Read lunyore ABALAWI 6 Bible Online

ABALAWI 6 - lunyore bible

ABALAWI 6

¹OMWAMI yahaana amalako kano khu Musa:

²Omusango kuhaanwe khu MWAMI nikali omundu wosi yakhakhola tsimbi khulwo okhusuula okhukabusia siosi esio Muisiraeli wasie aba niyasinga khulwe likobi, nohomba esiaba niyeba okhurula khuye nohomba khulwo okhumukaata,

³nohomba nabehanga mbu esindu tsana siakora ma niyesuha mbu siyasinyoolakhwo tawe.

⁴Omundu niyakhonakhwo khulwokhukhola silala khu bindu biral'lwe yibi, okhwola akalusia siosi esiaba niyanyool'la munjila erali eya habwene,

⁵nohomba esiaba niyesuha mubukaati mbu siyasinyoolakhwo tawe. Litukhu lianyolekha nesikha okhwola arunge mwenesio esindu tsana siosi, ma ameetekhwo esitonye siamakhumi kabili khumia ndala.

⁶Alaleera khu omwesaalisi likondi limiiku eliralikhwo obulema bwosi singa omusango kwokhurunga OMWAMI khusiosi esiayabukula. Obukusi bwalio okhwola buchelwe khubukusi obwahuchil'lwa.

⁷Omwesaalisi yetsa okhuhaana omusango khulwe tsimbi tsiomundu uyo, ne omundu uyo alalekhelwa.

⁸OMWAMI yalaka Musa

⁹okhuhaana amalako kano khu Haruni nende abasiani baabe okhurumikhila khumisango emisambe. Omusango okusambilwe kulekhwe khulusambwa obutukhu bwosi ne omul'lo kurakhasimibwakhwo tawe.

¹⁰Kho Omwesaalisi yebiikhe ekanzoye nende esinyasasie, ma yeeye likokhe elitsokan'nemwo obunolu okhurula khulusambwa ma alire khusibafu siolusambwa.

¹¹Yetsa okhuhiinia tsingubo yitsio ma yebiikhe etsindi ma ahile likokhe yilio esioba wekambi Habundu Hatsienukhu.

¹²Omul'lo okuli khulusambwa okhwola kwatukhe inyinga yosi, kurakhasimibwakhwo tawe. Buli mukamba tsuli omwesaalisi aretsenje tsikhwi khulusambwa ma arekhwo omusango kwokhusambwa ma asambe esinya yomusango kwobuhambani.

¹³Omul'lo okhwola kwatukhenje khulusambwa tsinyinga tsiosi, ne kurakhasimibwakhwo tawe.

¹⁴Kano niko amalako kokhuhaana emisango chiobuswache. Mulala khubesaalisi aleere omusango kwobuswache khu MWAMI imbeli wolusambwa.

¹⁵Ma yetsa okhubukulakhwo obusie mufuusi nende amafura nende obwali obuli khubusie tsana, ma abisambile khulusambwa singa esifwanani mbu bwosi bumal'le okhuhanwa khu MWAMI. Okhuhunya khwesihanwa yisi khuyanzisianga OMWAMI.

¹⁶Abesaalisi betsa okhulia obusikaye bwosi. Obusie bwitsa okhulombwa mwo emikaati etsiratekheywemwo amamela ma tsililwe habundu hatsienukhu, mumukitsi kwe Liheema liokhubaho khwo MWAMI.

¹⁷Kuratekhelwamwo amamela tawe. OMWAMI wasihaana khubesaalisi singa esitonye siabwe siebiokhulia biemisango. Esiakhulia yisi nesitsienukhu, singa esiomusango kwetsimbi nende esiomusango kwokhurunga ebirarungwa.

¹⁸Mumatukhu kosi aketsanga omusiani wosi owolwibulo lwa Haruni anyala okhutsilil'la okhulia esiokhulia yisi singa esitonye siesiokhulia esihaanwanga khu MWAMI. Omundu undi wosi owakhatiila khusiokhulia siomusango yakhasaalisibwa nende obunyali bwobutsienukhu bwasio.

¹⁹OMWAMI yahelesia Musa amalako kano

²⁰khulwa okhwemekha abesaalisi. Litukhu liomwesaalisi aba niyemekhelwe, okhwola ahaane omusango kuno khu MWAMI: ekilo ndala yobusie okhuhelana nesichelo siomusango kwobuswache okuhanwanga bulitukhu, enusu yabwo mukamba tsuli ne enusu esikaye hamukolooba.

²¹Okhwola butsokanibwemwo amafura ma butekhelwe khusichuma ma butubulwe mubitonye ebitititi kho buhanwe singa omusango kwobuswache, okuhunyanga bulahi khulwo okhuyanzisia OMWAMI.

²²Mumatukhu kosi aketsanga omusango yiku okwola kuhanwe nende owolwibulo lwa Haruni okholanga omulimo kwobwesaalisi singa Omwesaalisi Omukhongo, okhwola kusambwe kwosi singa omusango kwokhuhanwa khu MWAMI.

²³Esitonye siosi siomusango kwobuswache okulombwanga nomwesaalisi sirakhalibwakhwo tawe, okhwola siosi sisambwe.

²⁴OMWAMI yalaka Musa

²⁵okhuhelesia Haruni nende abasianibe amalako kano okhurumikhila olwa bahaananga omusango kwetsimbi. Omuruko kwokhuhaana khumusango kwetsimbi kwiir'rwe elubeka lwolusambwa ahemiruko chiokhusambwa chiir'rwanga. Kuno nomusango omutsienukhu okhusila.

²⁶Omwesaalisi ohaananga omusango kwomuruko yiku okhwola akulile habundu hatsienukhu, mumuchitsikwe Liheema liokhubaho khwo MWAMI.

²⁷Omundu wosi nohomba esindu siosi esiakhatila khunyama yomuruko yikwo siakhasaalisibwa nobunyali bwobutsienukhu bwakwo. Nikakhaba amatsahi komuruko yikwo kakharonya khusitonye siosi esieingubo, esitonye yisio sisaabilwe habundu hatsienukhu.

²⁸Indabu yosi eyalongelwa litohi niyakhatekhelwamwo inyama yomuruko yikwo okhwola yaarakwe, ne neli indabu eyalombwa khumukasa netekheywemwo okhwola ekhurwemwo butinyu ma esaabwe namaatsi.

²⁹Omusaatsa wosi mutsinyumba tsiabesaalisi anyala okhulia khumusango yikwo; omusango yikwo nomutsienukhu.

³⁰Nebutswa amalala khumatsahi kakwo nikakhalerwa Mwiheema ma nikakharumikhilwa khumulukha kwokhuhiinia tsimbi, kho omuruko yikwo kurakhalibwa tawe, okhwola kusambwe.