Read lunyore ISAYA 64 Bible Online

ISAYA 64 - lunyore bible

ISAYA 64

¹Busina orarandula likulu ma wikhe hasi? Kho ebikulu ebirambi bikhulole ma birenge khulwoburi!

²Biakhatechela singa amaatsi akapapachilanga khumul'lo okwatukhanga. Yitsa omanyie obunyali bwo khubasuku baabo, ma ochile amahanga katechele imbeli wo!

³Yaliho inyinga eya wetsa ma nokhola ebindu biokhurisia ebiakhurapaalangakhwo biakhekholekha tawe. Ebikulu ebirambi biakhakhulola ma nibitechela khulwa oburi.

⁴Okhurula khale omundu wosi asili okhulolakhwo kata okhuhul'lakhwo Nyasaye singa ibe okholanga ebindu singa yibi khuyabo abakhusubilanga.

⁵Ibe ohuchil'langa yabo abasangal'langa okhukhola akali amalahi, yabo abetsul'langa obwa wenyanga bamenye. Ibe wakhutiil'la lirima, nebutswa khwatsilil'la okhukhola tsimbi. Kata nikali mbu wali okhukhutil'la lirima, khusitsilil'langa okhukhola tsimbi okhurula munyinga tsia khale.

⁶Ifwe fwesi khwakhola tsimbi; kata emilimo chiefwe chiosi emilahi nesifwabi. Khulwe tsimbi tsiefwe, khuli singa amasafu akanialanga ma kahilwa nobusindu.

⁷Omundu wosi siakhusaayangakhwo ibe tawe, abulaho owitsanga khuibe okhuruna obukhonyi. Ibe wayebisa okhurula khu ifwe ma wakhwebala khulwe tsimbi tsiefwe.

⁸Nebutswa ibe oli papa wefwe, OMWAMI. Ifwe khuli singa litohi, ne nawe oli singa omulonji. Ibe wali okhukhulonga ifwe,

⁹kho orakhutil'la lirima okhusila kata okhukhubal'lakhwo tsimbi tsiefwe inziayo tawe. Khuli abandu baabo; okhubeele tsimbabasi.

¹⁰Amatookhoko amatsienukhu kali singa esitsiimi; Yerusalemu nelikunda elialekhwa,

¹¹ne Ehekalu yefwe inzienukhu khandi eyang'oonibwa bulahi ahabakuka befwe balinji okhukhwitsoomisia, hamuluywe nende omul'lo. Siahabundu aha khwali okhuyanza hakwiye likunda.

¹²OMWAMI, nosinjile ehale khumang'ana yaka tawe? Ibe sinokholekhwo esindu siosi ma nakachile nakhukhupe esibi okhubira esichelo?