Read lunyore ABALAWI 7 Bible Online

ABALAWI 7 - lunyore bible

ABALAWI 7

¹Kano niko amalako kokhulondwa olwa ohaananga emisango khulwo khubula okhurunga akenyekhanga, echili emitsienukhu.

²Omuruko kwokhuhanwa khumusango yiku okhwola kwiir'rwe elubeka wolusambwa, ahemiruko chiomusango kwokhusambwa chir'rwanga ma amatsahi kakwo kasundulwa khutsimbeka tsine etsiolusambwa.

³Esinya yakwo ehinibwe yosi ma erebwe khulusambwa, mbu: isembe, nende esinya eli khubiomunda,

⁴etsisiko nende esinya yatsio nende aheingurumani eli indahi okhusila.

⁵Omwesaalisi yetsa okhusambila esinya yosi khulusambwa singa omusango kwebiokhulia ebiokhuhaana khu MWAMI.

⁶Omundu wosi owes'siani munyumba tsiabesaalisi anyala okhuchiliakhwo, nebutswa okhwola eliilwe habundu hatsienukhu, sichila neinzienukhu okhusila.

⁷Liliho lilako elala elirumikhanga khukhuhaana omusango kwetsimbi nende khukhuhaana omusango kwokhubula okhurunga ebienyekhanga: inyama neyomwesaalisi obetsanga nahan'ne omusango yikwo.

⁸Liseelo liomusango kwokhusambwa neliomwesaalisi obetsanga nahan'ne omusango yikwo.

⁹Omusango kwosi okwobuswache butekheywe khwichiiko nohomba okutekheywe khusifuria nohomba khusichuma esitekhelwangakhwo emikaati nokwomwesaalisi okuhan'ne khu Nyasaye.

¹⁰Nebutswa omusango kwosi okwobuswache oburatekhelwe, kata nibutsokan'nemwo amafura nohomba obuswache obwomu, nobwabesaalisi bolwibulo lwa Haruni, ne okhwola bakabulane okhuhelana.

¹¹Kano niko amalako akarumikhanga khulwokhuhaana omusango kwobuhambani khu MWAMI.

¹²Omundu niyakhahaana omusango yiku singa omusango kwokhukhupila Nyasaye embwo, ahaane esihanwa siomukaati okuralimwo amamela halala nomusango kwomuruko; kunyala okhuba omuhayila omusiro okutekhelwe khubusie obutsokan'nemwo amafura komuseituni nohomba ebibisikuti ebibakhilwekhwo amafura komuseituni nohomba ekeki elombelwe khubusie obutsokan'nemwo amafura komuseituni.

¹³Okhumeetakhwo, ahaane emihayila chiemikaati etsiratekheywemwo amamela.

¹⁴Alahaana esitonye silala khu buli mukaati singa esihanwa esichomekhe khu MWAMI; esihanwa yisio nesiomwesaalisi obukulanga amatsahi komuruko yikwo nakasundula khulusambwa.

¹⁵Inyama yomuruko okhwola eliibwe litukhu eliehan'nwe singa omusango; erakhasikalakhwo okhwola litukhu lilondakhwo tawe.

¹⁶Omundu niyakhaleera omusango kwobuhambani khulwo okhuhesia esiesuho nohomba esihanwa esiomwene alaliye okhuhaana, inyama yomusango yikwo eliibwe litukhu eliehan'nwe singa omusango, nebutswa eyakhaba nesikaye enyala okhuliibwa litukhu lilondakhwo.

¹⁷Inyama yosi eyakhasikala litukhu liakhataru okhwola esambwe.

¹⁸Inyama iyo niyakhalibwakhwo litukhu liakhataru, Nyasaye siyakhahuchil'la omusango kwomundu uyo tawe. Omusango yikwo sikwakhabalwa omulahi khuye tawe, nebutswa kwakhabukulwa okhuba okwomusilo ne uyo wosi owakhakulia alaba nesikha khandi alahebwa esinyasio.

