Read lunyore ISAYA 53 Bible Online

ISAYA 53 - lunyore bible

ISAYA 53

¹Abandu bakalusia nibaboola mbu, “Niwina owakhasubiiye akakhuhuliiye? Niwina owobunyali bwo MWAMI bulolekheye?

²Bwali obulalilo bwo MWAMI mbu omurumikhiliwe, akhule singa esiraakwa esiyilanga emisi chiasio mumaloba amomu. Siyali nolukoosi nohomba likondo lilahi eliakhachil'le khumumanye tawe. Sisialikhwoho esindu siokhuyanzisia khuye, kata esiakhakhukhwesele okhutsia khuye tawe.

³Khwali okhumuchaaya nende okhumusuula, yali okhwefwila mukhusalila nende mukhutsunwa, abulakhwoho owekomba okhumukoolakhwo; khwali okhumuchaaya singa orali esindu.

⁴“Nebutswa yefwila okhusaalila okhwakhabeeye okhwefwe, nende obutsuunwe obwakhabeye obwefwe. Ma nikhupaara mbu okhusaalilakhwe siali esinyasio esia Nyasaye yamuha.

⁵Nebutswa yafumirwa khulwe tsimbi tsiefwe, nakhupwa khulwo obubi obwakhwakhola. Khuhonanga khumalwaye khulwe esinyasio esia yanyoola, ne khukholwanga abachima khulwo okhunywekhwa khukhwe.

⁶Ifwe fwesi khwali singa amakondi akakora, siamulala khu ifwe niyebera khunjilaye omwene. Nebutswa OMWAMI yalekha esinyasio okhumukhwila, esinyasio esie ifwe fwesi khwakhoya okhunyoola.

⁷“Yasandibwa nasalisibwa, ne siyachingakhwo omunwakwe tawe, singa esimeme esiyilwanga okhunyenywa, khandi singa likondi lili imbeli wababeki bobwoya libunanga tsi, nimbwo arachingakhwo omunwakwe tawe.

⁸Yafumilwa nakhalachilwa esiina ma nahilwa okhufwa, ne abulaho owahendelakhwo obulamubwe. Yeerwa khulwe tsimbi tsiabandu befwe.

⁹Yayabilwa musilindwa halala nabandu ababi yayabilwa nabandu abahinda, kata nikali siyakholakhwo amabi nohomba okhukaatakhwo tawe.”

¹⁰OMWAMI aboolanga mbu, “Bwali obulalilo bwanje mbu asalile; okhufwakhwe khwali omusango okwoleera obulekhelwi bwetsimbi. Ma kho yakhalole abetsukhulu baabe; yakhamenye obulamu bwemihika eminji, ne okhubir'ra muye, lichoomo lianje liakhahesikhe.

¹¹Inyuma wokhusalila, yakhabe nobusangali khandi; yakhamanye mbu siyasalila butswa sila esifune tawe. Omurumikhili wanje owehaana, ousangasianga, yakhafwile abandu abenji, ne khululwe, nambalekhele.

¹²Ne khulwe yako namure habundu holuyali, habundu habandu abakhongo nende abakufu bali. Yehaana omwene okhukhufwila, nabal'lwa mubakholi bobubi. Yasalila khulwe tsimbi tsiabandu abenji nareeba Nyasaye akhulekhele.”