Read lunyore YEREMIA 17 Bible Online

YEREMIA 17 - lunyore bible

YEREMIA 17

¹OMWAMI yaboola mbu, “Inywe abandu ba Yuda, tsimbi tsienywe tsiahandikwa nende ekalamu yesibia; tsiang'olwa khumioyo chienywe nende khutsinzika tsiolusambwa lwenywe nobutsunzu bwa alumasi.

²Abandu benywe bekayakayanga halusambwa nende habimanyilo ebiombokhelwa nyasaye omukhasi Ashera habuli musaala omubisi khubutenje bwebikulu ebimbichiti,

³nende khubikulu ebirambi ebili musibala esialamu. Nzia okhulekha abasuku benywe okhubukula obuhinda bwenywe halala nebindu biobukusi khulwe tsimbi tsienywe tsiosi etsia mwakhola musibala siosi.

⁴Mwakhalekhe esibala siandali okhumuhelesia, ma ndakhamukhole inywe okhurumikhila abasuku benywe musibala siamuramanyilekhwo esindu siosi tawe, sichila lirima lianje lifwana omul'lo ma liakhatukhe khulwe inziayo.”

⁵OMWAMI yaboola mbu, “Walaamwa omundu uyo oungalukhananga ma ara obusubili bubwe m'mundu, nomutsingufu tsiomundu ofwitsanga.

⁶Omundu uyo nayome singa esitsakha esikhulanga musitsiimi esiomu, mwiloba eliechumbi ahesindu sirakhulangamwo tawe. Libulaho lilahi elikholekhanga khuye.

⁷“Nebutswa naname ikhabi khumundu owara obusubili bubwe mwise.

⁸Afwana singa omusaala okukhulanga ahembi khumuchela, ma kuhila emisi chiakwo khumaatsi. Sikubetsanga nokhuhenda omwoyo olwesimi sitsanga tawe. Sichila amasafu kakwo sikomangakhwo tawe: Sikutekesibwangakhwo olwe ifula ebulaho tawe, kutsilil'langa okhwama amatunda.

⁹“Niwina onyala khumanyilisia omwoyo kwomundu? Sibulaho esindu sindi esili esiobukaati singa kwo. Nomulwaye okhusila okurakhahonibwa tawe.

¹⁰Ise, OMWAMI, khabilisaianga mubwongu nende okhuchela emioyo chiabandu. Khol'langa siomundu okhuhelana singa amenyanga, nende akaba nakholanga.”

¹¹Omundu onyool'langa amapesa munjila yokhukaata, afwana linyonyi lialulanga amayayi akalieba. Nali hakari wobulamubwe yakhakosia obuhinda bubwe, ne mubumalilikhi nafwana butswa omuhingwa.

¹²Ehekalu yefwe efwana singa oluruba olwoluyali, nesinjiye khusikulu esirambi okhurula mubuchiachilo.

¹³OMWAMI, niwe obunaayi bwa Isiraeli ehengangakhwo; yabo bosi abakhwebala bakhasimbibwe emirwe. Bakhakore singa amera kahandiikilwe mulukuukhi kakoranga, sichila bamala okhukhwebala ibe OMWAMI, ibe esitaho siamaatsi kobulamu.

¹⁴OMWAMI, umbonie ne nase nzia okhuba omulamu likali; usoole ne nzia okhuba nomulembe kwelikali. Niwe owanzitsoomianga!

¹⁵Abandu bambool'langa mbu, “Kali hena amang'ana ko MWAMI aka wakhubool'la? Akahesie lunondi!”

¹⁶Nebutswa OMWAMI sindakhuhakia okhubaleer'ra amakhupako tawe; sindabekombela babe neinyinga yamanyakhano tawe. OMWAMI, ibe umanyile yaka; umanyile ake ise ndaboola.

¹⁷Orabba owokhurisia ise tawe, ibe oli obwikamilo bwanje olwa amanyakhano kanzitsilanga.

¹⁸Obasimbie emirwe yabo bosi abasandianga nebutswa ise undekhele, OMWAMI. Obetsusie noburi obukali, nebutswa ise oramba oburi obukali tawe. Oleere amanyakhano khubo ma obaremake mubitonye.

¹⁹OMWAMI yambool'la mbu, “Yeremia, tsia okambe amang'ana kanje nosinjiye Musilibwa Siabandu, esiabaruchi ba Yuda benjil'langamwo khandi barul'lamwo mwitookho; ma khandi otsie khubilibwa bindi bia Yerusalemu.

²⁰Obool'le abaruchi nende abandu bosi ba Yuda nende bosi abamenyele Yerusalemu, abenjil'langa mubilibwa yibi, bahuyie aka nzia khuboola.

²¹Obabool'le mbu nikali bayanza obulamu bwabwe, barakhachingakhwo esindu siosi esindu siosi khwitukhu lie Sabato mubilibwa bia Yerusalemu tawe,

²²nohomba okhuchingakhwo esindu siosi okhurula mutsinyumba tsiabwe litukhu lie Sabato tawe. Barakhakholakhwo omulimo kwosi litukhu lie Sabato tawe; okhwola balilinde singa litukhu litsienukhu singa obwa ndali okhulaka abakuka babwe.

²³Abakuka babwe sibaali okhuhul'la akandaboola kata sibabukulakhwo muko obukono tawe. Musilenje yisio, bali nesikala marwi; sibaali abanyala khulonda amalako kanje nohomba okhwekakhwo esindu siosi okhurula khu ise tawe.

²⁴“Obool'le abandu yaba mbu okhwola balonde amalako kosi. Barakhachinga omusiko kwosi okhubir'ra mubilibwa bielitookho litukhu lie Sabato tawe. Okhwola balinde litukhu lie Sabato singa litukhu litsienukhu khandi barakholakhwo omulimo kwosi tawe.

²⁵Kho nilwo olwabaruchi babwe halala nabaana babaruchi bakhenjil'le mubilibwa bia Yerusalemu ma babe abanyala okhuba nobunyali bwoburuchi singa obwa Daudi yali n'nabwo. Abandu aba Yuda bosi halala nende aba Yerusalemu bakhachendele mumakaari kelihe nende khutsisululi, ne litookho lia Yerusalemu liakhetsulemwo abandu amatukhu kosi.

²⁶Abandu bakharule mumatookho ka Yuda nende mumataala akali ahembi Yerusalemu; bakharule mulusoma lwa Benjameni nende mumataala akali ahembi khubikulu nende okhurula khubikulu nende khulubeka lwenandete wa Yuda. Bakhalere mu Hekalu yanje emisango emisambe nende ebihanwa, emisango chiobuswache nende obwali halala nende emisango chiokhukhupa embwo.

²⁷Nebutswa okhwola balonde amalako kanje khandi balinde litukhu lie Sabato singa litukhu litsienukhu. Barakhachingakhwo emisiko chiosi okhubir'ra mubilibwa bia Yerusalemu litukhu yilio tawe. Nibakhakhola mbwo, ndakhaleera omul'lo okhusamba ebilibwa bia Yerusalemu. Omul'lo nakusambe inyumba yoburuchi mu Yerusalemu, ne abulaho owakhanyala khu kusimia tawe.”