Read lunyore YEREMIA 14 Bible Online

YEREMIA 14 - lunyore bible

YEREMIA 14

¹OMWAMI yambool'la amang'ana kesimi kano:

²“Yuda yekhulanga! Amatookho kalio kafwitsanga, abandu bamwo bakon'ne hasi khulwesibeela, ne Yerusalemu elakayanga niyenya obukhonyi.

³Abandu abahinda barumanga abakholi babwe okhwenda amaatsi; batsitsanga mumayabo kamaatsi, nebutswa sibanyoolanga mwoamaatsi tawe; bakalukhanga netsisongo tsiabwe nitsialamile; khulwo khufwa emioyo nende okhukoyana babisanga obweni bwabwe.

⁴Sichila ifula sieliho tawe, ne liloba liayoma kaa, abalimi babeeleye mumioyo chiabwe; babisanga obweni bwabwe.

⁵Esichusu esikhasi siebala omwana wasibuye omutoro musikuuri, sichila obulimo sibuliho tawe.

⁶Etsipunda tsiomubulimo tsisinjila khubutenje bwebikulu, tsikamul'langa emiiya singa ebibwe; tsimoni tsiatsio sitsilolanga bulahi tawe, sichila tsibula ebiokhulia.

⁷Abandu banje bandakayila butinyu nibaboola mbu, ‘Kata nikali tsimbi tsiefwe tsikhufwilanga ifwe, khukhonye OMWAMI singa wakhusubisia. Khwakhukhupa omukongo ali akhenji; khwayona imbeli uwo.

⁸Niwe owa Isiraeli ehengangakhwo wenyene, niwe wenyene onyala okhukhuhonia okhurula mumanyakhano. Busina ofwana omucheni musibala siefwe, khandi singa omubiri oukonanga litukhu elala?

⁹Esichilanga nofwana omundu omung'ang'alu, khandi singa omusikari orali netsingufu tsiokhukhonya nisina? Akatooto, OMWAMI oli halala n'nefwe! Khuli abandu baabo, orakhukhupa omukongo tawe.’ ”

¹⁰OMWAMI yaboola khukabandu yaba mbu, “Bayanza okhwilukha okhurula khu ise, ne sibali abanyala okhwekaya tawe. Kho sinyanzisibwanga n'nabo tawe. Nanzitsul'le amabi kabakholanga ma nambahelesie esinyasio khulwe tsimbi tsiabwe.”

¹¹OMWAMI niyambool'la mbu, “Orakhaareeba okhukhonya abandu yaba tawe.

¹²Kata nibakhahonga okhulia, sinzia okhuhuyia khukobulakayi bwokhwenya obukhonyi tawe; kata nibakhambelesia emisango chiokhusambwa nende emisango chiobuswache, namber're mwihe nende munzala nende mubulwaye.”

¹³Ma nase nimboola mbu, “OMWAMI Nyasaye, umanyile mbu abaroobi babool'langa abandu mbu lihe sinalibekhwoho, nohomba inzala tawe, sichila wabasubisia, mbu omulembe kwonyene nakube musibala siefwe.”

¹⁴Nebutswa OMWAMI nakalusia naboola mbu, “Abaroobi barumikhilanga eliira lianje khulwokhuboola obubehi; sindali khubaruma kata okhubalaka nohomba kata okhul'loma khubo ling'ana liosi tawe. Akamabisulo kabal'lomangakhwo sikarulanga khu ise tawe; akabaroobanga okhwekhola kabula obukhala, nakabene bapaalanga mumioyo chiabwe.

¹⁵Ise, OMWAMI nzia okhukhubool'la akanzia okhukhola khubaroobi baraaruma nebutswa bal'lomanga muliira lianje khulwo khuboola mbu lihe nende inzala sinabibe musibala sino tawe. Namber're mwihe nomunzala.

¹⁶Abandu bababool'la amang'ana yaka nabo khandi nabeerwe munjila ndelwa yiyo. Emilambo chiabwe nachifuubwe esioba mimihanda chia Yerusalemu ne sialiho owakhayabile emibili yichio tawe. Yaka kakhekholekhe khubandu bosi nibalimwo abakhasi babwe, abasiani babwe nende abakhaana babwe. Nambarungie khulwe tsimbi tsiabwe.”

¹⁷OMWAMI yali okhundaka okhubool'la abandu khuko khubeleela khwanje mbu: “Amasika karatsanga mutsimoni tsianje om'basu nobutukhu, ralekha okhulakaya tawe, sichila abandu banje banyooye lifumire likali, ma basaliye okhusila.

¹⁸Olwa nzitsanga esioba mumikunda; ndolanga emibili chiabasaatsa bereywe mwihe; olwa nzitsanga mumataala, ndolanga abandu nibafwitsanga khulwe inzala. Abaroobi nende abesaalisi batsilil'langa nomulimo kwabwe, nebutswa sibamanyilisianga esiabakholanga tawe.”

¹⁹OMWAMI, ibe wasuula Yuda khulwe likali noho? Ibe wasinyikhila abandu ba Sayuni noho? Esiachila nokhusalisia okhusila ma kata sikhuli abanyala khuhona, nisina? Khurunanga omulembe nebutswa sikhunyoolanga amalahi tawe. Khwekomba okhuhona, nebutswa oburi obukali nibwo obwetsa musilenje siokhuhona.

²⁰Khwayona imbeli uwo, OMWAMI; khweyamanga tsimbi tsiefwe nende tsimbi tsiabakuka befwe.

²¹Witsul'le lisubisio lilio ne orakhuchaaya tawe. Oraleera es'simba murwe khu Yerusalemu habundu holuruba lwobukhongo tawe. Orakhafunaka indakano yawalomba n'nefwe tawe.

²²Sibulaho kata silala khubiniini bia betsimbia esiakhalera ifula; likulu khubwalio siliakhalomba ifula okhukwa tawe. Ifwe khwara obusubili bwefwe mu ibe, E OMWAMI Nyasaye wefwe, sichila niwe okholanga ebindu yibi.