Read lunyore ABALAWI 24 Bible Online

ABALAWI 24 - lunyore bible

ABALAWI 24

¹OMWAMI yabool'la Musa

²ahaane amalako kano khubandu ba Isiraeli. Muleere amafura komuseituni akaratsokelwekhwo mwo esindu, amalahi kene khulwe tsitaya tsio Mwiheema, kho mbu obulafu bwakhenjemwo khasotso.

³Buli khumukolooba Haruni nahambienje etsitaya ma alekhe tsiatukhe okhwola olwa busia, yaho imbeli wo MWAMI esioba wepasia eli imbeli we Lisanduku lie Indakano elili Habundu Hatsienukhu Okhusila. Lilako yili lilondwe amatukhu kosi aketsanga.

⁴Haruni nahengelesienje etsitaya etsili khusihani siatsio esietsahabu isiyikhu ne okhwola alole mbu tsiatukhanga khasotso imbeli wo MWAMI.

⁵Mubukule obusie etsikilo likhumi nende tsibili ma mutekhekhwo emihayila likhumi nachibili echiemukaati.

⁶Mure emikaati mutsinyaali tsibili, buli chisasaba mulunyaali l'lala khumesa eyalwakhwo netsahabu isiyikhu eli imbeli wokhubaho khwo MWAMI.

⁷Mure obwali obusiiyikhu khubuli lunyaali, singa esifwanani siomusango kwebiokhulia okuhanwanga khu MWAMI okhubukula obukono bwemikaati.

⁸Sie Sabato, amatukhu kosi aketsanga, okhwola emikaati chirebwe imbeli wokhubaho khwo MWAMI. Yiku nomulimo kwa Isiraeli inziayo.

⁹Emikaati yitsio netsia Haruni nende abolwibulo lulwe ne bachilile habundu hatsienukhu, sichila yisi nesitonye esitsienukhu okhusila khubiokhulia ebihanwanga khu MWAMI khulwa abesaalisi.

¹⁰Yaliho omundu owali nasamwana Omumisiri ne nyinawe yali Omuisiraeli. Omundu uyo yasoolana nende Omuisiraeli.

¹¹Mubusoolo yibwo, omundu uyo yanyeka eliira lia Nyasaye, ma nahilwa khu Musa. Eliira lianyinawe liali Shelomitsi omukhaana wa Debiri owomulwibulo lwa Dani.

¹²Yarebwa mumakhono kabalindi ma nibalindil'la OMWAMI ababool'le esia bamukhol'la.

¹³OMWAMI nabool'la Musa mbu,

¹⁴“Hinia omundu uyu esioba wekambi. Omundu wosi owahul'lakhwo omundu uyu nanyekanga Nyasaye are amakhono kaake khumurwe kwomundu uyo okhumanyia mbu ali nesikha ma nilwo olwabandu bosi balamulasa namachina nibamwira.

¹⁵Ma obool'le abandu ba Isiraeli mbu omundu wosi owakhanyeka Nyasaye okhwola anyoole esinyasio khulwa akene yako

¹⁶ma yerwe. Omuisiraeli wosi kata omucheni wamenyibwa mu Isiraeli owakhanyeka OMWAMI okhwola alaswe namachina ma yerwe nabandu bosi.

¹⁷“Omundu wosi owiranga okhwola naye yerwe,

¹⁸ne wosi owiranga omuruko kwowasie okhwola akusilanie nende okuli mwoyo. Lichoomo lili mbu obulamu khubulamu.

¹⁹“Omundu wosi niyakhasalisia owasie, siosi esia yakhaba nakhol'le okhwola sikholwe khuye khandi mbwo.

²⁰Naba nafunaka likumba, elala khumakumba kaake lifunakwe. Naba namubofusia imoni ndala, naye imoni yiye ndala ebofusibwe. Naba natuya eliino ma lirule, elala khumeno kaake lituywe ma lirule. Liosi elia yakhaba nasalisisie owasio n'nalio likholwe khuye singa mbwo.

²¹Wosi owakheera omuruko okhwola akusilanie nende okuli mwoyo, nebutswa wosi owakheera omundu wasie okhwola naye yerwe.

²²Lilako yili lili khwinywe mwesi, khu Baisiraeli nende khubacheni abamenyibwa mwinywe sichila Ise nise OMWAMI Nyasaye wenywe.”

²³Olwa Musa yali naribuye yaka khubandu ba Isiraeli, bahiinia omundu tsana esioba wekambi ma nibamulasa namachina nibamwira. Munjila yiyi abandu ba Isiraeli bakhola ako MWAMI yali nalachile Musa.