Read lunyore ISAYA 9 Bible Online

ISAYA 9 - lunyore bible

ISAYA 9

¹Sibakhabekhwo nende injila yokhuhonokokha okhurula mutsinyinga tsiomunyakhano yiku tawe. Amatukhu akabira, esibala sietsinzibulo tsia Sabuloni nende Nafutali siali nisiachaywa, nebutswa amatukhu keetsanga esibala yisio silanyoola oluyali okhuchiachila ebukwe weinyanza ya Mediterenia okhutsia khusibala esili eluchelekha lwa Yorodani, kata nende okhwola Galilaya yene, ahabacheni bamenyanga.

²Abandu bali nibachendanga musiilima, leelo baluutsi obulafu obukali. Bamenyanga musibala siesiilima, nebutswa leelo obulafu bubaakhilanga.

³OMWAMI, ibe ubahelesisie obusangali obukali; ubakhol'le okhuba nobusangali. Basangalanga muyako akomal'le okhukhola, singa abandu basangalanga olwa bachesanga amatuma kabwe, nohomba singa olwa bakabulananga obuhinda bwabayaakile.

⁴Okhuba ibe ufunachile likokolo eliali niliabasitohela, nende indabusi eyatiabanga amabeka kabwe. Ibe ulechele lihanga eliakhusandianga nende okhwibila abandu baabo, singa butswa waleka abasikari ba Midiani khale muno.

⁵Etsibuti tsiabasikari abaseeri, nende tsingubo tsiabwe tsiosi, etsitobelwekhwo amatsahi tsilasambwa nomul'lo.

⁶Khwibuliywe omwana! Khuheeywe Omwana omusiani! Naye naabe omuruchi wefwe. Yakhalangwe mbu, “Omwibaali wamakana,” “Nyasaye wo Bunyali,” “Papa weinziayo,” “Omwami we Milembe.”

⁷Obunyali bwoburuchibwe bulametekha okhukhula; Obwamibwe bulatsilil'la okhuba nomulembe. Alaba omuruchi mubukono bwa Daudi, obunyalibwe nibweletanga khubulunji nende khubukhalachi bwahabwene, okhurula olwaleelo okhwola khusihesi. OMWAMI Wokhunyala Biosi ali nesinani okhukhola yaka kosi.

⁸OMWAMI umal'le okhukhalachila abandu besibala sia Isiraeli, abali abetsukhulu ba Yakobo esiina.

⁹Abandu ba Isiraeli bosi, siomundu omenyanga mwitookho lia Samaria, alamanya mbu OMWAMI ukhol'le yaka. Luno nabeloli khandi nabeinjinia, ma baboolanga mbu,

¹⁰“Tsinyumba tsiamatifali tsikwiye hasi, nebutswa nakhwombokhe mwo tsinyumba chiamachina. Emikuul'lo chiemikhuyu tsiremachiywe hasi, nebutswa nakhwombokhele emisiita emilahi musilenje siemikhuyu.”

¹¹OMWAMI utsuubile abasuku babwe okhubaseera.

¹²Siria neli khulubeka lwebukwe ne Filisiti khulubeka lwemasaba basamisie eminwa chiabwe okhumila Isiraeli. Ne kata mbwo lirima lio MWAMI sinalibe nilihweye tawe; omukhono kukwe kusinyil'lwe butswa khulwokhuhaana esinyasio.

¹³Abandu ba Isiraeli sibekalukhanisie tawe; kata olwa OMWAMI Wokhunyala Biosi abaheeye esinyasio, sibahunzukhile khuye tawe.

¹⁴Mwitukhu elala lionyene OMWAMI alahaana esinyasio khubemeli nende abandu ba Isiraeli; alakhalaka okhubahiinia khubo omurwe nende omusila.

¹⁵Abasakhulu nende abandu aboluyali nibo omurwe. Ne omusila nakwo nabaroobi abebaalanga obubehi!

¹⁶Yabo abemel'langa abandu yaba babakosia nokhubakoyania po.

¹⁷Khulwe yako OMWAMI siyakhalekhakhwo ababuukha okhuhonokokha tawe, khandi siyakhabelel'lakhwo abalekhwa nende ababisandu tawe, sichila abandu bosi nabanasibala khandi nabasiamu, ne kosi akababoolanga namabi. Ne kata mbwo lirima lio MWAMI sinalibe nilihweye tawe, nebutswa omukhonokwe kusinyil'lwe butswa khulwokhuhaana esinyasio.

¹⁸Obusiamu bwabandu busambanga singa omul'lo okumululanga amarakalu nende ebisisia. Bwatukhanga singa omul'lo okusamba omutsuru nikutuuma omwosi.

¹⁹Khulwa mbu OMWAMI Wokhunyala Biosi usinyikhile, esinyasio sisie esia haananga khubandu siatukhanga singa omul'lo musibala siosi nisimulula abandu; ne kali buli mundu abetsanga khububwe omwene.

²⁰Habundu hosi musibala abandu berimanga nibalia esitonye siosi esiesiokhulia esiabanyala okhunyoola, nebutswa inzala yabwe sienyala okhuhwa tawe. Kata baliitsanga abaana babwe bene!

²¹Abandu ba Manase nende abandu ba Efuraimu balwananga abene khubene, ne khandi bahambananga halala okhuseera Yuda. Ne kata mbwo lirima lio MWAMI sinalibe nilihweye tawe; omukhonokwe kusinyil'lwe butswa khulwokhuhaana esinyasio.