Read lunyore ABALAWI 22 Bible Online

ABALAWI 22 - lunyore bible

ABALAWI 22

¹OMWAMI yalaka Musa

²abool'le Haruni nende abasiani baabe mbu, “Muraleera es'simba murwe khuliira lianje litsienukhu tawe, kho muhaane oluyali khumisango chiosi emitsienukhu echiabandu ba Isiraeli bahaananga khu ise. Nise OMWAMI.

³Nikakhaba mbu mulala khubolwibulo lulwo yakhesunda ahembi khumusango omutsienukhu okwabandu ba Isiraeli bambaniye ise, olwaba nali mumusilo sanyala okhurumikha khulusambwa khandi tawe. Yaka nakarumikhenje amatukhu kosi aketsanga. Ise nise OMWAMI.

⁴“Omundu wosi khubolwibulo lwa Haruni owakhaba nobuchele nohomba oratsanga imbeli arakhaliakhwo khumisango emitsienukhu nasili okhusiiywa tawe. Omwesaalisi wosi ali nomusilo niyakhahamba khusindu siosi esili esiomusilo khulwo okhutiila khumulambo nohomba naba niyeloor'ra,

⁵nohomba naba natiila khusolo yomusilo nohomba omundu womusilo.

⁶Omwesaalisi wosi owakhakwa owomusilo, alabetsanga owomusilo okhwola khumukolooba kwelitukhu yilio, ne kata olwene yilwo araliakhwo khumisango emitsienukhu tawe okhwola olwa yakhaba niyesingile omubili.

⁷Eliuba niliakhayela ali omusiiyikhu ma kho anyala okhuliakhwo khumisango emitsienukhu echibetsanga ebiokhulia bibie.

⁸Araliakhwo inyama yomuruko kwosi okufwiye okwene nohomba ekwir'rwe netsisolo tsiomubulimo tawe; yako kalamukhola owomusilo. Ise nise OMWAMI.

⁹“Abesaalisi bosi balinde amalako aka mal'le okhuhaana. Nikarali mbwo balaba abesikha ma bafwe sichila bakholeye amalako amatsienukhu esikala marwi. Ise nise OMWAMI khandi nise otsienulanga.

¹⁰“Abomunyumba yomwesaalisi bonyene nibo abalalitsanga khumisango emitsienukhu. Omundu undi wosi araliakhwo tawe; kata omundu omenyanga nomwesaalisi nohomba owahandikwa emilimo nomwesaalisi sanyala okhuliakhwo tawe.

¹¹Ne omusumba womwesaalisi owakulwa namapesa komwesaalisi nohomba owebul'lwa hango hahe anyala okhulia khubiokhulia ebiomwesaalisi anyoolanga.

¹²Omukhaana womwesaalisi owakhateesibwa nomundu orali omwesaalisi araliakhwo khumisango emitsienukhu yitsio tawe.

¹³Nebutswa omukhaana womwesaalisi owafwilwa omusaatsa nohomba owakhungwa khumusaatsa narali nabaana, ma ukalukhile okhumenya munzu mwa samwana, anyala okhulia khubiokhulia ebia samwana anyoolanga singa omwesaalisi. Nabomunyumba yomwesaalisi bonyene abanyala okhubiliakhwo.

¹⁴“Omundu undi wosi orali mulala khubeinyumba yomwesaalisi niyakhaliakhwo khumisango emitsienukhu sila okhumanyilisia, okhwola arunge omwesaalisi omurungo kwabio kwosi ma ameetekhwo ikulu wakwo esitonye siamakhumi kabili khumia.

¹⁵Abesaalisi barafwabia emisango emitsienukhu

¹⁶khulwa okhuhuchil'la omundu orakwan'ne okhubilia tawe. Yaka kalachila omundu uyo abe nesikha nende esinyasio. Ise nise OMWAMI khandi nzienulanga emisango.”

¹⁷OMWAMI yalaka Musa

¹⁸ahelesie Haruni nabasianibe nende abandu ba Isiraeli bosi amalako kano. Olwa Omuisiraeli wosi nohomba omucheni owamenyibwa mu Baisiraeli aba nahaananga omusango kwokhusambwa, kata nikwakhaba okwokhuhesia esiesuhosie nohomba nikwakhaba omusango okwokhwehaana mumwoyo, omuruko okuhanwanga kube sila obulema bwosi.

¹⁹Okhwola kube okwes'saatsa sila obulema bwosi kho kuhuchil'lwe.

²⁰Nimwakhahaana omuruko kwosi okulikhwo nobulema bwosi, OMWAMI salakuhuchil'la tawe.

²¹Olwa omundu wosi ahaananga omusango kwobuhambani khu MWAMI kata nikwakhaba okhwokhuhesia esiehuho nohomba nikwakhaba omusango okwokhwehana mumwoyo, omuruko okuhanwanga kube sila obulema bwosi kho kuhuchil'lwe.

²²Murahaana khu MWAMI omuruko kwosi okuli omubofu nohomba okutiechelanga nohomba okwakhalakwakhwo esino, nohomba okulikhwo likhwaku nohomba okweliseelo liakutukha kata okulikhwo ekalanga tawe. Murahaanakhwo omuruko okufwana mbwo khulusambwa singa omusango kwebiokhulia tawe.

²³Singa omusango kwokhwehaana, munyala okhuhaana omuruko okwachunya nohomba okurahelana bulahi nebutswa sikunyala okhuhuchil'lwa mukhuhesia khwesiesuho tawe.

²⁴Murahaana khu MWAMI omuruko kwosi okwa amaneke kakwo katuywa nohomba akakhalakwa, nohomba kasalisibwa kata nohomba kahinibwa tawe. Yikwo sikuhuchil'lwanga musibala sienywe tawe.

²⁵Murahaanakhwo omuruko kwosi okwanyoolwa okhurula khubandu abamenyibwa singa omusango kwebiokhulia tawe. Emiruko singa yitsio chibalwanga singa emilema ne sichihuchil'lwanga tawe.

²⁶Ma OMWAMI nabool'la Musa mbu,

²⁷Olwe esimoosi nohomba esimeme sielikondi nohomba esieimbusi sibulwanga, sirahinibwa khunyina wasio khulwa amatukhu kane nakataru tawe, nebutswa inyuma we yako, silahuchil'lwa singa omusango kwebiokhulia.

²⁸Murahaana omusango kweingombe nesimoosi siayo, nohomba likondo nesimeme sialio nohomba imbusi nesimeme siayo khwitukhu elala tawe.

²⁹Olwa muhaananga omusango kwokhukhupa embwo khu MWAMI, mulonde amalako kho muhuchil'lwe.

³⁰Mulie kwosi ne murakulekha kukone okhwola mukamba kwelitukhu lilondakhwo tawe.

³¹OMWAMI yaboola mbu, “Mulonde amalako kanje, nise OMWAMI.

³²Muraleera es'simba murwe khuliira lianje litsienukhu tawe; abandu ba Isiraeli bosi okhwola bamanye mbu, Ise nise OMWAMI khandi nise omutsienulanga inywe.

³³Ndamuhinia musibala sie Misiri okhuba Nyasaye wenywe. Ise nise OMWAMI.”