Read lunyore ISAYA 8 Bible Online

ISAYA 8 - lunyore bible

ISAYA 8

¹OMWAMI yambool'la mbu, “Bukula liseleti likali eliokhuhandikakhwo ma ohandiikekhwo mutsinyukuta tsingali mbu: ‘Maheri Shalali Hash Basi.’[6]

²Nyoola abandu babili abali abasubilwa, omwesaalisi Uria nende Sakaria omwana wa Yerekia babe singa abakobokheli.”

³Olunyumakhwo, ndakona nomukhasi wanje ma nabelekha. Olwomwana wefwe omusiani yali niyeebuywe, OMWAMI yambool'la mbu, “Omukulikhe eliira mbu ‘Maheri Shalali Hash Basi.’

⁴Omwana uyo nasili okhumanya okhulanga ‘Papa’ nohomba ‘Mama’, obuhinda bwa Damasiko bwosi nende ebindu biosi ebiabandu ba Samaria bali nibayaaka bilabukulwa nomuruchi wa Asiria.”

⁵Khandi OMWAMI yal'loma n'nase.

⁶Yaboola mbu, “Khulwa mbu abandu yaba basuuye amaatsi akabiranga kalaha okhurula mumuchela kwa Shiloa, ma batechelanga imbeli womuruchi Resini nende omuruchi Peka,

⁷Ise, OMWAMI nandeere omuruchi omukhongo wa Asiria nende abasikaribe bosi okhuseera Yuda. Balenjila singa omukhula kwamaatsi komuchela kwa Efurate, okwitsulanga tsinjinga tsiakwo tsiosi.

⁸Balabir'ra mu Yuda, singa omukhula kwamaatsi okwitsulanga okhwola mwikosi nikufunikha esindu siosi.” Nyasaye ali halala n'nefwe! Tsimbaha tsitsie etsiabambukha tsisoolanga esibala.

⁹Mwebunjikhe halala muburi, inywe amahanga! Hulile, inywe tsisoma tsiehale etsiokhusibala. Mwerechekhe okhulwana lihe, nebutswa mube noburi! Yee, mwerechekhe nebutswa mube noburi!

¹⁰Muloosie obwa munyala okhulwana! Simulaleka tawe. Mul'lome kosi singa obwa mwenya! Nebutswa kosi kali butswa amakhaya, sichila Nyasaye ali halala n'nefwe.

¹¹OMWAMI khandi yal'loma n'nase nobunyalibwe obukali niyanzechiyia mbu ralonda injila eyabandu balondangakhwo tawe. Yambool'la mbu,

¹²“Oralonda tsinjila tsimbi etsia abandu tawe khandi olaba noburi khubindu biabaritsanga tawe.

¹³Witsul'le mbu Ise, OMWAMI Wokhunyala Biosi, ndi omutsienukhu; nise owokwana okhuria.

¹⁴Khulwo butsienukhu bwanje obwokhuriisia, ndi singa omubero kwokhutiila abandu bebibala bia Yuda nende Isiraeli halala nende abandu ba Yerusalemu.

¹⁵Abenji bakhesikar're; bakhakwe nibatubukha. Bakhatiilwe m'mubero.”

¹⁶Inywe, abechi banje mukwana mulinde nimubiikha amang'ana aka Nyasaye yambeelesisie.

¹⁷OMWAMI webisile okhurula kubandu baabe, nebutswa ise subilanga muye nimbiikha okhunaaya kwanje muye.

¹⁸Lola ise ndi hano nende abaana aba Nyasaye yambelesia. OMWAMI Wokhunyala Biosi, owolurubalwe luli khusikulu sia Sayuni, wakhuruma ifwe singa ebimanyilo biamang'ana kobulamu khubandu ba Isiraeli.

¹⁹Nebutswa abandu balakhubool'la orunilisie amang'ana okhurula khubafumu nende khubebitsohela, yabo abebotsanga nende okhwemoonya. Balaboola mbu, “Kata mbwo, abandu bakwana okhureebela abali mwoyo amang'ana okhurula khumisambwa nende khubafwa.”

²⁰Nawe okwana okhubakalusia mbu: “Hulile ako MWAMI amwibaal'langa! Muralonda akebitsohela tawe. Akabimubool'la sikalamukhol'la obulahi bwosi tawe.”

²¹Abandu balayeyema musibala nibesikokela amakani khandi nibali nzala. Munzala yabwe nende muburima bwabwe balalaama esilaamo siobubi khumuruchi wabwe khandi khu Nyasaye wabwe. Banyala okhuhenga khwikulu

²²nohomba okhurangasia tsimoni hasi, nebutswa sibalalolakhwo esindu siosi nikurali omunyakhano nende esiilima. Balalola Esiilima esiokhurisia okhusila esia benjisibwanga mwo.