Read lunyore ABALAWI 23 Bible Online

ABALAWI 23 - lunyore bible

ABALAWI 23

¹OMWAMI yahelesia Musa

²amalako kano khulwa amasabo kemilukha, olwa abandu ba Isiraeli bebunjikhanga halala okhwekayakaya.

³Muli namatukhu kasasaba okhukhol'lamwo emilimo, nebutswa mwitsul'le mbu litukhu liakhane nakhataru, litukhu lie Sabato, neliokhuhuluukha. Khwitukhu yilio murakholakhwo omulimo kwosi tawe, nebutswa mubukane halala okhwekayakaya. Esabato nelitukhu lio MWAMI habundu hosi hamuba nimumenyele.

⁴Olake amasabo kano kakholwe munyinga tsiako.

⁵Lisabo lie pasaka elikholwanga okhuhaana oluyali khu MWAMI lichiakanga khubwile bwelitukhu lielikhumi nakhane khumwesi kwokhuranga.

⁶Khwitukhu lielikhumi nakharano Lisabo lie Mikaati echiralimwo amamela nalio nilichiaka, ne khumatukhu kane na kataru, muraliakhwo omukaati okulimwo amamela tawe.

⁷Khwitukhu liokhuranga khumatukhu yaka, mwebunjikhenje halala okhwekayakaya ne murakholakhwo omulimo kwosi kwosi tawe.

⁸Muhaane emisango chienywe chiebiokhulia khu MWAMI khulwa amatukhu kane nakataru. Khwitukhu liakhane nakhataru, khandi mulebunjikha halala okhwekayakaya nebutswa murakholakhwo omulimo kwosi tawe.

⁹OMWAMI nabool'la Musa mbu,

¹⁰Olwa namwinjile musibala esio MWAMI namuhelesie ma olwa namuchese obuswache bwenywe, muhaane ebirongola khumwesaalisi.

¹¹Naye alabihaana singa omusango omuchomekhe khu MWAMI, kho nenywe muhuchil'lwe. Omwesaalisi alabihaana litukhu elilonda Esabato.

¹²Khwitukhu elia muhan'nangakhwo omusango kwobuswache, khandi olwene yilwo muhaane esimeme sielimiiku esiomuhika mulala esiralikhwo nobulema bwosi singa omusango kwokhusambwa.

¹³Halala nomusango yikwo muhaane obusie etsikilo tsibili nibutsokelwemwo amafura komuseituni singa omusango kwebiokhulia. Okhuhunya khwomusango yiku khuyanzisianga OMWAMI. Khandi muhaane halala n'nakwo omusango kwewaini eliita ndala.

¹⁴Muraliakhwo khubuswache obuhia, kata obubisi, obukhalanjilwe nohomba obutekhelwekhwo omukaati okhwola olwa muba nimuleer're omusango yiku khu Nyasaye tawe. Lilako lino okhwola lilondwe nende abolwibulo lwenywe lwosi amatukhu kosi aketsanga.

¹⁵“Mubale amahonga kane nakataru amachima okhurula khwitukhu elilondanga Esabato elia mwahan'nakhwo ebirongola biobuswache bwenywe khu MWAMI.

¹⁶Khwitukhu liamakhumi karano, litukhu elilondanga Esabato yakhane nakhataru, muhan'nekhwo omusango kundi okwobuswache khu MWAMI.

¹⁷Sieinyumba eleere emihayila chibili echiomukaati ma bachihaane khu MWAMI singa omusango omuchomekhe. Siomuhayila kulombwe khubusie obuhela etsikilo tsibili, kutekhelwemwo amamela ma kuhanwe khu MWAMI singa omusango kwobuswache bwokhuranga okhucheswa.

¹⁸Halala nemikaati yitsio, muhaane ebimeme biomuhika mulala bine nabitaru, echulukhi ndala, nende tsimbusi tsibili, ne sirabbakhwomwo kata silala esili nobulamu tawe. Bilahanwa singa omusango kwokhusambwa khu MWAMI halala nende omusango kwobuswache nende okwewaini. Okhuhunya khwomusango yiku khuyanzisianga OMWAMI.

¹⁹Khandi muhaane ekhole ndala singa omusango kwetsimbi nende ebimeme ebisaatsa bielikondi b'bili ebiomuhika mulala bibe omusango kwobuhambani.

²⁰Omwesaalisi alahaana emikaati halala nebimeme bibili yibio singa esihanwa esichomekhe khu MWAMI khulwa abesaalisi. Emisango yitsi nemitsienukhu.

²¹Khwitukhu yilio murakholakhwo omulimo kwenywe kwosi kwosi tawe, nebutswa mwebunjikhe khulwokhwekayakaya. Abolwibulo lwenywe balonde lilako yili amatukhu kosi aketsanga, hosi aha muba nimumenyele.

