Read lunyore ISAYA 60 Bible Online

ISAYA 60 - lunyore bible

ISAYA 60

¹Buukha, ibe Yerusalemu, ma waakhe singa eliuba; Obukhongo bwo MWAMI bwakhanga khuibe.

²Amahanga kandi kaleetsulamwo esiilima, nebutswa khuibe, obulafu bwo MWAMI bulaakha. Obulafu bwokhubaho khukhwe bulaba khuibe.

³Amahanga kalakhweswa okhwitsa khubulafu ibwo, Ne abaruchi balakweswa nobulafu bwelitukhulio lihia.

⁴Henga iyi ne iyi olole akekholekhanga; Abandubo bebunjikhanga halala okhuchelela ingo! Abasianibo nabetse okhurula ehale muno; abakhaanabo nabo balachingwa singa abaana butswa.

⁵Olalola yaka ma osangale okhusila; olekhoya niwetsiala okhusila. Obuhinda bwamahanga bulalerwa khuibe; Okhurula injelekha weinyanza obuhinda bwako buletsa.

⁶Abandu abenji halala nomukanda omukalikwe tsingamia baleetsa okhurula Midiani nende Efa. Balarula Sheba, nibaleeranga etsahabu nende obwali. Abandu bakhalandie amang'ana amalahi ako MWAMI akhol'le!

⁷Amakondi kosi aka Kedari nende Nebayotsi kalaleerwa khu ibe singa emisango. Ne kalahaanwa khulusambwa okhuyanzisia OMWAMI. OMWAMI alakhola Ehekaluye okhuba nobukhongo okhubira khale.

⁸Yitsi netsimeeli sina etsichendanga singa amalumbesi, khandi singa amakhuulwi akachelelanga ingo?

⁹Tsio netsimeeli etsirulanga mubibala biehale, tsichelesianga abandu ba Nyasaye ingo. Tsibaleeranga halala nende efetsa, netsahabu okhufumia eliira lio MWAMI, Nyasaye omutsienukhu wa Isiraeli, ochil'le amahanga kosi nikafumia abandu baabe.

¹⁰OMWAMI abool'langa Yerusalemu mbu, “Abandu okhurula mubibala bindi balombokha obuhia amasisiko, Ne abaruchi babwe nabakhurumikhile. Mwirima lianje ndali okhukhuha esinyasio, nebutswa luno nakhumanyie esirenda sianje nende tsimbabasi.

¹¹Obutukhu nom'basu ebilibwabio nabialame, kho mbu abaruchi bamahanga bakhuleer're obuhinda bwabwe.

¹²Nebutswa amahanga akarakhurumikhilanga ibe, kalamululwa kupu.

¹³“Emisaala tsiomutitsari, nende omuteyashuri nomutarakwa, Emisaala emikololokhu okhurula mumitsuru tsia Lebanoni, tsilaleerwa okhukhwombokha obuhia ibe Yerusalemu, Okhung'onia Ehekalu yanje, Okhukhola litookho lianje likhongo.

¹⁴Abasiani beyabo abakhusandianga baleetsa. Balenama imbeliwo khulwokhuhaana oluyali. Bosi abali nibakhuchaaya balekayakayila habilenjebio. Balakhuulanga mbu ‘Litookho lio MWAMI,’ ‘Sayuni, litookho lia Nyasaye wa Isiraeli omutsienukhu.’

¹⁵“Ibe siolilekhwakhwo nohomba okhubihil'lwa tawe. Sioliba khandi litookho elialekhwa likunda musitsiimi tawe. Nakhukhole okhuba omukhongo khandi owoluyali; Habundu hobusangali khulwe inziayo.

¹⁶Amahanga nabaruchi bakhaleere emiandu chiabwe khuibe. Nilwo olwa nomanye mbu ise OMWAMI mal'le okhukhuhonia, khandi mbu Nyasaye wa Isiraeli wobunyali akhukholanga ibe okhuba omulakhuule.

¹⁷“Nakhuleer're etsahabu musilenje siomukasa, Efetsa nende omukasa musilenje siesibia nende omusaala. Khandi esibia musilenje sielichina. Abaami benywe sibalamusandia khandi tawe; Nambakhole bamihe nobulunji nende omulembe.

¹⁸Liyoka lieindiri sililahul'likhakhwo khandi tawe. Esibala sienywe sisiakhamululwekhwo khandi tawe. Namusoole nimulinda singa lisisi; mulanzitsomia sichila ndali okhumuhonia.

¹⁹“Eliuba sililaba khandi obulafu bubwo mumubasu tawe, kata omwesi sikulaba obulafu bubwo mubutukhu tawe. Ise, OMWAMI, nambe obulafu bubwo inziayo; obulafu bwobukhongo bwanje bulaakha khu inywe.

²⁰Amatukhu kenywe akesibeela kakhoole khusiakamo. Ise OMWAMI nambe obulafubwo inziayo, obulafu obuhindilanga okhuyomba eliuba nohomba omwesi.

²¹Abandubo bosi balakhola akahabwene. Ne balalaamilwa esibala khulwe inziayo. Bo nemisaala etsia ndali okhubasimikha, khulwokhumanyia obukhongo bwanje khu bosi.

²²Kata abeinyumba yiyo indititi khandi abetutuyi okhusila, bakhabe singa lihanga likufu. Olwa inyinga eba nehesikhile, nakhole yaka okhuhesikha bwangu. Ise nise OMWAMI!”