Read lunyore YEREMIA 13 Bible Online

YEREMIA 13 - lunyore bible

YEREMIA 13

¹OMWAMI yaaruma okhutsia okhukula esilwali sialombwa khungubo yekatani ma ndebiikhe; nebutswa yambool'la rakhasirakhwo mumaatsi tawe.

²Kho ndamala ningula esilwali ma nindebiikha.

³Kho OMWAMI yamala niyambool'la khandi mbu,

⁴“Tsia khumuchela kwa Efurate ma obise esilwali mubuko bwolwanda.”

⁵Kho ndamala ninzia okhubisa esilwali yisio ahembi nomuchela kwa Efurate.

⁶Olunyuma lwamatukhu nalebe OMWAMI yaaruma okhukalukha khumuchela kwa Efurate okhwenda esilwali.

⁷Kho ndakalukha, ne olwa ndoola habundu handali khubisa esilwali, ndanyoola esilwali yisio siarandukha, khandi sisiahenganga bulahi tawe.

⁸Kho OMWAMI nal'loma n'nase khandi niyambool'la mbu,

⁹“Nimbwo ise ndakhononie omwekhonyo kwa Yuda nende omwekhonyo omukali kwa Yerusalemu.

¹⁰Abandu ababi yaba basuuye okhulonda amalako kanje. Bali nesikala marwi khandi nababi singa babetsanga khasotso, bekayakayanga nende okhurumikhila abanyasaye bandi. Kho nabafwane singa esilwali yisi esirali esilahi khandi tawe.

¹¹Singa obwesilwali sitilanga musienje butinyu, kho ndekombanga abandu ba Isiraeli bosi nende Yuda bahande khu ise butinyu. Khol'le mbu kho babe abandu banje, kho babe abanyala okhwitsoomia eliira lianje nende okhulihelesia oluyali; nebutswa sibenyanga okhulonda amalako kanje tawe.”

¹²OMWAMI Nyasaye yambool'la mbu, “Yeremia, bool'la abandu ba Isiraeli mbu buli esimuka siewaini yitsusibwemwo ewaini. Betsa okhukalusia mbu bamanya buli esimuka siewaini okhwola sitsusibwemwo ewaini.

¹³Kho obabool'le mbu Ise, OMWAMI nzia okhunywesia abandu bomusibala muno ewaini okhwola olwa bameela. Nzia okhunywesia abaruchi, abali abolwibulo lwa Daudi, halala nabesaalisi, nabaroobi nende abandu ba Yerusalemu bosi.

¹⁴Ma nzia okhubatubula singa esimuka sietuyan'ne nesindi, abandu bakhulundu kata nende ababuukha balaba esindu silala. Tsimbabasi nohomba esirenda sinabinzikal'le okhubeera tawe.”

¹⁵Abandu ba Isiraeli, OMWAMI umal'le okhul'loma! Mube abetutuyi ma mulonde amalako kaake.

¹⁶Muhaane oluyali khu MWAMI Nyasaye wenywe, nasili okhumuleer'ra esiilima ma mwesikar're khubikulu, nasiili okhukalukhania obulafu bwamwekombanga khunyoola okhukwa esilima esimwamu t'ti.

¹⁷Nimuba nimurakhahulila tawe, nandakaye mukhwebisa khulwa omwekhonyo kwenywe. Nandakaye bululu ne amasika kanje nikaraatsa, sichila abandu bo MWAMI bahil'lwe ehale singa abasumba.

¹⁸OMWAMI niyambool'la mbu, “Bool'la omuruchi nende nyinawe barule khu indebe yobwami sichila olusimbi lwabwe elweing'ono lukwiye okhurula khumirwe chiabwe.

¹⁹Amataala ka Yuda akali elubeka lwenandete kafumbiywe nabasuku; sialiho onyala okhubira yole khuko tawe. Abandu ba Yuda bosi batil'lwe okhuhilwa mubuhambe ehale.”

²⁰Yerusalemu, lola! Abasuku benywe betsanga okhurula esinyolu! Abandu bawahebwa khulinda bali hena? Abandu bawali khwekhoyelanga bali hena?

²¹Noboole mbwena olwabandu abawapaalanga nabalina baabo nabakhuleke ma nabakhuruke? Nobe nokhutsunwa singa omukhasi oli neinumwa.

²²Noba niwakhereeba esichilanga yaka kosi nikekholekha khuibe, mbu esichil'le tsingubo tsitsio nitsirandulwa ma khandi esichil'le nohakibwa okhukholwa omukhasi netsingufu, - kali sichila tsimbi tsitsio netsingali okhusila.

²³Mbula omundu omumwamu yakhanyala okhukalukhania likhoba lielikondo lilie? Kata ingwe nayo yakhakalukhaniakhwo amakondokondo akali khwikhoba liayo noho? Nikakhanyalikha, kho inywe abakholanga amang'ana kosi amabi munyala okhweka okhukhola akali amalahi.

²⁴OMWAMI yetsa okhumusalania singa omukhuutsi okhuhilwanga nomuyeka kwomusitsiimi.

²⁵OMWAMI ubooye yaka niko akakhekholekhe khwinywe. Yaka niko akakhalachile okhumukhol'la sichila mwamukhupa omukongo ma musubilanga mubanyasaye bobubehi.

²⁶OMWAMI mwene namunabuule tsingubo ma nabakale es'simba murwe sienywe esioba.

²⁷Walola nimukholanga ebindu ebiamusinya. Wamulola inywe nimutsitsanga okhwekayakaya abanyasaye ababanasibala mubikulu nende mubikuuri, singa obwomundu musaatsa yekombanga omukhasi wowasie nohomba singa esululi isaatsa eyenyanga okhuruuma. Mulitsiboolelwa inywe abandu ba Yerusalemu! Nilina olwa mwakhabekhwo abasiiyikhu?