Read lunyore YEREMIA 16 Bible Online

YEREMIA 16 - lunyore bible

YEREMIA 16

¹Khandi OMWAMI yal'loma n'nase naboola mbu,

²“Orakhateesia omukhasi, nohomba okhwibul'la abaana habundu hafwana yaha tawe.

³Nzia okhubool'la aketsa okhwekholekha khubaana abebul'lwa hano nende khubebuli babwe.

⁴Nabafwe okhurula khubulwaye obubi okhusila, ne abulaho owakhabekhuule nohomba owakhabayabile. Emilambo chiabwe chiakhafwane imbolela ebunjikhilwe hasi. Bakher'rwe mwihe nohomba bakhafwe khulwe inzala, ne emilambo chiabwe chiakhabe ebiakhulia biamanyonyi nende tsinyama nabulimo.

⁵“Orenjilakhwo munyumba yabandu bekhuulanga tawe. Orakhabelelakhwo khulwomundu wosi tawe, ise sinanzilil'le okhulaamila abandu banje tsikhabi tsiomulembe tawe nohomba okhubamanyia obuyanzi nende tsimbabasi tawe.

⁶Abahinda halala nende ababisandu nabafwile musibala muno nebutswa abulaho owanobayabile nohomba owanobekhuule tawe. Abulaho owanawefumire nohomba okhubeka liswi lilie khumurwe kukwe khulwo khumanyia esibeela sisie.

⁷Abulaho owanolie nohomba owanonywe nende omundu wosi khulwo khumuhotselesia olwa owayayanza nabe nafwiye. Abulaho owanobelel'le owasie, kata khu uyo owanobe nafwiliywe samwana nohomba nyina.

⁸“Orakhenjilakhwo munyumba mwabandu balitsanga lisabo tawe. Orekhala n'nabo khulwo khulia nende okhunywa tawe.

⁹Ohuyie khuke ise, OMWAMI Wokhunyala Biosi, Nyasaye wa Isiraeli nzia okhuboola. Nzia okhusiling'ania amayoosi kobuyanzi nende obusangali kata nende amayoosi kobusangali bwamasabo kebisel'lo okhurula khubandu abali habundu hano.

¹⁰“Olwa nobabool'le akene yaka kosi, betsa okhureeba esichil'le nikhalaka okhubahelesia esinyasio esikali. Betsa okhureeba obubi bwabakhol'le obuchilanga nibaba nesikha nobuliena khandi nitsimbi sina etsiabakhol'le imbeli wo OMWAMI Nyasaye wabwe.

¹¹Kho obabool'le, OMWAMI abooye mbu, ‘Abakuka benywe bali okhungalukhana ma nibekayakaya abanyasaye bandi halala nokhubarumikhila. Bali okhukhupa omukongo ma sibalonda amebaalo kanje tawe.

¹²Nebutswa inywe mwakhola amabi okhuyomba abakuka benywe. Inywe mwesi muli abesikala marwi khandi abakholi bobubi ma simulondanga amalako kanje tawe.

¹³Khulwe yako nzia okhumufuuba okhurula musibala sino okhutsia musibala esieinywe nohomba abakuka benywe barasimanyakhwo tawe. Ne ebwene yiyo namwekayakaye abanyasaye bandi om'basu nobutukhu, ne sinamumanyiekhwo tsimbabasi tsiosi tawe.’ ”

¹⁴OMWAMI yaboola mbu, “Inyinga yitsanga olwabandu barakhesuyekhwo khu ise singa Nyasaye oli mwoyo owahinia abandu ba Isiraeli musibala sie Emisiri.

¹⁵Musilenje yisio bakhesuhe khu ise singa Nyasaye oli mwoyo owahinia abandu ba Isiraeli okhurula musibala esili esinyolu nende okhurula mubibala bindi biosi aha ndali nindabasalania. Nambakabusie musibala siabwe, esibala siandahelesia abakuka babwe. Ise OMWAMI mal'le khuboola.”

¹⁶OMWAMI yaboola mbu, “Rumanga abasuku okhwitsa okhutiila abandu yaba singa tsisutse khandi abahitsi okhuhiima singa tsinyama nabulimo khu buli esikulu esirambi halala nesimbikiti nende mutsinyanga tsili mumachina.

¹⁷Ndolanga siosi esiabakholanga. Sibulaho esiebisu khu ise; tsimbi tsiabwe sitsibulanga okhulolekhakhwo mutsimoni tsianje tawe.

¹⁸Nzia khubakhola barunge esiakhabili khulwe tsimbi tsiabwe nende amabi kabwe sichila bafwabia esibala sianje nende ebiniini ebibula obulamu ebili singa emilambo, khandi baleeramwo abanyasaye bobubehi abenji.”

¹⁹OMWAMI, niwe unindanga khandi umbetsanga tsingufu; ukhonyanga munyinga tsia manyakhano. Abetsimbia bakhetse khuibe okhurula khusihesi siesibala ma balaboole mbu, “Abakuka befwe sibalikhwo nesindu sindi nibarali abanyasaye bobubehi tawe.

²⁰Omundu yakhalombakhwo abanyasaye babe? Tawe, niyakhakhola mbwo, yabo sibakhaba abanyasaye batooto tawe.”

²¹OMWAMI yaboola, “Khulwe yako litukhu elala khandi eliokhumalikha nzia okhumanyia abetsimbia obunyali bwanje halala netsingufu tsianje, nabamanye mbu Ise ndi OMWAMI!”