Read lunyore ISAYA 52 Bible Online

ISAYA 52 - lunyore bible

ISAYA 52

¹Ibe Yerusalemu, buukha, okufuhale ma osinjile! Ibe litookho lia Nyasaye litsienukhu, webiikhe tsingubo tsindahi! Abanasibala sibalenjila mubilibwabio khandi tawe.

²Wesunguse olukuukhi, ma obe omulakhuule ibe Yerusalemu, osinjile okhurula mulukuukhi ma wikhale khuluruba lulwo! Muboholole eminyol'lo echiaboha, inywe abasumba ba Sayuni!

³OMWAMI Nyasaye abool'langa abandu baabe mbu, “Olwa mwakholwa abasumba, simwakulwa namapesa tawe; khandi nimbwo nakabe, nyinga namulakhuulwe sibulaho esianasirungwe tawe.

⁴Olwa mwatsia okhumenya musibala sie Misiri mwali okhutsia khubwenywe abene; nikarali Asiria yamubukula netsingufu ne siyarungakhwo siosi khulwe inywe tawe.

⁵Khandi luno kekholekhele mbwo musibala sia Babulonia: Muli abasumba ne sibulakhwoho esiarungwa khulwe inywe. Yabo abamwamihanga beepaakanga nibechingil'la khandi nibatsilil'la okhunjaaya.

⁶Mumatukhu aketsanga, abandu bakhamanye mbu ise nise Nyasaye ne ndam'le okhul'loma n'nenywe.”

⁷Mako obwa buli obulahi okhulola omurumwa niyetsanga okhurula mubikulu, naleeranga amang'ana amalahi, amang'ana komulembe! Alandianga khukobulechi khandi nabool'la Sayuni mbu, “Nyasayewo nomuruchi.”

⁸Yabo abalindanga litookho balanjisianga, balanjisianga halala khulwo obusangali! Banyala okhulola netsimoni tsiabwe abene OMWAMI nachelelanga khubandu ba Sayuni! “Nyasayewo nomuruchi!”

⁹Rekukhe mwiyoka liobusangali, inywe amakunda ka Yerusalemu! OMWAMI alasoola litookho lilie nende okhuhotselesia abandu baabe.

¹⁰OMWAMI alahonia abandu baabe, narumikhilanga obunyalibwe obutsienukhu, ne abomusibala bosi balalola.

¹¹Mulole mbu murul'le Babulonia, inywe mwesi abachinganga ebirumikhilo biomuhekalu! Muratilakhwo khusindu siomusilo tawe; mube abatsienukhu ma murule Babulonia.

¹²Luno simularula matetekhana tawe; simwitsa okhuba nimwebisanga tawe. OMWAMI Nyasaye wenywe alamwemel'la namusoola tsimbeka tsiosi.

¹³OMWAMI aboolanga mbu, “Lola omurumikhili wanje alahindihala mumulimo kukwe; alafumibwa nachinguulwa ikulu, alanyoola oluyali olukhongo okhusila, alaba ikulu okhusila.

¹⁴Abandu abenji bachenya olwa bamulola; likondo lilie liali niliononibubwe mbu siyafwanakhwo omundu tawe.

¹⁵Nebutswa luno alachenyia amahanga amenji, ne abaruchi balooma m'munwa nibang'ang'ala. Balalola nibamanyilisia ebindu ebiabasili okhumanyakhwo.” Akomurumikhili wa Nyasaye yakhukhol'la