Read lunyore ISAYA 57 Bible Online

ISAYA 57 - lunyore bible

ISAYA 57

¹Abandu abalahi bafwitsanga ne omundu wosi samanyilisianga kata okhuhendel'lakhwo tawe. Nebutswa olwa bafwitsanga, esibi sisilabasaalisia tawe.

²Abandu abamenyanga obulamu obulahi banyoolanga omulembe nende abuhuluukhi olwa babetsanga nibafwiye.

³Yitse yino mukhalachilwe, inywe abetsimbi! Inywe simuli abalahi okhuyomba abebitsohela nabasambale nende abaheyi tawe.

⁴Niwina owamukhol'langakhwo omusino? Niwina owa ababehi mukhol'langakhwo esihenyehenye?

⁵Inywe mwekayakayanga abanyasaye bolwibulo khulwo khukona nabakhasi hasi wemisaala chienywe emitsienukhu yitsio. Muhaananga abaana benywe singa emisango mutsinyangaywa tsiamachina akali ahembi nende ahomuchela kusenukhilanga.

⁶Mubukulanga amachina amarel'le okhurula mwibanda tsana nimukekayakaya singa abanyasaye. Mutsukhanga khuko ewaini singa omusango kwokhunywa nimukaler'ra ebihanwa biobuswache. Mupaalanga mbu ise sangal'langa amang'ana yaka kosi?

⁷Mutsitsanga khubikulu ebirambi okhuhaana emisango nende okhuba nabakhasi.

⁸Mwachikhanga ebiniini bienywe bies'sinyo inyuma wemiliango chienywe echiesilibwa. Munzibil'langa, mwenabulanga tsingubo nimuniina khubitanda bienywe ebikali nende abakhasi benywe aba murunganga khulwokhuba n'nabo. Ma muhesia akokhwonyonywa khwenywe.

⁹Mwebakhanga epoda nende amafura ma mutsia okhwekayakaya omunyasaye olangwanga Moleki. Murumanga abarumwa abarumwa ehale khulwokhuruna abanyasaye bamwekayakaya kata nende mubibala biemakombe.

¹⁰Mwemalanga tsingufu abene nimukhaaba abanyasaye bandi ne simufwitsanga omwoyo tawe. Mupaalanga mbu ebiniini bienywe bies'sinyo bilamuha tsingufu, ma kho simutohanga tawe.

¹¹OMWAMI aboolanga mbu, “Abanyasaye abamurisianga yaba nibeena, abachilanga nimuboola obubehi nende okhunzibil'la? Mulekhele okhuufumia sichila ndabeeye okhubuna khulwa oluhono olurambi noho?

¹²Mupaalanga mbu akamukholanga namalahi, nebutswa nambakale habulafu imela yenywe ne kata ebiniini bienywe sinabimukhonyekhwo tawe.

¹³Olwa mulakaya nimwenya obukhonyi, mulekhe ebiniini yibio bimuhonie! Omuya kwobusindu kulabifuura nikubihiiniaho! Nebutswa yabo abasubila ise balamenya musibala ne balandekayakayila mu Hekalu yanje.”

¹⁴OMWAMI aboolanga mbu, “Lekhe abandu banje bangalukhile. Hinie esiesikarisio siosi siosi imbeli wabwe! Lombe injila ma muchirechekhe!

¹⁵“Ise nise Nyasaye we ikulu khandi omutsienukhu obetsanga mwoyo inziayo. Menyanga habundu ahechingu khandi hatsienukhu, nebutswa khandi menyanga nabandu abetutuyi khandi abokhufunikha, kho mbe onyala okhukalusia obusubili nende obunaayi bwabwe.

¹⁶Ndali okhuha abandu banje obulamu, ne sinanzilil'le okhubayaala nohomba okhubatiil'la lirima khulwe inziayo tawe.

¹⁷Ndali okhubatiil'la lirima khulwe tsimbi tsiabwe nende obulangu bwabwe, ma kho ndabahelesia esinyasio ma nimbalekha. Nebutswa baramana ma nibatsilil'la okhukhola amang'ana kabwe.

¹⁸“Nduutsi obwa bakhol'le nebutswa nambahonie. Nambemel'le khandi nambakhonye, ma nambotselesie yabo abekhuulanga.

¹⁹Mbananga omulembe khu yabo bosi abali ahembi nende abali ehale! Nambonie abandu banje.

²⁰Nebutswa abandu ababi bali singa inyanza etubuukhanga, eya amarunda kayo karalekhanga okhwerunda nikaleera amakokha nende amatohi.

²¹Omulembe sikuliho khubakholi betsimbi tawe.” Nimbwo OMWAMI aboolanga.