¹⁹Inyama iyo niyakhetiilakhwo khusindu siosi esiomusilo, erakhalibwakhwo tawe nebutswa esambwe. Omundu omusiiyikhu anyala okhulia khuinyama iyo,

²⁰nebutswa uyo orali omusiiyikhu naliakhwo siyakhabalwa okhuba mulala khubandu ba Nyasaye tawe.

²¹Khandi omundu wosi niyakhaliakhwo inyama yomusango yiku namal'le okhutiila khusindu siomusilo kata nikakhaba nomundu nohomba omuruko, siyakhabalwa okhuba mulala khubandu ba Nyasaye tawe.

²²OMWAMI yahaana amalako kano khu Musa

²³khulwo okhurumikhilwa nende Abaisiraeli. Esinya yeing'ombe nende esinya yelikondi nohomba esinya yeimbusi erakhalibwakhwo tawe.

²⁴Esinya yomuruko okufiye okwene, nohomba eyomuruko okwir'rwe nende esolo, erakhalibwakhwo tawe, nebutswa enyala okhurumikhilwa munjila yindi yosi.

²⁵Omundu wosi owakhaliakhwo esinya yomuruko okwokhuhanwa singa omusango kwebiokhulia khu MWAMI siyakhabalwakhwo khandi singa mulala khubandu ba Nyasaye tawe.

²⁶Habundu hosi ho Muisiraeli aba namenyele arakhanywakhwo amatsahi kamanyonyi nohomba akemiruko singa esiokhulia tawe.

²⁷Omundu wosi owakhafunaka lilako yili salabalwakhwo khandi singa mulala khubandu ba Nyasaye tawe.

²⁸OMWAMI yahaana amalako kano khu Musa

²⁹khulwo okhurumikhilwa nende Abaisiraeli. Omundu wosi niyakhahaana omusango kwobuhambani okhwola aleer're OMWAMI esitonye okhurula khukwo singa esihanwa esichomekhe,

³⁰asileere nasichinjile mumakhono kaake singa omusango kwebiokhulia. Yetsa okhuleera esinya yomuruko halala nende inyama yokhusilifu ma achihaane singa esihanwa esichomekhe khu MWAMI.

³¹Omwesaalisi yetsa okhusambila esinya khulusambwa, nebutswa inyama yokhusilifu neyabesaalisi.

³²Esilenje sieinyuma es'saatsa esiomuruko nesihanwa esichomekhe

³³khumwesaalisi ohaananga amatsahi nende esinya yomusango kwobuhambani.

³⁴Inyama yokhusilifu eyomuruko nesihanwa esichomekhe, ne esilenje sieinyuma es'saatsa nomurungo omuchomekhe okwo MWAMI abukuye okhurula khubandu ba Isiraeli khulwo okhuhelesia abesaalisi. Sino nisio esia Baisiraeli bakwana okhuhelesia abesaalisi amatukhu kosi aketsanga.

³⁵Yisi nisio esitonye silala khubiokhulia esiahanwa khu MWAMI esia Haruni nende abasiani baabe bahebwa khwitukhu eliabemekhelwakhwo okhuba abesaalisi.

³⁶Litukhu yilio OMWAMI yalaka Abaisiraeli okhuhaana esitonye siesihanwa yisi khu Haruni nende abasiani baabe. Yili nelilako elia Baisiraeli bakwana okhulilonda mumatukhu kosi aketsanga.

³⁷Kano niko amalako kokhulonda khukemisango chiokhusambwa, emisango tsiobuswache, emisango tsietsimbi, emisango chiokhuhaana omurungo kwebirarungwa, emisango chiokhwemekhwa nende emisango chiobuhambani.

³⁸OMWAMI yahaana amalako kano khu Musa nali khusikulu sia Sinai, litukhu elia yabool'la Abaisiraeli okhuhaana emisango khu MWAMI nibali musitsiimi.