Ndenjihia abetsukhulu baabe okhuba abenji.

³“Namanyie aketsimbabasi tsianje khu Yerusalemu, nende khuyabo bosi abamenyanga mubusasikhi bwelitookho yilio. Kata esibala sialio nisili esitsiimi naasikhole okhukwa omukunda, singa omukunda okwa ndasimikha mu Edeni. Obusangali nende obulahi bulanyoolekha yo, halala netsinyembo tsiokhunzitsomia nokhukhupila embwo.

⁴“Mumbulile, inywe abandu banje, muhulile akamboolanga kano. Mbaananga amebaalo kanje khumahanga, amalako kanje nakabaleer're obulafu.

⁵Nanzitse bwangu nimbahonia, inyinga yanje yobulechi bwanje eli ahembi, Ise omwene naaruke amahanga. Ebibala biehale biniindil'la okhutsia yo; bilindil'langa nobunaayi bweise okhubihonia.

⁶Chinguule tsimoni tsienywe muhenge mwikulu; henge khusibala! Likulu lilakhamulukha singa omwosi, ne esibala nasio silakhunguha singa ingubo ikhulu, ne abandu balimwo bosi balafwa singa tsiisi. Nebutswa obununuli obwa nandeere bulahindila inziayo. Obulechi bwanje bulaba obwesihesi.

⁷“Mumbulile, inywe abamanya akali akahabwene, aba amebaalo kanje kabeetsanga mumioyo chienywe. Murarie olwa abandu bamuseya, kata murafwe emioyo olwa bamunyeka tawe.

⁸Balakhamulukha singa ingubo eya amatsilili kaliiye, khandi singa obwoya bwamakondi, obuliywe netsinyende, nebutswa obununuli obwa nandeere bulahindila inziayo. Obulechi bwanje bulahiindila inziayo.”

⁹Buukha OMWAMI ma okhukhonye! Okhuhonie khulwobunyali bubwo. Okhuhonie singa wakhola munyinga tsia khale. Niwe owaremania Rahabu[10] okuyokha kwomunyanza mubitonye.

¹⁰Khandi niwe owakhamia inyanza, nalomba injila okhubir'ra mumaatsi, kho mbu yabo aba wali nohonianga bakhalanie.

¹¹Yabo aba wanunula bakhoole Yerusalemu nobusangali, nibembanga nende okhukhupa liyoka liobusangali. Bakhasangale khulwe inziayo, khandi bakhabe abalakhuule okhurula khusibeela nende esiloli khulwe inziayo.

¹²OMWAMI aboolanga mbu, “Ise nise omuhetsanga tsingufu. Busina murie omundu ofwitsanga butswa, oranyala okhuhindila oluhomba singa obunyasi?

¹³Mukhanzibiliiye ise OMWAMI owamulomba khandi owabambula likulu, ma nayaba emisinji chiesibala noho? Busina mutsilil'langa okhumenya bwoburima bweyabo abamusandinjia, nende obwe yabo aberechekhele okhumuma? Oburima bwabwe sibulamwoolakhwo khandi tawe.

¹⁴Yabo abali ababohe balalakhuulwa bwangu; balamenya emihika eminji, khandi balanyoola ebiokhulia biabwe ebiabatakhanga.

¹⁵“Ise nise OMWAMI Nyasaye wenywe; ndubuulanga inyanza ninjila amarunda kayo nikahoola. Eliira lianje ni OMWAMI Wokhunyala Biosi!

¹⁶Ndali okhubambula likulu khandi ninzaba emise chiesibala; Mbool'langa Yerusalemu, ‘Inywe muli abandu banje. Ndaomuhelesia amebaalo kanje, ne musoolanga nomukhono kwanje.’ ”

¹⁷Yerusalemu, buukha! Buukha ma osinjile! Ibe unyweye khusikombe siesinyasio esio OMWAMI yakhuhelesia onywe nali nelirima. Wali okhusinywa ma nisikhuhutumia.

¹⁸Abulaho onyala okhukhwemel'la, kata mubandu benywe sialiho owokhukhutiila omukhono nochenda tawe.

¹⁹Amabi kakhukwiliiye esiakhabili, esibala sienywe simal'le okhumululwa nelihe, ne abandu bo bafwa khulwe inzala. Abulaho owokhubeela tsimbabasi tawe.

²⁰Abandu baabo bakwitsanga khulwa okhuhwelel'la mumasanganjila, bafwana singa eliaka elihambilwe mumubero kwomuhitsi. Basalisibubwe noburima bwa Nyasaye.

²¹Khulwe yako, muhulile yaka, inywe abanyakhananga, abakhol'lwe ne kata nimuranyweye ewaini.

²²OMWAMI Nyasaye wenywe amusoolanga naboola mbu, “Mbukulanga esikombe esia ndamuhelesia nindi nelirima. Khandi simwakhanywekhwo ewaini echilanga nimuhutuuma tawe.

²³Yabo abamusandinjia nibo aba nanyweesie esikombe yisio, yabo abali okhumukonia mutsinjila, nibamuseenakhwo singa ol'la muli amandu.”