Read lunyore ISAYA 62 Bible Online

ISAYA 62 - lunyore bible

ISAYA 62

¹Nan'nome obutinyu khulwokhutinyilisia Yerusalemu; sindakhasiling'ana tawe okhwola olwa Yerusalemu yakhahonibwe, ma obulechi bwalio bwakhe singa tsimuli mubutukhu.

²Ibe Yerusalemu, amahanga kalakhulola ibe noli omulechi! Abaruchi bako bosi balalola obukhongobwo. Olalangwa eliira lihia, Eliira elihanwa nende OMWAMI Omwene.

³Olaba singa olusimbi lweing'ono khulwo MWAMI.

⁴Siolalangwakhwo khandi mbu, “Omulekhwa” tawe, kata esibalasio sisilalangwa mbu “Omukhasi omulekhwa tawe.” Eliira lilio elihia lilaba mbu, “Nyasaye usangasibubwe n'naye.” Esibalasio silalangwa mbu, “Obutesani bwobusangali,” Sichila OMWAMI asangasibwanga n'nawe, naye alaba singa omusaatsa wesibalasio.

⁵Singa omusiani omubuukha obukulanga omukhaana omuchima okhuba omwehawe, nimbwo uyo owakhulomba nakhuteesie ibe. Singa omusaatsa wes'selelo asangal'langa omwehawe, nimbwo Nyasaye naye nakhusangal'le ibe.

⁶Khumasisi kaako ibe Yerusalemu, m'mal'le okhurakhwo abalindi, barakhasiling'anakhwo obutukhu nom'basu tawe. Okhwola betsusie OMWAMI amang'ana kamasubisio ke. Ne baralekha akebil'le tawe.

⁷Baramulekhelakhwo obweyangu tawe okhwola olwa akalusia Yerusalemu mung'ono yayo. Ma alilombe okhuba litookho liesibala siosi sitsomianga.

⁸OMWAMI umal'le okhwetsuba olwa ahan'ne lisubisio litinyu; ne khulwo obunyalibwe alalikhola; “Obuswachebwo sibulaba esiokhulia siabasukubo khandi tawe. Ne abarende sibalatsilil'la okhunywa ewainiyo tawe.

⁹Nebutswa ibe owali okhuraaka ma nochesa obuswache, olalia khubusuma bwabwo ma witsoomie OMWAMI, Ibe owachila khandi obunjelesia amakhuyu, olanywa ewaini m'mukitsi kwe Hekalu yanje.”

¹⁰Abandu ba Yerusalemu, rule mwitookho, mutsie okhulomba omuhanda khulwabandu benywe okhukalukhilakhwo! Kasie omuhanda; hiniekhwo amachina! Chinguule ependela ikulu kho amahanga kamanye.

¹¹OMWAMI abool'langa esibala siosi mbu: “Boolele abandu ba Yerusalemu mbu OMWAMI yetsanga okhumuhonia. Aleerananga abandu aba yanunula.”

¹²Mulalangwa mbu, “Abandu ba Nyasaye Abatsienukhu.” Khandi “Abandu bo OMWAMI yahonisie.” Yerusalemu lilalangwa mbu “Litookho lia Nyasaye ayanzanga,” khandi “Litookho elia Nyasaye aralekhakhwo tawe.”