Read lunyore ABALAWI 20 Bible Online

ABALAWI 20 - lunyore bible

ABALAWI 20

¹OMWAMI yabool'la Musa

²abool'le abandu ba Isiraeli mbu, “Omundu wosi khwinywe nohomba omucheni owamenyibwa mwinywe owakhahaana mulala khubaana baabe okhurumikhilwa mubwekayakayi khusiniini sia Moleki okhwola alaswe namachina ma yeerwe nabandu bosi.

³Omundu wosi niyakhahaana mulala khubaanabe wosi wosi khumunyasaye Moleki ma aleere omusilo mu Liheema litsienukhu nende okhuleera es'simba murwe khuliira lianje litsienukhu, ndalamufukula ne sindamubala singa mulala khubandu banje khandi tawe.

⁴Ne abomukanda nibaba nibamayia aka yakhaba nakhol'le ma babule okhumwira namachina,

⁵Ise omwene ndalamufukula ye halala nabeinyumba yiye yosi halala nende bosi abahambananga n'naye mukhubula okhuba abasubilwa ne nibekayakaya Moleki. Sindababala singa abandu banje khandi tawe.

⁶“Omundu wosi niyakhatsia okhureebelesia ling'ana liobuchesi khubebitsohela nende khubafumu narabba omusubilwa khu ise, ndamukalukhana ne sindalamubala singa mulala khubandu banje khandi tawe.

⁷Mube abatsienukhu khasotso sichila nise OMWAMI Nyasaye wenywe.

⁸Mulonde amalako kanje sichila nise OMWAMI omutsienulanga inywe.”

⁹OMWAMI yahaana amalako kano mbu: Omundu wosi olakanga esilaamo siobubi khusamwana nohomba nyina okhwola yerwe. Alafwa olufu lulwe omwene.

¹⁰Omusaatsa wosi owakhaheya nomukhasi wo Muisiraeli wasie, bombi omusaatsa uyo nende omukhasi owa yali okhuheya n'naye okhwola berwe.

¹¹Omundu oheyanga nende mulala khubakhasi ba samwana asimbianga samwana omurwe, ne bombi ye nende omukhasi wa samwana uyo okhwola berwe. Balafwa olufu lwabwe abene.

¹²Omundu naba naheya nomukhasi womusiani uwe bombi okhwola berwe. Bakhol'le tsimbi tsiolubo ne balafwa olufu lwabwe abene.

¹³Omusaatsa naba naheya nomusaatsa wasie, bosi bakhol'le esies'sinyo esikali, bombi okhwola berwe. Balafwa olufu lwabwe abene.

¹⁴Omusaatsa naba nateesia omukhaana nende nyinawe okhuba abakhasi baabe, bosi bataru okhwola basambwe mumul'lo ma berwe sichila bakhol'le akes'simba murwe. Ling'ana ol'la yilio murakhalihuchil'lakhwo hakari wenywe tawe.

¹⁵Omundu niyakhaheya nomuruko nohomba nesolo, ye halala neinyama yiyo okhwola berwe.

¹⁶Omukhasi niyakhateema okhuheyana nomuruko, ye halala nomuruko yikwo okhwola berwe. Balafwa olufu lwabwe abene.

¹⁷Omusaatsa niyakhateesia mbotso nyene nohomba omwana wasamwana nohomba omwana wa nyina, basimbibwe emirwe imbeli wabandu ma bakhungwe okhurula mubandu benywe. Ye uheyele nambotso nyene ne okhwola anyoola esinyasio khulwa akene yako.

¹⁸Omusaatsa niyakhaba nomukhasi ohenjele ebukwe, bombi okhwola bakhungwe okhurula mubandu babwe sichila bafunachile lilako elil'lomanga khukomusilo.

¹⁹Omusaatsa niyakhaheya nende nyakhusenjewe, bombi okhwola banyoole esinyasio khulwo obuheyi bwomusilo.

²⁰Omusaatsa niyakhaheya nomukhasi wakhotsa nyene, asimbianga khotsa nyene omurwe, ne ye halala nomukhasi wakhotsa nyene okhwola banyoole esinyasio khulwa akene yako. Abulaho khubombi owakhebulekhwo abaana.

²¹Omundu naba nateesia omukhasi womusiani wabwe, balafwa nibali abakumba. Ukhol'le akomusilo khandi usimbisie amwabowe omurwe.

²²OMWAMI yaboola mbu, “Mufumile amalako kanje kosi nende amang'ana kanje, kho mbu mubule okhusulwa nende esibala sia Kanaani esia namwinjisiemwo.

²³Muralonda imbikho yabandu abamenyeleyo tawe. Mbinianga abandu abarasubilanga mwise okhurula musibala mbu kho nenywe mwinjilemwo. Bayisinyisia ise khulwe emimo chiabwe echies'sinyo.

²⁴Nebutswa ndayesuha okhumulaamila esibala siobuhinda khandi esiebiamo ebinji yisi okhuba esienywe, ne nasihaane mumakhono kenywe. Ise nise OMWAMI Nyasaye wenywe ne ndamala okhumwahula okhurula khumahanga kandi.

²⁵Kho khulwe yako, okhwola mwabukhanie hakari wetsinyama nende amanyonyi akasiiywa nende akali akomusilo. Muraliakhwo etsinyama tsiomusilo nohomba amanyonyi komusilo tawe. Ise ndamala okhukakhola akomusilo ne nimukalia mwekholanga abomusilo.

²⁶Mube abatsienukhu ma mubetsenje abanje sienyene, sichila ise nise OMWAMI khandi ndi omutsienukhu. Ndamwahula okhurula khumahanga kandi kho mube abanje sienyene.

²⁷“Omusaatsa wosi kata omukhasi wosi oli nebitsohela nohomba omufumu okhwola alaswe namachina ma yerwe. Wosi okholanga ling'ana yili alafwa olufu lulwe omwene.”