Read lunyore ISAYA 66 Bible Online

ISAYA 66 - lunyore bible

ISAYA 66

¹OMWAMI aboolanga mbu, “Likulu noluruba lwanje, ne esibala neindebe yanje yanambisiangakhwo ebilenje. Kho neinyumba yambila sina eyamwakhanyombokhela, khandi nihabundu hafwana mbwena aha ndakhamenya?

²Ise omwene ndali okhulomba ebindu biosi! Sangal'langa yabo abetutuyianga nende abeyamanga tsimbi tsiabwe, khandi abaritsanga nende okhulonda amalako kanje!

³“Abandu bakholanga singa benya. Bahaananga etsichulukhi singa omusango khu ise ne nibeera abasiabwe. Bahaananga ebimeme khu ise ne nibahaana tsimbwa khubanyasaye bandi. Bahaananga omusango kwobuswache khu ise ne nibahaana amatsahi ketsimbitsi khubiniini. Basambanga obwali khu ise ne nibetsoomia ebiniini. Bayanzisibwanga nende tsinjila tsiobwekayakayi bwes'sinyo yisi.

⁴Khulwe yako nambal'ler're amanyakhano akebindu ebiabarisia; sichila olwa ndalanga abulaho owangalusia khandi olwa ndali okhul'loma abulaho owahulila. Bali okhwela okhukhola esikalamarwi nende okhukhola obubi.”

⁵Muhulile ako MWAMI aboolanga, inywe abamuritsanga nibalonda amalakoke. “Khulwa mbu muli abasubilwa khu ise, abalala khubandu benywe bamubihil'lwanga ne sibalikhwo nende liosi eliabakhaamban'nakhwo n'nenywe tawe. Bamutsekhel'langa nibaboola mbu ‘Lekha OMWAMI amumanyie obukhongo bubwe ma amuhonie, kho khumulole nimusangaye!’ Nebutswa nabo balasimbibwa emirwe.

⁶Hulile omwoyo omukali yikwo okuhul'likhanga mwitookho, hulile amayoosi yako akahul'likhanga mu Hekalu, namayoosi ko MWAMI ahetsanga abasukube esinyasio.

⁷“Litookho lianje litsienukhu lili singa omukhasi owibulanga omwana matetekhana kata nasili okhubakhwo neinumwa.

⁸Mbula omundu wosi walolakhwo kata okhuhul'lakhwo ling'ana lifwana yilio? Lilikhwoho lihanga eliombokhwa mwitukhu elala? Sayuni sililakhupa esibi oluhono, lihanga nilisili okhuchaakwa tawe.

⁹Murapaala mbu nanzosie abandu banje khunyinga yokhwibula ma mbule okhubebula tawe.” OMWAMI umal'le okhuboola.

¹⁰Sangale halala na Yerusalemu, yanze khulwalio inywe mwesi abayanzanga litookho yili! Sangale n'nalio luno, inywe mwesi abali okhuliekhuula!

¹¹Namusangal'le emiandu chialio, singa omwana omutoro anuunanga tsimbeele tsianyinawe.

¹²OMWAMI aboolanga mbu, “Nakhuleer're obuhinda obweinziayo; emiandu chiamahanga chiletsa khwinywe singa omuchela okurakhamanga tawe. Mulaba singa omwana olindwanga nanyinawe, nakikingilwa khutiti nakhol'lwa akobuyanzi.

¹³Namuhotselesisie ha Yerusalemu singa nyina omwana ahotselesianga omwanawe.

¹⁴Olwa mulilola yaka nikekholekha, mulayanza. Kalamukufuhasia nikamuha obulamu. Ma mulamanya mbu Ise, OMWAMI khonyanga yabo abambulilanga, ne ndil'langa abasuku banje lirima.”

¹⁵OMWAMI yakhetse nali nende omul'lo. Yakhelukhile mumabaha keimbumbuyeka okhuhaana esinyasio khu yabo aba yatil'la lirima.

¹⁶Alahaana esinyasio siomul'lo nende olukanga khubandu bosi bomusibala aba anyoolanga nibali nesikha — ne abenji bakherwe.

¹⁷OMWAMI aboolanga mbu, “Esihesi sili ahembi khu yabo abesiiyanga khulwo okhwekayakaya khwabandu abanasibala, abachendanga nibatsia mumikunda emitsienukhu, khandi abaliitsanga inyama yeimbitsi nende eyamachungu nende ebiokhulia bindi ebies'sinyo.

¹⁸Ise ndamanya amapaalo kabwe nende ebikholwa biabwe. Nzitsanga okhubunjelesia abandu bamahanga kosi. Olwa beetsa halala, balalola akobunyali bwanje bunyala okhukhola

¹⁹ma balamanya mbu ise nise obahetsanga esinyasio. “Nebutswa ndakhabelel'le abalala khubo ma mbarume mumahanga nende mubibala ebiehale ebisili okhuhul'lakhwo oluyali lwanje nohomba okhulolakhwo obukhongo nende obunyali bwanje. Ndakhabarume Esipania, Libia nende Ludia halala nabandu bayo abasitsa bokhulasa obuyingo. Khandi nambarume Tubali nende Ebuyunani. Balalandia obukhongo bwanje mumahanga yaka.

²⁰Balakalusia abandu bolwibulo lwenywe bosi okhurula mumahanga singa esihanwa khu ise. Balabaleera khusikulu sianje esitsienukhu esili mu Yerusalemu nibakingiywe khutsisululi, khutsinyumba nende khutsingamia, khandi nende mumakaari nomutsimboki, singa obwa Abaisiraeli baleeranga ebihanwa biobuswache mu Hekalu nibikingiywe mubindu ebisiyikhu.

²¹Ndakhakhole abalala khubo okhuba Abesaalisi nende Abalawi.

²²“Singa obwesibala esihia nende likulu elihia biakhahindile khulwo obunyali bwanje, nimbwo khandi abetsukhulu benywe nende eliiralienywe liakhahindile.

²³Khubulilitukhu lie Lisabo lio Omwesi Omuhia nende khu sielitukhu lie Sabato, abandu bomumahanga kosi baletsa okhundekayakayila hano mu Yerusalemu,” nimbwo OMWAMI aboolanga.

²⁴“Olwa baba nibarulanga, balalola emilambo chie yabo abali okhukhol'la indiri. Tsinyende etsibalitsanga sitsilafwa kata nahati tawe, ne omul'lo okubasambanga sikulisimibwakhwo kata nahati tawe. Okhulolekha khwatsio khulaba okhwes'sinyo khubandu bosi.”