Read lunyore ISAYA 56 Bible Online

ISAYA 56 - lunyore bible

ISAYA 56

¹OMWAMI abool'langa abandube mbu, “Mukhole akali akahabwene khandi akobwatooto, sichila ndi ahembi okhumuhonia.

²Ndakhalaamile ikhabi yabo abalindanga litukhu lie Sabato bulahi, nibalirumikhila bulahi. Ndakhabalaamile ikhabi yabo abarakholanga obubi bwosi tawe.”

³Omurende oweyonga nabandu bo MWAMI araboola mbu, “OMWAMI siyakhambuchil'la okhwekayakaya halala nabandube tawe.” Omundu owalatwa arakhapaarakhwo mbu sichila sianyala okhwibula tawe, kho siayakhanyala okhuba mulala khubandu ba Nyasaye tawe.

⁴OMWAMI abool'langa omundu ofwana mbwo mbu, “Noba niumbelesia oluyali khulwo okhulinda litukhu lie Sabato bulahi khandi noba nokhola akanyanzisianga ise ma obe omusubilwa khundakano yanje,

⁵kho eliira lilio lileetsulilwa mu Hekalu yanje khandi mubandu banje amatukhu amenji okhuyomba kata niwakhabeeye nabaana abasiani nende abakhaana. Sioleebil'lwa kata nahati tawe.”

⁶Khandi OMWAMI abool'langa abarende yabo abahuchil'la okhuba omukanda kwabandube, abamuyanzanga nibamurumikhila yabo abalindanga litukhu lie Sabato bulahi nibalonda indakanoye mubusubilwa mbu:

⁷“Namuleere khusikulu sia Sayuni, esikulu sianje esitsienukhu, namuhe obusangali munyumba yanje yobusaayi ne nambuchil'le emisango echia muhaananga khulusambwa lwanje. Ehekalu yanje elalangwa mbu inyumba yokhusaaya khubandu bamahanga kosi.”

⁸OMWAMI Nyasaye owachelesisie abandube ba Isiraeli ingo okhurula mubuhambe umal'le okhusubisia mbu naleere abandu bandi okhweyonga mubo.

⁹OMWAMI umal'le okhubool'la amahanga kali oburende ketse singa tsinyama nabulimo kalie abandu baabe.

¹⁰Aboolanga mbu, “Abemeli bosi abakwana okhuchetsiyia abandu banje nababofu! Sibulaho esia bamanyile tawe. Bafwana singa tsimbwa etsirasamanga tawe, bakonanga butswa tsindoolo nibaloora. Mako obwa bayanza okhukona tsindoolo!

¹¹Bali singa tsimbwa etsialangukha etsirekuranga tawe. Abemeli yaba sibali nokhumanyilisia tawe. Siamulala khubo akholanga aka ayanzanga naruna akokhwesangasia n'nako omwene.

¹²Abanywi yabo baboolanga mbu ‘Lekhe khunywekhwo amalwa ma khukholwe obwa khunyala! Mukamba nakabe obulahi okhuyomba olwaleelo!’ ”