Read lunyore YEREMIA 15 Bible Online

YEREMIA 15 - lunyore bible

YEREMIA 15

¹Ma OMWAMI niyambool'la mbu, “Kata kalaba Musa nende Samweli baali nibasinjiye hano nibamombanga, sindakhamanyisiekhwo abandu yaba aketsimbabasi tawe. Bakhunge okhurula mutsimoni tsianje, batsie ehale.

²Nibakhakhureeba, nihena ahabanyala okhutsia, obabool'le, kano niko ise mbooye: Abalala bakhalachiywe okhufwa okhurula khubulwaye; yaho niho ahanabatsie! Abandi bakhalachiywe okhufwila mwihe; yaho niho aha nabatsie! Abandi bakhalakiywe okhufwa khulwe inzala; yaho niho aha nabatsie! Abandi bakhalachiywe okhuhilwa mububohe; yaho niho aha nabatsie!

³Ise OMWAMI mal'le okhukhala ebindu bine ebibi ebiakhekholekhe khubo: naber'rwe mwihe; emibili chiabwe nachikhweswe netsimbwa; amanyonyi nakachilie, ne tsinyama nabulimo natsilie esianasibe nisisikaye.

⁴Nakhole abandu bosi bomusibala okhuba noburi obukali khubo khulwa amang'ana ka Hesekia omusiani wa Manase yakhola mu Yerusalemu olwa yali nali omuruchi wa Yuda.”

⁵OMWAMI aboolanga mbu, “Niwina onyala okhumubelel'la, inywe abandu ba Yerusalemu, niwina onyala okhumulakayila? Niwina onyala okhulinda khulwo luhono okhumanyilisia singa muli?

⁶Abandu inywe mwaisuula: mwaikhupa emikongo, kho ndali okhunyiila omukhono kwanje khulwo khumusalisia, sichila ndali ninjonyele khulwo okhwikal'la oburima bwanje.

⁷Ndamufuuba mumuyeka singa omukhuutsi, mubuli litaala elili musibala, ndali okhumumuma inywe abandu banje, ndali okhwira abaana benywe, sichila simwalekha tsinjila tsienywe tsimbi tawe.

⁸Baliho abakhasi balekhwa abenji musibala sienywe okhuyomba omuyekhe okuli khunyanza. Ndali okhwira abasiani ababuukha nibasili abetsingufu, ma nikhola abanyina babwe okhusaal'la. Nambaler're okhutsunwa nende oburi obukali bungoyingoyi.

⁹Omukhasi wabaana be bane nabataru bafwa ukwiye hasi, nakamul'la emiiya. Obulafu bwom'basu khuye bulakalukhana okhuba esilima; umal'le okhusimbibwa omurwe ma omwoyo kukwe kubeleye. Nzia okhulekha abasuku benywe bere yabo bosi abasili mwoyo. Ise, OMWAMI mal'le okhuboola.”

¹⁰Mako obwandi omundu omubelelu? Esiachila mama niyanzibula musibala nisina? Okhwola solane nende okhuhangalana na buli mundu musibala. Ise sili okhukopiakhwo amapesa kata okhukopakhwo okhurula khumundu tawe, nebutswa abandu bosi bal'lomanga amang'ana kesilaamo khu ise.

¹¹OMWAMI, lekha ebilaamo biabwe biekhole nikali mbu sindakhurumikhila bulahi tawe, khandi nikali sindabarebelakhwo tsimbabasi abasuku banje olwa bali mumanyakhano nende mubutinyu tawe.

¹²Abulaho onyala khufunaka esibia, okhusila muno esibia okhurula elubeka wesinyolu esiatsokanibwamwo omukasa.

¹³OMWAMI yambool'la mbu, “Naarume abasuku okhubukula obuhinda nende ebindu biobukusi biabandu banje, khulwo khubahelesia esinyasio khulwe tsimbi tsiabakhola musibala siosi.

¹⁴Nambakhole okhurumikhila abasuku musibala siabaramanyilekhwo esindu siosi tawe. Sichila lirima lianje lifwana omul'lo, ne lilatukha khulwe inziayo.”

¹⁵Ma nimboola mbu, “OMWAMI, ibe omanyilisianga. Unzitsul'le khandi ukhonye. Orabefwila oluhono ma kachile banzire tawe. Witsul'le mbu ise nyekwanga khulweibe.

¹⁶Wali okhul'loma n'nase ne nimbuyia buli ling'ana. Ise ndi ouwo, OMWAMI Nyasaye Wokhunyala Biosi, kho amang'ana kaako ketsusia omwoyo kwanje nobuyanzi nende obusangali.

¹⁷Sindakosiakhwo inyinga yanje nende abandu bandi ninzekhel'langa nende okhwesangasia tawe. Khulwo okhulonda lilako lilio ndali okhwikhala sienyene ma nimambwa nelirima.

¹⁸Busina nzilil'le okhusaalila? Busina amafumire kanje karanyala khuhona tawe? Busina kabule khuhona? Simanya nikali ochoomanga okhusinyisia singa omuchela okukhamanga mumatukhu komubasu?”

¹⁹Khu kene yaka OMWAMI yakalusia mbu, “Noba niwakhakalukha khu ise, ne nzia okhubukula khandi ne witsa okhuba omurumikhili wanje khandi. Nikakhaba wakhalekha okhul'loma akoluhingwa, ne nochiaka okhukamba amang'ana amalahi, olaba omuroobi wanje khandi. Abandu betsa khukalukha khuibe ne sinakakhutakhe okhutsia khubo tawe.

²⁰Nakhulombe okhuba lisisi litinyu eliomukasa khubandu baabo. Nabakhulwane nebutswa sinabakhuleke tawe. Nambe nindi n'nawe khulwo okhukhusoola nende okhukhubiikha habundu halahi.

²¹Nakhusoole okhurula mubunyali bwabandu ababi nende abandu besikhu. Ise OMWAMI mal'le khuboola.”