Read lunyore ISAYA 55 Bible Online

ISAYA 55 - lunyore bible

ISAYA 55

¹OMWAMI aboolanga mbu, “Yitse inywe mwesi abali nobuluho; yitse munywe amaatsi. Kata inywe abarali namapesa, hambe mukule nimulia ebiamwenya. Yitse, mukule ewaini nende amabeele sila amapesa kata obukusi tawe.

²Busina mukosianga amapesa khubindu ebia muranyala okhulia? Busina mukosianga emishahara khubindu ebiamurekura? Mumbulile ma mukhole akamboolanga, mulasangal'la ebiokhulia ebilahi okhusila.

³“Huyie ma mwitse khu ise, inywe abandu banje, mwitse khu ise ne mulaba nobulamu. Nanombe indakano yeinziayo n'nenywe, nimulaamila tsikhabi etsia ndasubisia Daudi.

⁴Lola, mal'le okhumukhola omukobokheli khubandu, omwemeli khandi etswoni khubandu bosi.

⁵Siahene mulalanga amahanga aka muramanyile; Olundi sikaali nikamumanya inywe tawe, nebutswa luno kaleetsa khwinywe nikelukhanga! Ise OMWAMI Nyasaye wenywe, Nyasaye omutsienukhu wa Isiraeli nakhole yaka nakahesikhe, namuhelesie oluyali nende obukhongo.”

⁶“Mumukhaabe OMWAMI olwaba nasinyoolekha, mumusaaye olwa asili ahembi.

⁷Abandu ababi balekhe amang'ana kabwe amabi, khandi balekhe amapaalo kabwe amabi. Bakalukhe khu MWAMI Nyasaye wefwe, ye nowetsimbabasi khandi omwangu wokhulekhela.”

⁸OMWAMI aboolanga mbu, “Amapaalo kanje sikali singa akenywe, kata tsinjila tsianje sitsili singa etsienywe tawe.

⁹Okhuba singa likulu lili ehale okhurula khuesibala, nimbwo tsinjila tsianje nende amapaalo kanje kali ehale okhurula khukenywe.

¹⁰“Ling'ana lianje lili singa etsaluchi nende ifula, ebikwitsanga okhurula ikulu okhusama esibala. Bichilanga ebiraakwa nibikhula, ma bihaana imwo yokhuraaka nende ebiokhulia biokhulibwa.

¹¹Khandi nimbwo ling'ana lianje eliamboolanga lili — sililachweya okhuhesia akelichoomo lianje khulio tawe. Lilakhola kosi akandirumanga okhukhola.

¹²“Namurule musibala sia Babulonia nobusangali, namwemel'lwe okhurula mwitookho nomulembe. Ebikulu nende ebianikisio nabichaake okhwemba, ne emisaala nachio nachikhupe liyoka liobusangali.

¹³Emitarakwa chilamela aha amarakalu kali luno; emihatasi chilamela mubukona bwa amahwa. Yisi nesimanyilo esiakhabeho inziayo, esitsusio khumang'ana ake ise, OMWAMI mal'le okhukhola.”