Read lunyore ABALAWI 9 Bible Online

ABALAWI 9 - lunyore bible

ABALAWI 9

¹Litukhu elialondakhwo, omulukha kwokhwemekhwa nikuhweye, Musa yalanga Haruni nende abasiani baabe, halala nabemeli ba Baisiraeli.

²Yabool'la Haruni mbu, “Bukula esimoosi esichulukhi nende limiiku eliralikhwo nobulema bwosi tawe ma obihaane singa omusango khu MWAMI. Ohaane esimoosi singa omusango kwetsimbi ne limiiku singa omusango kwokhusambwa.

³Ma obool'le Abaisiraeli babukule imbusi ekhole khulwo musango kwetsimbi, esimoosi siomuhika mulala nende esimeme sielikondi siomuhika mulala ebibulakhwo obulema bwosi khulwokhuhaana omusango kwokhusambwa,

⁴khandi echulukhi nende limiiku khulwo omusango kwobuhambani. Babihaane singa omusango khu MWAMI, halala nende omusango kwobuswache nikutsokan'nemwo amafura. Okhwola bakhole yaka sichila OMWAMI yetsa okhulolekha khu Baisiraeli olwaleelo.”

⁵Abaisiraeli baleera ebindu bia Musa yabalaka imbeli we Liheema ma omukanda kwa Baisiraeli bosi nikwebunjikha habwene yaho khulwo khwekayakaya OMWAMI.

⁶Musa naboola mbu, “OMWAMI umulachile okhukhola yaka kho obulafu bubwe obwakhanga nibumanyianga okhubaho khukhwe bulolekhe khu inywe.”

⁷Ma Musa nabool'la Haruni mbu, “Tsia khulusambwa ma ohaane omusango kwetsimbi nende omusango kwokhusambwa khulwo khuhiniaho tsimbi tsitsio nende tsimbi tsiabandu. Ohaane omusango yiku khulwo okhuhiinia tsimbi tsiabandu bosi, singa obwo MWAMI yalaka kakholwe.”

⁸Haruni yatsia halusambwa ma niyeera esimoosi esichulukhi esiali omusango kwetsimbi tsitsie omwene.

⁹Abasiani baabe nibamuleer'ra amatsahi kasio ma niyeenamwo esitere sisie ma nabakha malala khutsinzika tsiomutsikona tsiolusambwa, ma nasundula akasikala hasi holusambwa.

¹⁰Ma nasambila khulusambwa esinya, etsisiko tsibili nende aheingurumani eli indahi okhusila, singa obwo MWAMI yali niyalaka Musa kakholwe.

¹¹Nebutswa nasambila inyama yasio nende liseelo liasio esioba wekambi.

¹²Haruni yeera omuruko okwali singa omusango kukwe okwokhusambwa. Abasiani baabe nibamuleer'ra amatsahi kakwo ne nakasundula khutsimbeka tsine etsiolusambwa.

¹³Bamuhelesia omurwe kwakwo nende ebitonye bindi biomuruko tsana ma nabisambila khulusambwa.

¹⁴Ma nasaaba ebiomunda khandi nasaaba ebilenje bieinyuma ma nabisambila khulusambwa ikulu womusango kwokhusambwa okwali nikusikaye.

¹⁵Namal'le okhukhola yaka, Haruni yahaana emisango chiabandu bandi bosi. Yabukula imbusi yokhuhaana khumusango kwetsimbi tsiabandu, nachiira ma nahaana omusango yikwo singa obwa yali nahan'ne omusango kukwe kwetsimbi.

¹⁶Khandi naleera omuruko kwomusango kwokhusambwa ma nakuhaana singa obwa amalako kaboolanga.

¹⁷Khandi nahaana omusango kwobuswache ma nabukulakhwo obusie mufuusi ma nabusambila khulusambwa okhumeeta khumusango kwokhusambwa kwa bulitukhu.

¹⁸Yeera echulukhi nende limiiku singa omusango kwobuhambani khubandu. Abasiani baabe nibamuleer'ra amatsahi ma nasundula khutsimbeka tsine tsiosi etsiolusambwa.

¹⁹Haruni yabukula ebitonye biesinya yechulukhi nende ebitonye biesinya yelimiiku

²⁰nabira ikulu weinyama yokhusilifu yomuruko ma nabichinga biosi nabira khulusambwa. Nasambila esinya khulusambwa.

²¹Ma nahaana inyama yokhusilifu nende ebinama bieinyuma ebiomukhono omusaatsa singa esihanwa esichomekhe khu MWAMI khulwokhuhaana khubesaalisi singa obwa Musa yalaka kakholwe.

²²Olwa Haruni yali namal'le okhuhaana emisango chiosi, yachingula amakhono kaake khulwo okhulaamila abandu tsikhabi ma niyekha hasi okhurula aholusambwa lwali.

²³Musa nende Haruni benjila Mwiheema, ne olwa barulamwo, balaamila abandu tsikhabi ne okhwakha khwobulafu obumanyianga okhubaho khwo MWAMI bwalolekha khubandu bosi.

²⁴Matetekhana OMWAMI naruma omul'lo, ma nikulia omusango kwokhusambwa nende ebitonye biesinya ebiali khulusambwa. Olwabandu balola yaka, bakhupa liyoka ma nibenamia emirwe chiabwe hasi khulwokhuhaana oluyali.