Read lunyore YEREMIA 10 Bible Online

YEREMIA 10 - lunyore bible

YEREMIA 10

¹Abandu ba Isiraeli, hulile amang'ana ko MWAMI ali n'nako khwinywe.

²OMWAMI aboolanga mbu, “Muralonda amang'ana ka betsimbia tsindi tawe; kata muranyakhana mumakani khulwo okhulola ebindi birang'ayile mwikulu, kata nikali abandu betsimbia tsindi barisibubwa n'nabio.

³Tsifwo tsiabandu yaba tsibula obukhala; baremakanga omusaala okhurula mumutsuru, ma kubaatswa nomubaatsi wetsimbao.

⁴Bakusiayangakhwo efetsa nende etsahabu. Bakukhupilangakhwo emisimali khulwo khukutila kho kulekhe khukwa.

⁵Ebiniini biabaatswa yibio bifwana okusaala okwabikhwa tsingubo etsiarandukha, okwarebwa mumukunda kwamatunda khulwokhurisia; ebiniini yibio sibinyala okhul'loma tawe, khandi okhwola bikingwe sichila sibinyala okhuchenda tawe. Orabba omuri khubio tawe; sibili ebinyala khusalisia tawe, khandi sibinyala khukhonyakhwo esindi tawe.”

⁶OMWAMI, abulaho omundu singa ibe. Oli nobunyali obukhongo, ne eliira lilio nelikhongo khandi eliobunyali.

⁷Niwina orakhakhuha oluyali ibe, omuruchi wamahanga kosi? Okhoyele okhuhebwa oluyali, abulaho ofwana ibe mubandu bosi abachesi abomumahanga, nohomba kata mubaruchi babwe.

⁸Bosi nabahingwa khandi nebitutsi. Nisina esiabakheka okhurula khubiniini ebiabaatswa khumisaala?

⁹Ebiniini biabwe biarebwakhwo etsahabu okhurula Esipania, ne efetsa okhurula Ufasi, ikwo kwosi nomulimo kwabasitsa bwokhungola; bebiikhile tsingubo etsisaokan'nemwo obwakhanyu nende obusembe, etsianabwa nabasitsa bobunabi bwobuusi.

¹⁰Nebutswa ibe, OMWAMI, oli Nyasaye watooto, ibe oli Nyasaye oli mwoyo khandi oli omuruchi weinziayo. Noli nelirima, ne esibala sitechela; abetsimbia sibanyala okhwefwila okhulinda lirima lilio tawe.

¹¹(Inywe mukhoyele okhubabool'la mbu, abanyasaye abaraalomba esibala nende likulu betsa okhumululwa. Sibakhamenyekhwo habundu handi hosi musibala tawe.)

¹²OMWAMI yalomba esibala khulwobunyali bubwe; khulwo obuchesi bubwe yalomba esibala ma nabambula likulu.

¹³Olwa ahaananga lilako ne amaatsi akali mwikulu kahoola; aleeranga amalumbesi okhurula khundulo khwesibala. Alombanga olweni okhwatukha mufula, ma aruma omuyeka okhurula munyumba yelibikhilo lilie.

¹⁴Abandu nibalolakhwo yibi, ne bakwa ebihingwa nende okhubula okhumanyilisia. Yabo ababaatsanga ebiniini baba netsisoni, sichila abanyasaye babalomba sibali abatooto tawe khandi babula obulamu.

¹⁵Abanyasaye yabo babula obukhala ne kakhoyele bachaaywe; bakhamululwe olwo MWAMI yakhetse okhumanyilisia akabwe.

¹⁶Nyasaye wa Yakobo safwana n'nabo tawe, ye niye owali khulomba buli sindu, ma wamala okhwahula Isiraeli okhuba abandu baabe omwene. OMWAMI Wokhunyala Biosi nilio eliira lilie.

¹⁷Abandu ba Yerusalemu mumal'le okhufumbilwa nabasuku! Bunjelesie ebindu bienywe biosi.

¹⁸OMWAMI yetsa okhumukhunga okhurula musibala muno; yetsa okhumumuma ma omundu wosi sinasikalekhwoho tawe. OMWAMI umal'le okhuboola.

¹⁹Abandu ba Yerusalemu balakaya niboola mbu, “Mako obwakhuli musibi khulwokhusalila! Amafumire kefwe sinakahone tawe. Ne khwapaal'lenje mbu kano namang'ana akakhunyala okhwefwila!

²⁰Amaheema kefwe karanduywe; emikoye echiakatiila chikatukhile. Abaana befwe batsiye ehale, abulaho osikaye onyala okhusinjisia amaheema kefwe khandi; abulaho onyala okhusunga etsipasia.”

²¹Ma ningalusia, “Abemeli befwe nabahingwa; sibareebanga OMWAMI akabanyala khukhola tawe. Yaka niko akachil'le nibarahindila, ma abandu befwe basalaniibwe.

²²Hulile! Amang'ana kakhetsa! Khuli neliyoka likali eliruliye mwihanga liesinyolu; abasikari balio betsa khukalukhania amatookho ka Yuda okhukwa esitsiimi, habundu ahebibwe bimenyanga.”

²³OMWAMI, manyile mbu sialiho omundu oli nobunyali khukesihesi sisie tawe. Abulaho oli nobunyali khubulamu bubwe tawe.

²⁴OMWAMI, kol'losia abandu baabo; nebutswa orabba omululu khu ifwe okhusila tawe, kata orakhuha esinyasio noli nelirima tawe; yako kakhachila khwafwa fwesi pe.

²⁵Ohenjie lirima lilio khubetsimbia abarakhwekayakayanga, nende khubandu abakhusuula. Bayira abandu baabo; bakhukhuya ifwe fwesi pe, ma balekha esibala siefwe nisiasasikha.