Read lunyore ISAYA 54 Bible Online

ISAYA 54 - lunyore bible

ISAYA 54

¹Ibe Yerusalemu, obetsanga singa omukhasi omukumba, nebutswa luno onyala okhwemba nokhupa liyoka liobusangali. Luno olanyoola abaana abenji, okhuyomba omukhasi owomusaatsawe aramulekhakhwo!

²Meeta liheema eliomenyangmwo libe likali, rambiyia emikoye chialio nokhupil'la ebibambo bialio hasi butinyu.

³Olabambula tsinzakhotsio tsimbeka tsiosi, abandubo balanyoola esibala siabwe, esiamahanga kandi kamenyangamwo. Amatookho akabandu bali nibelukhamwo, abandu baletsulamwo

⁴Oraria tawe, sichila siolasimbibwa omurwe khandi tawe; oremonda tawe sichila siolahambwa netsisoni tawe; olebil'la tsimbi tsiawakhola olwa wali omubuukha. Khandi siolaba nes'simba murwe siokhuba omukhasi omulekhwa tawe.

⁵Omulonjiwo alaba singa omusaatsawo; OMWAMI Wokhunyala Biosi nilio eliira lilie. Nyasaye omutsienukhu wa Isiraeli niye omuhoniwo. Ye niye omuruchi wesibala siosi.

⁶Isiraeli, ibe oli singa omukhasi omubuukha, owalekhwa nomusaatsa ma ouli musibeela esikali. Nebutswa OMWAMI akhulanganga okalukhe khuye naboola mbu:

⁷“Ndali okhukhulekha khulwe inyinga indititi; nebutswa khulwobuyanzi obukali nakhukalusie.

⁸Ndali okhukhulekha khweinyinga indititi olwa ndali nelirima; nebutswa nakhumanyie obuyanzi bwanje obweinziayo.” Nimbwo OMWAMI omuhoniwo aboolanga.

⁹“Mumatukhu ka Noa ndesuuha mbu sindakhaleere amaatsi komukhula khusibala khandi tawe. Ne luno ndetsuubanga mbu sinakhuhambilekhwo lirima khandi tawe; sinakhukondokhelekhwo kata okhukhuha esinyasio tawe.

¹⁰Kata ebikulu ebirambi nibiakhatechesibwa ne ebikulu ebimbichiti nibihinibwaho, obuyanzi bwanje khuibe sibwakhahweho tawe, kata indakano yanje yomulembe sielihinibwaho tawe.” Nimbwo OMWAMI okhuyanzanga aboolanga.

¹¹OMWAMI aboolanga mbu, “E, Yerusalemu, ibe litookho elisalilanga, niliranyoola obukhonyi khandi, elirali nomuhotselesi, nanyombokhe emisinji chichio obuhia namachina kobukusi.

¹²Nanyombokhe eminaarachio noruchina orulahi orwetsilulu, khandi nanyombokhe ebilibwabio namachina amang'inang'inu ne tsinzakhotsio nanyombokhe namachina kobukusi obukali.

¹³“Ise omwene nanzibaal'le abandu baabo, khandi nambahelesie obuhinda nende omulembe.

¹⁴Obulunji nende obwatooto bulakhukufuhasia. Nosoolwe okhurula khubuminwi nende amarisio.

¹⁵Omundu wosi naaba nakhuseera, nabe nakholanga mbwo ise nirahuchiliyekhwo; omundu wosi owakhakhulwana, alalekwa.

¹⁶“Ise nise owalonga omwiranyi, obwananga omul'lo nalomba ebilasan'nwe. Khandi nise owalonga omusikari, orumikhilanga ebilasan'nwe tsana okhwira abandu.

¹⁷Nebutswa sibulaho esilasan'nwe esiakhakhusalisie ibe. Olaba namakalusio khu bosi abakhuyaala. Ise nasoole abarumikhili banje nimbaha obulechi.” OMWAMI umal'le okhuboola.