Read lunyore ABALAWI 4 Bible Online

ABALAWI 4 - lunyore bible

ABALAWI 4

¹OMWAMI yalaka Musa

²abool'le abandu ba Isiraeli mbu omundu wosi owakhakhola tsimbi nende okhufunaka elala khumalako ko MWAMI sila okhumanyilisia, akhoya okhulonda amalako kano.

³Nikakhaba Omwesaalisi Omukhongo niye okhol'le tsimbi ma aleere esikha khubandu, okhwola ahaane esimoosi esichulukhi esiralikhwo nobulema bwosi, ma asihaane khu MWAMI singa omusango khulwe tsimbi tsitsie.

⁴Aleere echulukhi y'yo habwinjil'lo bwe Liheema liokhubaho khwo MWAMI, are omukhonokwe omusaatsa khumurwe kwayo ma achiir're habwene yaho.

⁵Ma Omwesaalisi Omukhongo uyo abukulekhwo amatsahi kechulukhi y'yo ma yenjile n'nako Mwiheema.

⁶Yeene esitere sisie mumatsahi ma akanyul'lusie imbeli wepasia inzienukhu hali khane nakhataru.

⁷Ma abakhe amatsahi kandi khutsinzika tsiomutsikona tsiolusambwa lwokhusambilakhwo obwali Mwiheema. Alasundula amatsahi kandi kosi hasi holusambwa lwokhusambilakhwo emisango oluli habwinjil'lo bwe Liheema.

⁸Ahiinie esinya yosi okhurula muchulukhi y'yo, esinya eli khubiomunda,

⁹etsisiko tsibili nende esinya yatsio nende aheingurumani eli indahi okhusila.

¹⁰Omwesaalisi alabukula esinya y'yo ma achisambile khulusambwa lwokhusambilakhwo emisango, singa obwa asambanga esinya yemiruko etsiirwanga khulwo omusango kwobuhambani.

¹¹Nebutswa alabukula liseelo liayo, inyama yayo yosi, omurwe kwayo, ebilenje biayo, nende ebiomunda biayo biosi halala nende amala kayo,

¹²ma abihinie esioba wekambi, abihile habundu hatsienulwa khulwo mulukha yikwo, ahelikokhe lisundulwanga, ne habwene yaho alachisambilaho khumul'lo kwetsikhwi.

¹³Nikakhaba mbu abandu ba Isiraeli bosi nibo abakhol'le tsimbi ma baabe nesikha siokhufunaka elala khumalako ko MWAMI sila okhumanyilisia,

¹⁴kho olwetsimbi yitsio tsimanyikhanga, abandu ba Isiraeli baleere esimoosi esichulukhi singa omusango kwetsimbi tsiabwe. Basileere Mwiheema;

¹⁵abemeli babandu balara amakhono kabwe khumurwe kwayo, nayo eler'rwa habwene yaho.

¹⁶Omwesaalisi Omukhongo alabukulakhwo amatsahi malala kechulukhi akahile Mwiheema,

¹⁷yene esitere sisie mumatsahi ma akanyul'lusie imbeli wetsipasia hali khane nakhataru.

¹⁸Alabakha amatsahi kandi khutsinzika tsiomutsikona tsiolusambwa lwokhusambilakhwo obwali mukari mwe Liheema, ma amatsahi kandi kosi asundule hasi holusambwa lwokhusambilakhwo emisango oluli mubwinjil'lo bwe Liheema.

¹⁹Ma abukule esinya yayo yosi ma chisambile khulusambwa.

²⁰Alakhola amatelwa khuchulukhi y'yi singa obwa akholanga khuchulukhi ehanwanga khulwomusango kwetsimbi, ne munjila yiyi alahaana omusango khulwe tsimbi tsiabandu, nabo balalekhelwa.

²¹Ma ebitonye bindi ebisikalanga bihiinibwe esioba wekambi ma Omwesaalisi abisambe singa obwa asambanga omusango okuhanwanga khulwe tsimbi tsitsie omwene. Yiku nomusango kwokhuhiinia tsimbi tsiabandu.

²²Nikakhaba omuruchi niye okhol'le tsimbi ma abe nesikha siokhufunaka elala khumalako ko MWAMI sila okhumanyilisia,

²³kho olwetsimbi yitsio tsimanyikhanga khuye okhwola aleere omusango kweimbusi ekhole erali nobulema bwosi.

²⁴Are omukhonokwe omusaatsa khumurwe kwayo ma achiir're khulubeka lwolusambwa ahemiruko chiemisango emisambe chiir'rwanga. Yiku nomusango okwokhuhinia tsimbi.

²⁵Omwesaalisi yene esitere sisie mumatsahi komuruko yikwo, akabakhe khutsinzika tsine etsiomutsikona tsiolusambwa, ma asundule akandi kosi hasi holusambwa lwokhusambilakhwo emisango.

²⁶Ma alasambila esinya yayo khulusambwa, singa obwa asambanga omuruko okwir're khulwo omusango kwobuhambani. Munjila y'yi, omwesaalisi alahaana omusango khulwe tsimbi tsiomuruchi, ne omuruchi alalekhelwa.

²⁷Nikakhaba nimulala khubandu bandi bosi owakhakhola tsimbi ma abe nesikha siokhufunaka elala khumalako ko MWAMI sila okhumanyilisia,

²⁸kho olwetsimbi yitsio tsimanyikhanga khuye, aleere imbusi esibini erali nobulema bwosi ebe singa omusango kukwe.

²⁹Are omukhonokwe omusaatsa khumurwe kweimbusi tsana ma atsir're khulubeka lwolusambwa ahe emiruko chiemisango emisambe chir'rwanga.

³⁰Omwesaalisi yene esitere sisie mumatsahi komuruko yikwo, akabakhe khutsinzika tsiomutsikona tsiolusambwa, ma asundule akandi kosi hasi wolusambwa lwokhusambilakhwo emisango.

³¹Ma ahiinie esinya yosi eyomuruko yikwo, singa esinya ehinibwanga okhurula mumuruko okwir'rwe khulwo omusango kwobuhambani, ne alakusambila khulusambwa kho kachile okhuhunya khwakwo khuyanzisie OMWAMI. Munjila yiyi omwesaalisi alahaana omusango khulwe tsimbi tsiomundu, naye alalekhelwa.

³²Omundu niyakhaleera likondi singa omusango kwetsimbi okhwola libe likhasi eliralikhwo nobulema bwosi.

³³Are omukhono kukwe omusaatsa khumurwe kwalio ma aliir're khulubeka lwolusambwa ahemiruko chiemisango chiokhusambwa chiir'rwanga.

³⁴Omwesaalisi yene esitere sisie mumatsahi komuruko ma abakhe khutsinzika tsine tsiomutsikona tsiolusambwa ma asundule akandi kosi hasi wolusambwa lwokhusambilakhwo emisango.

³⁵Ma ahiinie esinya yosi eyomuruko yikwo, singa esinya ehinibwanga okhurula mwikondi eliirwanga khulwe emisango chiobuhambani, ne alachisambila khulusambwa halala nebiokhulia ebihanwanga khu MWAMI. Munjila yiyi omwesaalisi alahaana omusango khulwe tsimbi tsiomundu uyo, naye alalekhelwa.