Read lunyore ABALAWI 18 Bible Online

ABALAWI 18 - lunyore bible

ABALAWI 18

¹OMWAMI yabool'la Musa

²mbu abool'le abandu ba Isiraeli kano, “Ise nise OMWAMI Nyasaye wenywe.

³Muralonda tsifwo tsiabandu be Misiri aha mwamenyanga khale tawe; kata muralondakhwo tsifwo tsiesibala sia Kanaani, esia namwinjisiemwo tawe.

⁴Mulonde amalako kanje nimukhola aka namulake. Ise ndi OMWAMI Nyasaye wenywe.

⁵Mulonde tsifwo nende amalako aka muhetsanga; mulahonia obulamu bwenywe nimwakhakhola mbwo. Ise nise OMWAMI.”

⁶OMWAMI yahaana amalako kano naboola mbu: Murakholakhwo obuheyi nende abekho benywe tawe.

⁷Orasimbia papa uwo omurwe khulwo okhuheya nende mamawo tawe. Orafwabia mama uwo tawe.

⁸Orasimbia papawo omurwe khulwo okhuheya nabakhasibe bandi tawe.

⁹Oraheya nambotsowo kata nomukhaana wamama uwo undi tawe, kata abe niyakhusibubwa munzu yindi nohomba munzu yenywe.

¹⁰Oraheya nomwitsukhuluwo omukhaana tawe; yako nakes'simba murwe khuibe omwene.

¹¹Oraheya nende omukhaana wenywe owebulwa mumama uwo undi tawe, sichila nimbotsowo.

¹²Oraheya nende omukhaana wanga Papawo tawe sichila ninyakhusenjewo.

¹³Oraheya nomukhaana wanga mamawo tawe sichila nimamawo.

¹⁴Oraheya nomukhasi wamwabo papawo tawe, ye nimama uwo.

¹⁵Oraheya nomukhasi womusianiwo

¹⁶kata namulamuwo tawe.

¹⁷Oraheya nomukhasi khandi oheye nomukhaana uwe tawe, kata oraheya nomwitsukhulu uwe tawe. Haundi bakhaba amatsahi kaako ma khulwako kabe olubo khuibe.

¹⁸Oratesia omukhaana wanga omukhasiwo olwomukhasi uwo asili mwoyo tawe.

¹⁹Oraheya nende omukhasi olwa ahengele ebukwe tawe, sichila ali m'musilo.

²⁰Oraheya nomukhasi womundu undi tawe; yako kalakhukhola owomusilo.

²¹Orahaanakhwo mulala khubaana baabo okhukholwa omusango khumunyasaye olangwanga Moleki tawe, sichila yako nakaleere es'simba murwe khuliira lio MWAMI Nyasayewo.

²²Omusaatsa araheya nomusaatsa wasie tawe; yako nakes'sinyo khu Nyasaye.

²³Omusaatsa kata omukhasi baraheyakhwo nomuruko kata esolo tawe; obusiamu yibwo bumukholanga owomusilo.

²⁴Murakhabakhwo nomusilo khulwo okhukhola ling'ana liosi khuyaka tawe, okhuba nimbwo abarasubilanga Nyasaye bekhola abomusilo, abandu yabo abamenyanga musibala yisi inywe nimusili okhwinjilamwo, abo MWAMI akhunganga okhurulamwo kho nenywe mwinjile mwo.

²⁵Ebikhole biabwe bialeera omusilo khusibala, ma khulwako OMWAMI ahaananga esinyasio khusibala nasikhola okhusuula abandu abalinji okhumenya musio.

²⁶Inywe mwesi Abaisiraeli nohomba abacheni abamenyibwa mwinywe, okhwola mulonde amalako ko MWAMI nimukhola aka amulakanga.

²⁷Abandu yabo bakhola ebindu bies'sinyo yibi biosi ma nibaleera omusilo khusibala siabwe, nebutswa inywe murabikholakhwo tawe.

²⁸Nilwo olwe esibala silabula okhumusuula singa obwa siasuula abandu abarasubilanga mu Nyasaye abalinji nibamenyamwo khale.

²⁹Mwitsul'le mbu omundu wosi owakhakholakhwo ebindu bies'sinyo yibi salabalwakhwo singa mulala khubandu ba Nyasaye tawe.

³⁰Ma OMWAMI naboola mbu, “Mulonde amalako akamuhetsanga ne muralonda tsifwo tsiabandu abamenyanga musibala yisi nimusili okhwinjilamwo tawe, khandi murekhola abomusilo khulwo okhukholakhwo elala khubindu yibi tawe. Ise nise OMWAMI Nyasaye wenywe.”