Read lunyore ISAYA 61 Bible Online

ISAYA 61 - lunyore bible

ISAYA 61

¹OMWAMI Nyasaye unzitsusisie nomwoyowe, sichila unzauye khandi urumile okhukambila abatakha amang'ana amalahi. Okhuhonia abemioyo chiabwe chisaliiye, Okhulandia okobalakhuule khubahambe, Nende kokhubohololwa khwababohe.

²Urumile okhukamba mbu inyinga imal'le okhwola olwa OMWAMI alahonia abandube, nende okhuleka abasuku babwe. Urumile okhuhotselesia yabo abali musibeela,

³okhuha yabo abali nesibeela mu Sayuni, obusangali nende obulahi musilenje siokhwekhuula, olwembo lwokhwitsoomia musilenje siesibeela, mbu babe singa emisaala echio MWAMI omwene yali okhuraaka. Bosi balakhola akali amalahi, ne Nyasaye aletsoomibwa khumang'ana aka yakhola.

⁴Balombokha obuhia amatookho akali nikasasikha khulwo luhono olurambi.

⁵Abarende balamurumikhila, inywe abandu banje. Balaaya ebiayo bienywe, nibamulimila emikunda chienywe, khandi okhwakila emikunda chienywe chiemisabibu.

⁶Ne mulamanyikha singa abesaalisi bo MWAMI, abarumikhili ba Nyasaye wefwe. Mulalia khumiandu chiamahanga, nimwekhoya mbu nechienywe.

⁷Es'simba murwe sienywe nende tsisoni tsienywe sibilabaho khandi tawe. Mulamenya musibala sienywe abene, Ne emianduchienywe chilametekha esiakhabili; obusangali bwenywe bulahindila inziayo.

⁸OMWAMI aboolanga mbu, “Nyanzanga obulunji ne bihil'lwanga obunuuli nende obusiamu. Nambe omusubilwa khulwo khukabul'la abandu banje omukabwa, khandi nanombe indakano yeinziayo n'nabo.

⁹Balaba noluyali mubamahanga; Esiomundu owakhabalolenje yakhamanye mbu bo nabandu aba ndali okhulamila ikhabi.”

¹⁰Yerusalemu asangalanga khulwa amalahi ako MWAMI omukholeye, sichila afwana singa omweha owesiahile okhwerechekhela es'selelosie. Nyasaye umubikhile tsingubo tsiobuhonia nende obulechi.

¹¹Singa butswa obwebiraakwa birulanga m'maloba nibikhula, nimbwo OMWAMI Nyasaye alahonia abandu baabe, ne abamahanga kosi balamwitsoomia.