Read lunyore YEREMIA 12 Bible Online

YEREMIA 12 - lunyore bible

YEREMIA 12

¹OMWAMI, ibe obetsanga owatooto khasotso, olwa nderanga amang'ana komuse kwanje imbeliwo. Kata mbwo ndakhekomba okhul'loma n'nawe khumang'ana kobulunji: Nisina esichilanga emilimo chiabandu babi nichikaasa okhusila? Nisina esichilanga abandu abarali abasubilwa nibamenya mubwale?

²Ibe obasimikhanga, ma bahila emisi hasi; ma bakhula nende okhwama amatunda. Bakhul'lomangakhwo bulahi, nikarali sibakhubukulanga mwo obuha tawe.

³Nebutswa ibe waimanya ise OMWAMI, ololanga akakholanga, khandi wamanya singa ndakhuyanza. Sukuma abandu ababi yaba ehale singa likondi liokhwirwa obalinde okhwola olwe inyinga yabwe eyokhwirwa yoola.

⁴Esibala nasitsilil'le okhwoma khulwoluhono sina? Ne bunyasi bwomumikunda nabuniale okhwola lina? Tsinyama nende amanyonyi bifitsanga khulwo bubi bwabandu befwe. Okhumeetakhwo abandu yaba ababoolanga mbu, “Nyasaye sialolanga esiakhukholanga tawe.”

⁵OMWAMI yaboola mbu, “Yeremia, niwakhachonya khulwokhupiemana nabandu, kho wakhapiemana mbwena netsisululi? Nikali sioli kata owakhasinjilakhwo musibala siobweyangu tawe, kho wakhanyala mbwena musibala siemitsuru tsia Yorodani?

⁶Kata abasiani benywe, abali abeinyumba yenywe bamala okhukhusiemana, bahambananga nende abandu abakhulwananga ibe; orabbasubila tawe, kata nikali bal'lomanga amang'ana kobulina.”

⁷OMWAMI yaboola mbu, “Ndamala okhukhupa Isiraeli omukongo; ise ndasuula Lihanga elia ndahula. Ndamala khuhaana abandu bandayanza mumakhono kabasuku babwe.

⁸Abandu abandahula bamal'le okhungalukhana; singa esimba eli muutsuru baikhasila ise, khulwe yako ndabasinyikhila.

⁹Abandu ba ndahula bafwana linyonyi, eliser'rwe tsimbeka tsiosi namakhongotsa. Lange tsinyama nabulimo tsitse okhulia lisabo!

¹⁰Abaami abenji betsinzibulo tsindi bononisie omukunda kwanje kwe misabibu, baseneye omukunda kwanje hasi, bakalukhanisie omukunda kwanje omulahi okhuba esitsiimi.

¹¹Bakukhol'le okhukwa esitsiimi, kwamenya kwonyene likunda imbeli wanje. Omukunda kwosi kwakalukhana okhukwa esitsiimi, abulaho okuhendelanga tawe.

¹²Khubikulu biosi ebili musitsiimi, abasaatsa betsele okhubiyaaka. Rumile abasikari okhukhuya esibala siosi; abulaho owitsa okhumenya mumulembe.

¹³Abandu banje baraaka ingano, ne nibachesa libanze; batiya butinyu ne sibulakhwo esiabanyoola tawe. Khulwe lirima lianje likali, ebiraakwa biabwe biafwa.”

¹⁴OMWAMI yaboola mbu, “Ise ndi nende esianyala khuboola khubarende benywe abamal'le okhukhuya esibala esia ndahelesia abandu banje ba Isiraeli. Nzia okhuhiinia abandu babi yabo musibala siabwe singa omumela kwihilwe, ma soole Yuda okhurula khubo.

¹⁵Ne nimal'le okhubahila ehale nambabeele tsimbabasi, nandeere buli lihanga mumaloba kalio khandi musibala sialio.

¹⁶Nikakhaba bakhahuchil'la mumioyo chiabwe chiosi mbu bakhalonda amalako kabandu banje ma khandi nibesuha muliira lianje mbu, ‘Oluhono lwo MWAMI ali mwoyo’, singa obwa bali nibekesia abandu banje okhwesuha eliira lia Baali — kho nabo khandi bakhaba balala khubomukanda kwabandu banje ma nibanyoola amalahi.

¹⁷Nebutswa lihanga liosi niliakhasuula okhulonda amalako kanje, kho ndakhaliiya liosi nemisi ma ndikhuye. Ise, OMWAMI mal'le okhuboola.”