Read lunyore YEREMIA 11 Bible Online

YEREMIA 11 - lunyore bible

YEREMIA 11

¹OMWAMI yabool'la Yeremia mbu,

²“Hulila amang'ana ke Indakano yino. Bool'la abandu ba Yuda nende Yerusalemu

³mbu ise OMWAMI Nyasaye wa Isiraeli nambikhe esilaamo khumundu wosi oralondanga amalako ke Indakano.

⁴Ne indakano eyandalomba nende abakuka benywe olwa ndabahinia Emisiri, esibala esiali nisifwana khubo singa lijiko eliayia pa. Ndali okhubabool'la balonde amalako kanje nende okhuhesia kosi akandabalaka. Ndali okhubabool'la mbu nibalonda amalako kanje, bakhaba abandu banje nase ndakhaba Nyasaye wabwe.

⁵Kho nilwo olwa ndakhahesia lisubisio eliandali okhulaka abakuka babwe mbu ndakhabahelesie esibala siobuhinda nende liloba linolu eliabali n'nalio luno.” Nase nimboola mbe, “Yee OMWAMI.”

⁶Ma OMWAMI niyambool'la mbu, “Tsia khumatookho ka Yuda nende khumihanda chia Yerusalemu. Olandie amang'ana kanje ebwene yiyo ma obool'le abandu bahulile khukamalakoke Indakano ma bakalonde.

⁷Olwa ndahinia abakuka babwe okhurula Emisiri, ndali okhubesuhila khulwokhubachetsiyia balonde amalako kanje, ma ndatsilil'la okhuchetsiyia abandu banje okhwola litukhu liolwalelo.

⁸Nebutswa sibahulila khuko tawe kata okhukalonda tawe. Nikarali, buli mundu yatsilil'la okhuba nesikala marwi nende okhuba omubi singa yanala. Ndali okhubalaka okhulinda Indakano, nebutswa bali okhusuula. Kho ndamala nimbaler'ra ebinyasio ebiahandikwa mu ndakano yiyo.”

⁹Ma OMWAMI niyambool'la mbu, “Abandu ba Yuda nende Yerusalemu baloosianga masilisi okhuufukula.

¹⁰Bamal'le okhukalukha okhukhola tsimbi tsia bakuka babwe, abali okhusuula okhukhola aka ndababool'langa; bekayakayanga abanyasaye bandi. Isiraeli nende Yuda bafunaka indakano yandalomba nende abakuka babwe.

¹¹Kho luno, Ise, OMWAMI mbamanyianga mbu nzia okhuleera likhupako khubo ne abulaho owanohonokokhe. Ne nibalakaya khu ise khulwo khubakhonya sinzia khuhuyia khumalakayo kabwe tawe.

¹²Kho abandu ba Yuda nende Yerusalemu nabatsie khubanyasaye ababahaanangakhwo emisango, ma betsa okhubalakayila nibareebanga obukhonyi. Nebutswa abanyasaye yabo sibakhanyala okhubahonia olwe likhupako yilio liakhetsa tawe.

¹³Abandu ba Yuda bali butswa nabanyasaye abenji singa amatookho kabali n'nako, ne abandu bamenya Yerusalemu nabo bayombokha tsisambwa tsinyinji khulwo okhuhan'nakhwo emisango khunyasaye wa Baali wesisinyo singa emihanda tsili mwitookho yimwo.

¹⁴Yeremia orasaaya khu ise tawe, kata orabareebela obulekheli okhurula khu ise tawe. Olwa nababe mumanyakhano ma nabareebe okhubakhonya, sinambuyie khumang'ana kabwe tawe.”

¹⁵OMWAMI yaboola mbu, “Abandu bandayanza bakholanga amang'ana amabi. Nakaliena akachila babe mu Hekalu yanje? Bapaalanga banyala okhwikal'la amatinyu khulwo khwesuha nende khulwokhuhaana emisango chiemiruko? Yako kakhabakhola basangale?

¹⁶Litukhu lindi ndali okhubalanga omusaala kwomuseituni okwanera khandi okwama amatunda amenji amalahi; nebutswa luno, nimbukumanga singa ikhupa nzia okhuhambia omul'lo mumasafu kakwo khandi funake tsisaka tsiakwo.

¹⁷“Ise, OMWAMI Wokhunyala Biosi, ndali okhuraaka, Isiraeli nende Yuda; nebutswa luno mwekhananga namang'ana kokhubamuma. Abene beyeler'ra yaka sichila bayona; baikhola okhuba nelirima olwa bahaananga emisango khu Baali.”

¹⁸OMWAMI yali khumbool'la akobusiemani obwabasuku banje bali nibaloosianga okhunzira.

¹⁹Ndali singa likondi lisubilwa elihilwanga esioba okhwirwa, ne sindamanyanga mbu nise owabali nibaloosianga okhukhol'la amang'ana amabi tawe. Baboolanga mbu, “Chenda khuremake omusaala nikusilikhwo amatunde. Chenda khumwire kho omundu alalekhe khumwitsul'lakhwo khandi tawe.”

²⁰Kho ndamala nisaaya nimboola mbu, “OMWAMI Wokhunyala Biosi, ibe oli omukhalachi okhalakanga akahabwene; oteemanga amapaalo kabandu nende tsinganakani tsiabwe. Reye amanyakhano kanje mumakhono kaako, kho lekha ise ndole singa obwobanzanga es'sialia khubandu yaba.”

²¹Abandu ba Anatsotsi benya ise nzirwe, ma bali khumbool'la mbu nabanzire nikali ndakhatsilil'la okhukamba amang'ana ko MWAMI.

²²Kho OMWAMI Wokhunyala Biosi naboola mbu, “Nzia okhubahelesia esinyasio! Abasiani babwe ababuukha naber'rwe mwihe; abaana babwe nafwe khulwe inzala.

²³Ndaamala okhurechekha litukhu liokhuleera okhufwa khubandu ba Anatsotsi, ne olwe litukhu yilio liakhole, abulaho owakhahonokokhe.”