Read lunyore ABALAWI 27 Bible Online

ABALAWI 27 - lunyore bible

ABALAWI 27

¹OMWAMI yahelesia Musa

²amalako kano khulwa abandu ba Isiraeli okhurumikhila. Omundu naba nahaanwa khu MWAMI khulwokhuhesia esiesuho esichomekhe, omundu uyo alakhuulwe khulwo okhurunga amapesa kano,

³khusichelo esiahuchil'lwa, omusaatsa owemihika hakari wamakhumi kabili nende emihika amakhumi kasasaba arunge ebitonye amakhumi karano biefetsa.

⁴Ne naba nali omukhasi, arunge ebitonye biefetsa amakhumi kataru.

⁵Naba nali omusiani omuti owemihika chirano okhwola emihika amakhumi kabili, arunge ebitonye amakhumi kabili biefetsa; ne nali omukhaana arunge ebitonye likhumi biefetsa.

⁶Ne naba nali omusiani womwesi mulala okhwola khuwemihika chirano, arunge ebitonye birano biefetsa; ne nali omukhaana arunge ebitonye bitaru biefetsa.

⁷Naba nali omusakhulu owemihika amakhumi kasasaba nende okhuyomba yaho arunge ebitonye likhumi nabirano; ne naba nali omusiele arunge ebitonye likhumi biefetsa.

⁸Omundu owesuha esiesuho yisio naba nali omumanani okhusila oranyala okhurunga esichelo esiahuchil'lwa yisio, alaleera omundu owa yesuhilakhwo khumwesaalisi, ne omwesaalisi alatitiyiakhwo omurungo okhuhelana nende obwomundu uyo anyala okhurunga.

⁹Esiesuho yisio nisiba nisiakhol'lwa khumuruko okuhuchil'lwanga singa omusango khu MWAMI, siesihanwa siosi esileerwanga khu MWAMI nesitsienukhu,

¹⁰ne omundu owakhola esiesuho yisio arasilania omuruko yikwo nende okundi tawe. Niyakhakhola mbwo, kho emiruko chiombi nechio MWAMI.

¹¹Nebutswa esiesuho tsana nisiba nisiakhol'lwa khumuruko kwomusilo, okurahuchil'lwanga singa omusango khu MWAMI, omundu owesuha uyo akuhile khumwesaalisi.

¹²Omwesaalisi alakurakhwo obukusi, okhuhelana nende liba liakwo lilahi nohomba liibi ne obukusi yibwo nibwo obwakharumikhilwa.

¹³Omundu uyo niyakhenya okhukununula, okhwola arunge obukusi yibwo khandi ameetekhwo esitonye siamukhumi kabili khumia ndala.

¹⁴Omundu niyakhahaana inzuye khu MWAMI, omwesaalisi alachela obukusi bwayo okhulondokhana neliuba liomwombokho kwayo omulahi nohomba omubi, ne obukusi obwa yakhahaana nibwo bwonyene obwakharumikhilwa.

¹⁵Ne uyo owali okhuchihaana khu MWAMI niyakhenya okhuchinunula, okhwola arunge obukusi yibwo ma ameetekhwo esitonye siamakhumi kabili khumia ndala.

¹⁶Omundu niyakhahaana esitonye silala khumukundakwe okwayalamilwa khu MWAMI, obukusi bwasio buchelwe okhuhelana nobwinji bwe imwo erakwangamwo, khusichelo siebitonye likhumi biefetsa khubuli eshayiri ehela etsikilo amakhumi kabili.

¹⁷Naba nahaana omukunda yikwo olwa Omuhika Kwa Amakhumi Karano kuba nikuhweyenje butswa, obukusi bwosi burungwe.

¹⁸Naba nakuhaana olunyumakhwo, omwesaalisi alachelania obukusi bwakwo okhuhelana nemihika echiba nichisikaye okhwola khu Muhika kundi kwokhukalusibwa khwemiandu; ma ahaane obukusi bwakwo hasi.

¹⁹Ne omundu owahaana omukunda, niyakhenya okhukununula, okhwola arunge obukusi bwakwo ma ameetekhwo esitonye siamakhumi kabili khumia ndala.

²⁰Naba nakukusia khumundu undi ne narakununula mbelio okhurula khu MWAMI, alakosia obunyali bwokhukununula.

²¹Khu Muhika Kwa Amakhumi Karano okulondakhwo, omukunda yikwo kulaba omwandu kwa Nyasaye inziayo; nakubetsenje okwabesaalisi.

²²Omundu niyakhahana khu MWAMI omukunda okwa yakhaba nakul'le,

²³omwesaalisi alachelania obukusi bwakwo okhuhelana nemihika echiba nichisikaye okhwola khu Muhika Kwa Amakhumi Karano okulondakhwo, ne omundu uyo okhwola arunge obukusi litukhu liene yilio. Amapesa yako nako MWAMI.

²⁴Khu Muhika kwokhukalusibwa khwemiandu, omukunda kulakalusibwa khu owali mwenekwo wokhuranga nohomba khubolwibulo lulwe.

²⁵Obukusi bwosi buhanwe okhuhelana khusichelo esiahuchil'lwa muhekalu.

²⁶Esibulwa siokhuranga khumiruko chiosi nende etsisolo nesio MWAMI, kho omundu wosi arasihanakhwo singa omusango kwokhwehaana tawe. Esimoosi, esimeme sielikondi nende esieimbusi nebio MWAMI;

²⁷nebutswa ebibulwa biokhuranga ebietsisolo etsili etsiomusilo binyala okhununulwa khubukusi obwahuchil'lwa ma okhumeetakhwo esitonye siamakhumi kabili khumia ndala. Nibiranyala okhununulwa, binyala okhukusibwa khubukusi obwahuchil'lwa khumundu undi.

²⁸Omundu wosi arakusia nohomba okhununula esia yahaana kupu khu MWAMI tawe, kata abe omundu, omuruko, nohomba omukunda. Isio nesio MWAMI inziayo.

²⁹Kata omundu owahanwa khu MWAMI kupu sanyala okhununulwa tawe. Okhwola yerwe.

³⁰Esielikhumi khumia ndala khubiamo biosi biomumukunda nesio MWAMI kata bube obuswache nohomba kabe amatunde.

³¹Omundu niyakhenya okhununula silala khubio okhwola arunge obukusi bwahuchil'lwa ma ameetekhwo esitonye siamakhumi kabili khumia ndala.

³²Mulala khubuli emiruko likhumi nokwo MWAMI. Olwe emiruko chiba nichibalwanga, siomuruko kwelikhumi nokwo MWAMI.

³³Omwenechio araloosia emiruko kho mbu echili emibi nichio echiahulwa tawe, kata arakhasilaniakhwo echiahuywe tawe. Niyakhasilania omuruko mulala nende okundi, kho emiruko chiombi nechio MWAMI ne sichinyala okhununulwa tawe.

³⁴Yaka niko amalako ako MWAMI yahelesia Musa nali khusikulu sia Sinai khulwokhukahaana khubandu ba Isiraeli.