Read lunyore ISAYA 65 Bible Online

ISAYA 65 - lunyore bible

ISAYA 65

¹OMWAMI yali okhuboola mbu, “Ndali ninderechekhele okhukalusia amasaayo kabandu banje, nebutswa nabo sibasaaya tawe. Ndali ninderechekhele okhunyoolekha mubo, nebutswa nabo sibayiruna tawe. Lihanga siliasaaya khu ise tawe, kata olwa ndali ninderechekhele okhubakalusia mbu, ‘Nise uno; nzia okhumukhonya!’

²Mbetsanga omwerechekhu khasotso okhuhuchil'la abandu banje abakholanga amasiamu neinjinia nibalonda injila yabwe abene.

³Batsilil'langa okhuumeeta lirima sila es'simba murwe. Bahaananga emisango chiabanasibala mumikunda emitsienukhu khandi basambilanga obwali khutsisambwa tsiabanasibala.

⁴Mubutukhu batsitsanga mumangaywa nende mubilindwa okhureeba obukhonyi okhurula khumisambwa. Balitsanga inyama yeimbitsi nibanywa amalasile akarulanga khunyama ehan'nwe khumisango chiabandu abanasibala.

⁵Ma babool'la abandi mbu, ‘Mwesunde ehale okhurula khu ifwe; khuli abatsienukhu okhusila, simunyala kata khukhutilakhwo tawe!’ Sinyala okhwefwila abandu singa yabo tawe. Lirima lianje khubo lili singa omul'lo okurasimanga tawe.

⁶“Mal'le okhwahula esinyasio esia nambahelesie, ne okhukhalachilwa khwabwe khuhandichilwe musitapu. Sinambule okhuhenga khu akabakhola tawe, nebutswa nambarunge

⁷khulwe tsimbi tsiabwe nende tsimbi tsiabakuka babwe. Basambile obwali bekayakayilanga habundu habanansibala khubikulu khandi bal'lomele obubi khu ise. Kho nambahe esinyasio okhuhelana nende tsimbi etsiabali okhukhola mumatukhu kakhale.”

⁸OMWAMI aboolanga mbu, “Omundu siyononianga amakhuyu amalahi tawe nikarali abandu balombanga ewaini okhurula khuko. Kata nase sinamulule abandu banje bosi tawe nambonie yabo abarumikhilanga.

⁹Nandeere Abaisiraeli bolwibulo lwa Yuda ne abetsukhulu babwe okhubukule esibala sianje siemubikulu. Abandu banje abelwa, abaarumikhilanga bakhamenye ebwene iyo.

¹⁰Balindekayakaya nende okhwemel'la amakondi kabwe nende tsing'ombe mubwayilo obuli Mwibanda lia Sharoni emasaba wa Yerusalemu khandi Mwibanda lia Akori ebukwe wa Yerusalemu.

¹¹“Nebutswa sikakhabe mbwo khu inywe abanzibil'langa tawe, inywe abachaayanga Sayuni, esikulu sianje esitsienukhu, ma mwekayakaya Gadi nende Meni, abanyasaye be ikhabi indahi nende imbi.

¹²Namulekhe mwirwe nolukanga. Inywe mwesi namunyenywe bunyenywa sichila olwa ndali okhumulanga simwahuchil'la tawe. Khandi olwa ndal'loma simwahulila tawe. Nebutswa mwakhola amabi imbeli wanje nimwela yako akarainyanzisia tawe.

¹³Khulwe yako mubool'langa mbu, abarumikhili banje nabalie, nebutswa inywe namube neinzala; abarumikhili banje nabanywe, nebutswa inywe namube nobuluho. Bo nabasangale nebutswa inywe namusimbe emirwe.

¹⁴Abarumikhili banje nabembe khulwobusangali, nebutswa inywe namulakaye nomwoyo okubeleeye.

¹⁵Abandu banje abelwa balarumikhila eliira lio okhulama esilaamo siobubi. Ise OMWAMI Nyasaye nakhwire. Nebutswa nambaane eliira licheni khu yabo abalondanga amalako kanje.

¹⁶Omundu wosi musibala owakhareba mbu alamilwe ikhabi, alakhola mbwo muliira lia Nyasaye Omusuubilwa. Omundu wosi oba niyesuha, alesuhila muliira lia Nyasaye Omusubilwa. Eminyakhano chiakhale chilahwa ma chibil'lwe.”

¹⁷OMWAMI aboolanga mbu, “Nombanga esibala esihia nende likulu elihia. Ebindu ebiekholekha khale bilebil'lwa kupu.

¹⁸Musangale nimuyanza khasotso mubulonji obuhia. Yerusalemu lihia elia nombanga lilabamwo nobusangali obwinji, ne abandu balio balayanza.

¹⁹Ise omwene ndaba nobuyanzi obwinji khulwa Yerusalemu nende abandu balio. Okhwekhuula sikhulabaho tawe, kata okhutakha obukhonyi.

²⁰Abaana abatoro sibalafwa mubwana bwabwe khandi tawe, ne abandu bosi bamenya okhwola khundukho yabwe. Yabo abakhamenya okhwola emihika emia ndala balabalwa singa ababuukha. Abandu okhufwa emihika yitsio nichiroola, siakhabe esimanyilo mbu mbaheeye esinyasio.

²¹Bakhombokhe tsinyumba nibamenya mutsio. Bakharaake emikunda tsiemisabibu nibalia ebiamo biachio.

²²Sibakhombokhe tsinyumba, abandi nibamenya mutsio tawe. Sibakharaake ne abandi nibalia ebiamo biachio tawe. Emihika chiomundu chiakhahelane nende echiomusaala, ne abelwa banje balisangal'la emilimo chiamakhono kabwe oluhono olurambi.

²³Emilimo echia bakholanga chilaba netsikhabi, ne abaana babwe sibalanyoola esibi tawe. Ndakhabalaamile ikhabi nende abetsukhulu babwe munyinga tsiosi etsia khetse.

²⁴Kata nibasili okhumala okhusaaya khu ise, nangalusie amasaayo kabwe.

²⁵Ebibwe nende ebimeme bilalila halala. Etsisimba tsilaaya obunyasi singa tsing'ombe, ne tsinzokha natsio tsiakhalie olukuukhi lwonyene; sitsiakhasalisiekhwo nohomba okhwononia esindu siosi khu Sayuni, esikulu sianje esitsienukhu tawe. Ise OMWAMI mal'le okhuboola.”