Read lunyore ISAYA 6 Bible Online

ISAYA 6 - lunyore bible

ISAYA 6

¹Khumuhika okwomuruchi Usia yafwilakhwo, ndalola OMWAMI. OMWAMI tsana yali niyekhaaye khuluruba lulwe, naali hekulu khandi nachinguliywe, ne ekanzo yiye niyitsuye mu Hekalu.

²Ahayali ebilonje ebiakhanga, biali nibisinjiyeho nibimubotokhan'ne. Buli esilonje siali netsimbaha tsisasaba. Siefunikha m'moni mwosio netsimbaha tsibili, ne omubili kwasio nikufunikhwa netsimbaha tsibili, ne nisipulukha netimbaha tsindi tsibili.

³Bialangisaningia nibiboola mbu: “Omutisienukhu, omutsienukhu, omutsienukhu! OMWAMI Wokhunyala Biosi nomutsienukhu! Obukhongo bubwe bwitsusianga esibala.”

⁴Okhulangisia khwabio khwatechesia omusinji kwe Hekalu, ma Ehekalu tsana niyitsulamwo omwosi.

⁵Nase nimboola mbu, “Mbula obunaayi bwosi musibala! Ndibile sichila sieling'ana liosi elibir'ranga m'munwa kwanje nelietsimbi, khandi menyanga hakari mubandu bamang'ana kabwe kosi kali butswa aketsimbi. Ne kata mbwo, ndutsi Omuruchi, OMWAMI Wokhunyala Biosi netsimoni tsianje omwene!”

⁶Ma silala khubilonje tsana nisipulukha okhwitsa hasi handali nisichingile elianda liomul'lo elia siali nisihinisie khulusambwa nelimaki.

⁷Esilonje yisio siatiila khumunwa kwanje nelianda liomul'lo yilio nisiboola mbu, “Yili litiil'le khumunwa kukwo ne luno obubi bubwo burul'le, netsimbi tsitsio tsilekheywe.”

⁸Nilwo olwa ndahul'la OMWAMI naboola mbu, “Niwina owandakharuma? Niwina owakhaba omurumwa wefwe?” Ningalusia nimboola, “Ise ndatsia! Ruma!”

⁹Kho yambool'la mbu nzie okhubool'la abandu amang'ana kano: “Kata nimwakhahuyia khulwa luhono sina, simwakhamanyilisiakhwo tawe. Kata muhenge khulwa luhono sina, simwakhamanya esikholekhanga tawe.”

¹⁰Ma niyambool'la mbu, “Siluhasia emioyo chiabandu yaba, niwikala amarwi kabwe, nobofusia tsimoni tsiabwe, kho babule okhulola kata okhuhulila, nohomba okhumanyilisia khase bakhasuukhana khu ise ma bahonibwe obulwaye bwabwe.”

¹¹Nireeba mbu, “OMWAMI, kakhabe mbwo okhwola lina?” Naye niyangalusia mbu, “Okhwola olwa amatookho nakasasibwe nikasikala sila abandu, — okhwola olwetsinyumba tsisikala tsinzele sila omundu — okhwola olwemikunda chilekhwa okhukwa likunda.

¹²Ndakhakhunge abandu okhutsia ehale bwene ma kachile esibala sikwe likunda.

¹³Kata nikaba mbu omundu mulala mubandu likhumi alisikala musibala, khandi naye alamumwa; alaba singa es'sina siomuruba okuremachilwe.” (Es'sina tsana nobuchiachilo obuhia bwabandu ba Nyasaye.)