Read lunyore ISAYA 7 Bible Online

ISAYA 7 - lunyore bible

ISAYA 7

¹Olwomuruchi Ahasi, omwana wa Yotsamu, omwitsukhulu wa Usia yali niyamihanga Yuda, lihe liachiaka. Resini omuruchi wa Siria nende Peka omwana wa Remalia, omuruchi wa Isiraeli batsia okhuseera Yerusalemu nebutswa sibalibukula tawe.

²Olwomuruchi wa Yuda yanyoola ling'ana mbu abasikari ba Siria bali nibali musibala sia Isiraeli, ye halala nabandube baria okhusila ma kata nibatechela singa emisaala echisunguswanga neimbutsa.

³OMWAMI nabool'la Isaya mbu, “Bukula omwanawo olangwanga Sheari Yashubu[4] ma otsie okhwakaana nende omuruchi Ahasi. Olamunyoola khumuhanda ahabalukhi betsingubo bekhalanga, ahomuferechi okuleeranga amaatsi okhurula mwitubango liemukulu kuhwel'langa.

⁴Omubool'le abe meso, yehotselesie ne aranyakhana mumakani kata okhutechela tawe. Oburima bwomuruchi Resini nabandube ba Siria nende oburima bwa Peka sibuli obululu okhuyomba omwosi okutuumanga okhurula mubichienga bibili ebiang'alaye tawe.

⁵Siria halala na Isiraeli nabaruchi babwe baloosisie masilisi okhola indiri.

⁶Bali nelichoomo liokhuseera Yuda, okhuriisia abandu kho beyonga mumukanda kwabwe, ma beemekhe omwana wa Tabili khundebe yobwami.

⁷“Nebutswa Ise OMWAMI mboolanga mbu yaka sikakhekholakhwo tawe.

⁸Khulwa sina? Sichila Siria silili likufu okhuyomba Damasiko, litookho lialio likhongo tawe, khandi Damasiko silili likufu okhuyomba omuruchi Resini tawe. Ne Isiraeli nayo, mumihika amakhumi kasasaba nachiraano echitsanga, Isiraeli liliba niliasasikha mubitonye ebinji niliranyala okhuba lihanga khandi tawe.

⁹Isiraeli silili likufu okhuyomba Samaria, litookho lialio likhongo tawe, khandi Samaria silili likufu okhuyomba omuruchi Peka tawe. “Norali omuralilu mubusubili bubwo sionyala okhuleka tawe.”

¹⁰OMWAMI yarumila Ahasi ling'ana lindi mbu:

¹¹“Reeba OMWAMI Nyasaye akhuhelesie esilolelo. Oreebe kata okhurula isi musibala sie Makombe nohomba okhurula ikulu mwikulu.”

¹²Ahasi yakalusia mbu, “Sindareeba esilolelo tawe. Kata sinyenya okhuteema OMWAMI tawe.”

¹³Ma Isaya namukalusia mbu, “Hulile luno, inywe abolwibulolwomuruchi Daudi. Nobubi okhusila inywe okhuchonyia obwefili bwabandu kho mwakhenya khandi muchonyie obwefili bwa Nyasaye?

¹⁴Khulwe yako OMWAMI mwene alakhuha esilolelo: Omukhaana omuchima alabelekha inda ma yeebule omwana omusiani, naye alamukulikha eliiralie Imanueli.[5]

¹⁵Olwa omwana uyo nabe naheel'le okhwahula hakari wamabi namalahi, abandu baliba nibanywetsanga amabeele ne nibalia obuukhi.

¹⁶Kata inyinga tsana nesili okhwola, abandu baliba nibatikha okhurula mubibala biabaruchi babili yabo abakhurisianga.

¹⁷“OMWAMI alaleera khuibe, nokhubandu baabo, nende khubeinyumba yobwami bosi, amatukhu keminyakhano emibi okhuyombakhwo eminyakhano chiosi echietsa khwihango lia Isiraeli okhurula niliabukhana khu Yuda. OMWAMI naleere omuruchi wa Asiria.

¹⁸“Olwe inyinga tsana yakhabe niyool'le OMWAMI yakhakhupe esifwetere okhusima Abaamisiri okhwitsa singa etsiisi okhurula khumichela emitititi etsirulanga ehale okhutsukha mu Naili. Khandi alasima aba Asiria okhurula musibala siabwe okhwitsa singa tsinzukhi.

¹⁹Balayeela mumabanda ketsinjengulukho nende mutsimangaywa tsiomutsinyanda, baletsuula khubisisia biamahwa nende mubwayilo bwosi.

²⁰“Olwe inyinga tsana yakhabe niyool'le, OMWAMI yakharunge omubeki weliiswi okhurula eluchelekha womuchela kwa Efurate naye niye omuruchi omukhongo wa Asiria! Alabeka tsindefu tsienywe, neliiswe liokhumirwe chienywe nende elili khumibili chienywe.

²¹“Olwe inyinga tsana yakhabe niyool'le, kata nikaba mbu omulimi yali niyabiikha esimoosi nende tsimbusi tsibili,

²²tsilomuhelesia amabeele amenji ma anyoole biosi ebiayenyanga. Yee batititi abakhahonokokha ma nibasikala musibala yimwo bakhanyoole amabeele nende obuukhi bwokhulia.

²³“Olwe inyinga tsana yakhabe niyool'le, buli mukunda kwemisabibu omulahi okulimwo emisaala chiemisabibu elefu ndala, ne buli mulala khumisaala yitsio nikukusibwa ebitonye biefetsa elefu ndala, kuliba nikwayumba mwo amarakalu nende ebisisia.

²⁴Abandu balatsia okhuhima mwo nobuyingo nende tsisele. Yee, lihanga liosi liletsuula mwo ebisisia nende amarakalu.

²⁵Khubikulu biosi ahebiraakwa biakhulanga hakhabe nihayumba ebisisia ma abulaho owakhatsiekhwoho tawe. Hakhabe habundu hobwayilo bwetsing'ombe nende amakondi.”