Read lunyore ISAYA 63 Bible Online

ISAYA 63 - lunyore bible

ISAYA 63

¹“Niwina uyu owitsanga okhurula mwitookho lia Bosira musibala sia Edomu? Niwina uyo owebikhile bulahi mutsingubo tsinzakhanyu nachenda mubunyali nende tsingufu?” “Nise MWAMI, oli nobunyali bwokhuhonia, owitsanga okhumanyia akobulechi.”

²“Busina tsingubo tsitsio tsiakhanyile singa etsiomundu osen'nanga emisabibu hasi khulwokhulomba ewaini?”

³OMWAMI akalusianga naboola mbu, “Mal'le okhusen'na amahanga hasi singa emisabibu, ne abulaho owetsa okhukhonya. Ndali nelirimia olwa ndasen'na amahanga hasi, ne amatsahi kaako kebakhile khutsingubo tsianje tsiosi.

⁴Ndali okhukhalaka mbu inyinga yokhuhonia abandu banje, yali niyol'le, nayo niyo inyinga yokhuhaana esinyasio khubasuku babwe.

⁵Ndali okhuchenya olwa ndahenga niralolakhwo omundu wokhukhonya tawe. Nebutswa lirima lianje liali okhungufuhasia, ma ninyoola obulechi omwene.

⁶Mwirima lianje ndasen'na amahanga kosi hasi ningamulula kosi. Ndasundula amatsahi kobulamu bwako hasi.”

⁷Namboole khukobuyanzi bwo MWAMI oburasimanga tawe. Mwitsoomianga khulwa yako kosi aka yakhukholeeye ifwe. Ye walaamila abandu ba Isiraeli tsikhabi tsinyinji, khulwe tsimbabasitsie nende obuyanzi oburasimanga tawe.

⁸OMWAMI yali okhuboola mbu, “Bo nabandu banje; sibakhangaatakhwo tawe.” Ma khulwako yali okhubahonia

⁹okhurula mubusalili bwabwe bwosi. Siyali om'malaika owabahonia tawe, nebutswa yali OMWAMI omwene owali okhubahonia mubuyanzibwe nende mutsimbabasitsie yali okhubasoola. Yabalindanga khasotso mumatukhu kakhale,

¹⁰nebutswa bamukhol'la indiri nibachila Omwoyokwe Omutsienukhu okhuba nesibeela esikali. Kho OMWAMI yamala naba omusuku wabwe ma nabalwana.

¹¹Nebutswa bamala nibetsul'la akali okhwekholekha mumatukhu kakhale, amatukhu kali ka Musa, omurumikhili wo MWAMI, ma nibareeba mbu, “Kho luno OMWAMI owahonia abemeli babandu baabe okhurula munyanza ali hena? OMWAMI owaha Musa Omwoyo ali hena?

¹²OMWAMI ali hena, owarumikhila obunyalibwe okhukhola akokhuchenya okhubir'ra mu Musa, nakabukhania amaatsi keinyanza imbeli wa Baisiraeli khulwo okhwenyool'la oluyali olweinziayo omwene,

¹³khandi owemel'la abandube okhubir'ra munyanza eyatsia olutungu?” Singa etsisululi tsiomusitsiimi sibayesikar'rakhwo tawe.

¹⁴Singa tsing'ombe tsiemel'lwanga okhutsia mwibanda liobunyasi bwanera nimbwo OMWAMI yaha abandube obuhuluukhi. Yemel'la abandube ma nanyool'la eliiralie oluyali.

¹⁵OMWAMI, okhuhengekhwo okhurula mwikulu, ahomenyanga mubutsienukhu nende mubukhongo bubwo. Obuhendelibwo obukali khu ifwe buli hena? Obunyalibwo buli hena? Obuyanzibwo nende tsimbabasitsio bili hena? Orakhwibil'la tawe.

¹⁶Ibe niwe papa wefwe. Abakuka befwe Aburahamu nende Yakobo sibakhumanyile ifwe tawe, nebutswa ibe OMWAMI, oli papa wefwe. Niwe okhusoolanga khasotso.

¹⁷Busina okhulekhanga nikhwebera okhurula khutsinjilatsio? Busina okhukholanga abesikala marwi ma khukhukalukha ibe? Kalukha khulwe yabo abakhurumikhilanga ibe, abandu ababetsanga obulaamebwo khasotso.

¹⁸Khulwamatukhu mati Ehekalu yiyo yalinji eyefwe, ifwe abandu baabo abatsienukhu, yali okhukhungwa nebutswa luno abasuku befwe bachisen'na hasi.

¹⁹Okhukhol'langa ifwe ol'la singa oralikhwo omuruchi wefwe tawe, khandi ol'la singa sikhwalikhwo abandu baabo tawe.