²²“Olwa muchesanga ebiamo bienywe, murachesa ebili khundulo khwemikunda chienywe tawe; khandi murakalukha okhuruluma ebisikalanga munyuma tawe; mubilekhele abatakha nende abacheni abamenyibwa mwinywe. OMWAMI niye Nyasaye wenywe.”

²³OMWAMI nabool'la Musa mbu,

²⁴“Khwitukhu liokhuranga khumwesi kwakhane nakhataru mube nelitukhu lichomekhe liokhuhuluukha, ma mwebunjikhe halala okhwekhayakaya OMWAMI olwetsinzika tsiba nitsikhupile.

²⁵Muhaane omusango kwebiokhulia khu MWAMI ne murakholakhwo omulimo kwenywe kwosi tawe.”

²⁶OMWAMI nabool'la Musa mbu,

²⁷“Khwitukhu lielikhumi khumwesi kwakhane nakhataru nelitukhu eliokhusiiywa khwa buli muhika okhukholwanga okhuhiinia tsimbi tsiabandu. Khwitukhu yilio muraliakhwo esindu siosi tawe; mwebunjikhe halala khulwokhwekayakaya, ma muhaane omusango kwebiokhulia khu MWAMI.

²⁸Murakhola emilimo khwitukhu yilio tawe sichila nelitukhu liokhukhol'lakhwo omulukha kwokhuhiinia tsimbi tsiabandu.

²⁹Omundu wosi owakhaliakhwo esiokhulia khwitukhu yilio salabalwa singa mulala khubandu ba Nyasaye tawe.

³⁰Ne omundu wosi niyakhakhola omulimo khwitukhu yilio, OMWAMI omwene alamwira.

³¹Lilako yili likholwe nabolwibulo lwenywe lwosi, hosi hosi aha baba nibamenyele.

³²Okhurula khumukolooba kwelitukhu liakharano nakhane khumwesi yikwo okhwola khumukolooba kwelitukhu lielikhumi mwitsul'lenje litukhu yili singa litukhu lichomekhe eliokhuhuluukha, ne esindu siosi siralibwakhwo khulio tawe.”

³³OMWAMI nabool'la Musa mbu,

³⁴“Lisabo lia Mahindu lichiakanga khwitukhu lielikhumi nakharano khumwesi kwakhane nakhataru ne libukulanga amatukhu kane nakataru.

³⁵Khwitukhu liokhuranga khumatukhu yaka mwebunjikhe halala khulwokhwekayakaya ne murakholakhwo omulimo kwenywe kwosi tawe.

³⁶Sielitukhu khumatukhu kane nakataru yaka muhaanenje omusango kwebiokhulia. Khwitukhu liamunane mwebunjikhe halala khandi okhwekayakaya nende okhuhaana omusango kwebiokhulia. Nelitukhu liokhwekayakaya ne murakholakhwo omulimo kwosi tawe.

³⁷“Yaka niko amasabo aka mukhoya okhuhan'namwo oluyali khu MWAMI khulwa okhwebunjikha halala okhwekayakaya nende okhuhaana emisango chiebiokhulia, emisango chiokhusambwa, emisango chiobuswache, emisango chiewaini nende emisango chindi chiosi singa kakhoyanga esielitukhu.

³⁸Amasabo yaka kameetanga khumatukhu ke Sabato kosi, ne emisango yitsi tsimeetanga khubihanwa bienywe bia bulitukhu, nemisango chiokhuhesia ebiesuho, nende emisango chiokhwehaana abene echihanwanga khu MWAMI.

³⁹“Olwa muba nimuchesele obuswache bwenywe, mukhole lisabo yili khulwa amatukhu kane nakataru, okhuchiachila khwitukhu lielikhumi nakharano khumwesi kwakhane nakhataru. Litukhu liokhuranga nalibetsenje litukhu lichomekhe liokhuhuulukha.

⁴⁰Khwitukhu yilio, mubukulekhwo amatunde amalahi khumisaala chienywe, mubukule tsisaka tsiamasindu nende tsisaka tsiemisaala etsilikhwo namasafu, ma muchiake omulukha kwokhuhaana oluyali khu MWAMI Nyasaye wenywe.

⁴¹Mukhole lisabo yili khulwa amatukhu kane nakataru. Lilako yili lilondwe nabolwibulo lwenywe amatukhu kosi aketsanga.

⁴²Abandu ba Isiraeli bosi bamenye mumahindu khulwa amatukhu kane nakataru,

⁴³kho abolwibulo lwenywe bamanye mbu OMWAMI yakhola abandu ba Isiraeli bamenye mumahindu amatembekhele olwa yabahinia Emisiri. Ye niye OMWAMI Nyasaye wenywe.”

⁴⁴Kho munjila yiyi Musa yahelesia abandu ba Isiraeli amalako kokhulonda olwa baba nibakholanga amasabo kemilukha chiokhuhaana oluyali khu MWAMI.