Read lunyore ABALAWI 5 Bible Online

ABALAWI 5 - lunyore bible

ABALAWI 5

¹Okhuhaana emisango chiokhuhinia tsimbi tsienyekhanga mumang'ana singa kano: Omundu wosi niyakhalangwa okhuhaana obukobokheli imbeli wesiina ma asuule okhuhaana obukobokheli khumang'ana akaluutsi nohomba akahuliye ali nesikha ne okhwola anyoole esinyasio.

²Omundu niyakhetsukhila natiila khusindu siomusilo singa omuruko kufwiye nohomba esolo efwiye, alaba owomusilo khandi ali nesikha olwa amanyilisianga esiakhol'le.

³Omundu niyakhetsukhila natiila khusindu siosi esiomusilo okhurula khumundu undi wosi, alaba nesikha olwa amanyilisianga esiakhol'le.

⁴Omundu niyakhesuha sila okhukanakana okhukhola ling'ana liibi nohomba lilahi ali nesikha olwa amanyilisianga esiakhol'le.

⁵Olwomundu yakhaba nesikha okhwola yeyame tsimbi tsitsie,

⁶ne singa omurungo kwetsimbi tsitsie, okhwola ahaane khu MWAMI likondi likhasi nohomba imbusi ikhasi singa omusango. Omwesaalisi alahaana omusango yiku khulwo okhulekhela tsimbi tsiomundu tsana.

⁷Omundu naranyala okhunyoola likondi nohomba imbusi, aleere khu MWAMI, amakhulwi kabili nohomba ebituka b'bili, singa omurungo kwetsimbi tsitsie, elala khulwo omusango kwetsimbi ne elindi khulwo omusango kwokhusambwa.

⁸Okhwola abileer're omwesaalisi, naye nahaane linyonyi liokhuranga khulwo omusango kwetsimbi. Omwesaalisi alafunaka likosi lialio sila okhuhiiniakhwo omurwe kwalio,

⁹ma anyul'lusie amatsahi kalio malala khulubeka lwolusambwa. Ne amatsahi kandi kosi kasundulwe hasi holusambwa. Yiku nomusango kwokhuhiinia tsimbi.

¹⁰Ma ahaane linyonyi liakhabili singa omusango kwokhusambwa okhulondokhana nende amalako. Munjila y'yi omwesaalisi alahaana omusango yiku khulwe tsimbi tsiomundu uyo, naye alalekhelwa.

¹¹Omundu naranyala okhunyoola amakhulwi kabili nohomba ebituka b'bili, kho aleere ekilo ndala yobusie singa omusango kwokhuhiinia tsimbi. Arakhatsukhamwo amafura komuseituni nohomba obwali tawe, sichila nomusango kwokhuhiinia tsimbi ne sikuli omusango kwobuswache tawe.

¹²Alabuleera khumwesaalisi ne omwesaalisi alabufumbarakhwo m'mukhono singa esifwanani okhumanyia mbu bwosi buhanwe khu MWAMI, ma alabusambila khulusambwa singa ebiokhulia ebihanwanga khu MWAMI. Nomusango kwokhuhiinia tsimbi.

¹³Munjila y'yi omwesaalisi alahaana omusango yiku khulwe tsimbi tsiomundu uyo, naye alalekhelwa. Obusie bundi obusikalanga nobwomwesaalisi singa obusikalanga olwomusango kwobuswache kuhanwanga.

¹⁴OMWAMI yahaana amalako kano khu Musa.

¹⁵Omundu niyakhetsukhan'na nakhola tsimbi khulwo okhubula okhuhaana emirungo echiahulwa khulwo MWAMI, alaleera khu MWAMI limiiku nohomba ekhole erali nobulema bwosi ebe singa omusango kwokhurunga ebirarungwa. Obukusi bwelimiiku yilio nohomba ekhole yiyo buchelwe khubukusi obwahuchil'lwa.

¹⁶Okhwola ahaane emirungo echia yabula okhuhaana ma ameetekhwo esitonye siamakhumi kabili khumia ndala. Ahaane omurungo yikwo khumwesaalisi naye omwesaalisi alahaana omuruko tsana singa omusango khulwe tsimbi tsiomundu uyo, naye alalekhelwa.

¹⁷Omundu niyakhetsukhan'na nakhola tsimbi khulwo okhufunaka elala khumalako ko MWAMI, ali nesikha ne okhwola ahaane omurungo kwokhufunaka lilako.

¹⁸Okhwola aleere khumwesaalisi limiiku nohomba ekhole erali nobulema bwosi singa omusango kwokhuhanwa khulwo okhubula okhurunga ebienyekhanga. Obukusi bwomuruko yikwo buchelwe khubukusi obwahuchil'lwa. Omwesaalisi alahaana omusango yikwo khulwe tsimbi tsiomundu uyo, naye alalekhelwa.

¹⁹Nomusango kwokhuhanwa khulwe tsimbi tsiomundu uyo akholeye OMWAMI khulwo okhubula okhurunga ebienyekhanga.