Read lunyore ISAYA 59 Bible Online

ISAYA 59 - lunyore bible

ISAYA 59

¹Lole omukhonokwo MWAMI sikuli omwimbichiti okuranyala okhuhonia, kata esirwi sisie sisiaikala esiranyala okhuhul'la tawe.

²Kali khulwe tsimbi tsienywe mbu OMWAMI sianyala okhumuhul'la inywe tawe. Tsimbi tsienywe tsimwabukhanianga inywe okhurula khu Nyasaye olwa muteemanga okhumwekayakaya.

³Inywe muli nesikha khulwo okhuboola obubehi, okhukhupana nende okhwira.

⁴Mutsitsanga musiina nebutswa simuboolanga akatooto tawe. Murumikhilanga obubehi okhuleka emise chienywe. Muhesianga akobuloosie bwenywe khulwo okhusaalisia abasienywe.

⁵Mulombanga obusiemani obubi khulwokhulosia amang'ana akasalisianga singa amayayi keinzokha yesumu. Omundu naba nalia amayayi yako alafwa. Niwaraka liyayi ne esirulamwo nesilikoma!

⁶Nebutswa obusiemani bwenywe sinabumuleer'rekhwo obulahi bwosi tawe — bubula obukhonyi singa butswa ingubo eyanabwa okhurula khutsinyumba tsietsimbubi. Ebikhole bienywe nebibi, ne amakhono kenywe kayitsulakhwo obulwani.

⁷Mwamenya nimwaloosia okhukhola obubi, ne, simusisil'langa okhubukhola tawe. Simusisil'langa okhwira abandu abalunji tawe. Hosi hamutsitsanga mulekhanga nihali likunda khandi nihasasikhile,

⁸ne abulaho obetsanga nomulembe ahamuli. Kosi akamukholanga namasiamu. Muchendanga khunjila isiamu, ne omundu wosi ochendanga khunjila yiyo sialabakhwo nomulembe kata nahati tawe.

⁹Abandu baboolanga mbu, “Omundu wosi abulaho owitsile okhukhusoola nohomba okhukhuleer'ra obukhalachi bwahabwene. Khwekomba obulafu nebutswa esiilima sionyene nisio esia khwanyoola,

¹⁰ne khututuchila butswa singa ababofu. Khwesikar'ranga m'mubasu hakari ol'la abali mubutukhu, khandi singa abali musibala esia abafwa esiilimu.

¹¹Khuli noburi nende esihenda mwoyo. Khwekombanga Nyasaye akhuhonie okhurula mukhusandibwa nende mubusiamu, nebutswa sibulaho esiekholekhanga tawe.

¹²“OMWAMI, tsimbi tsiefwe khuibe netsinyinji. Tsimbi tsiefwe tsikhuyaalanga ifwe. Khumanyilisianga aketsimbi tsiefwe bulahi.

¹³Khwakhukhol'la indiri nikhukhusuula ma nikhusuula okhulonda ibe. Khwasandia abandu bandi nikhukhupa omukongo. Amapaaro kefwe namasiamu; amang'ana kefwe nobubehi.

¹⁴Obukhalachi bwahabwene bwasuulwa, ne sibaali ahembi khubulunji tawe. Obwatooto nobututuchilu habundu hababukan'nanga khandi obusubilwa sibunyala okhunyoolekhaho tawe.

¹⁵Abulaho oboolanga akatooto, ne omundu wosi olekhanga okhukhola obubi yenyoolanga nabaliywe mubakholi betsimbi.” OMWAMI uluutsi yaka ne ubeeleye mbu obukhalachi bwahabwene sibukholwanga tawe.

¹⁶Uchenyele okhulola mbu abulaho kata mulala okhonyel'langa abasandibwanga tawe. Khulwe yako yetsa okhurumikhila obunyalibwe omwene okhubanunula ma anyoole obulechi.

¹⁷Nayebiikhe obwatooto singa esitsengwa siokhusilifu, khandi alebiikha obunyaali bwokhuhonia singa esikutu. Nabe nende obunaayi obukali khulwo okhukol'losia ebindu khandi khulwo khuhaana esinyasio nende okhurunjia es'sialia khu mabi akasalisianga abandu.

¹⁸Alahaana esinyasio khu abasuku baabe okhulondokhana nende ebikhole biabwe, kata nende yabo abamenyanga mubibala biehale.

¹⁹Okhurula ebukwe okhwola emasaba abandu bosi balamuria nende obunyalibwe obukhongo. Aleetsa singa omuchela kweikhula khandi singa imbumbuyeka ingali.

²⁰OMWAMI abool'langa abandu baabe mbu, “Nanzitse Yerusalemu okhumulinda nende okhumuhonia inywe mwesi abekalukhanianga okhurula mutsimbi tsienywe.

²¹Ne nanombe indakano n'nenywe; mal'le okhumuha obunyali bwanje nende amebaalo kanje okhuba akenywe inziayo, ne okhurula luno okhwola mube abahulili khu ise, khandi mwibaal'le abaana benywe nende abetsukhulu benywe okhulonda amalako kanje tsinyinga tsiosi etsitsanga.”