Read lunyore YEREMIA 18 Bible Online

YEREMIA 18 - lunyore bible

YEREMIA 18

¹OMWAMI yambool'la mbu,

²“Rula otsie emwalo khunyumba yomulonji wetsindabu, aha nakhubool'le amang'ana kanje.”

³Kho ndatsiayo ne ninyoola omulonji wetsindabu nalongelanga litoyi khuluchiolwe.

⁴Buli lwosi olwesitonye sielitoyi eliayalonganga siononekhanga, yabukulanga litoyi liene yilwo ma alomba esindu sindi.

⁵Ma OMWAMI niyambool'la mbu,

⁶“Inywe abandu ba Isiraeli nase sindakhaba nobunyali bwokhumukhol'la akomulonji wetsindabu akhol'le khwitoyi? Inywe muli mumakhono kanje singa litohi lili mumakhono komulonji wetsindabu.

⁷Nikakhaba inyinga yosi ndakhaboola mbu nzia okhwiya, okhukoka hasi nohomba okhumuma olwibulo nohomba lihanga liosi,

⁸nebutswa abolwibulo lwene yilwo nibeyama tsimbi tsiabwe, kho sindakhakhola akandali nimbooye nambakhole tawe.

⁹Ne munjila yindi nindakhaboola mbu nzia okhuraaka nohomba okhwombokha olwibulolwosi noho lihanga liosi,

¹⁰nebutswa abolwibulo yilwo nibakhafukula amalako kanje ma nibakhola tsimbi, kho sindakhabakhol'la akandali nindakile khubakhol'la tawe.

¹¹Luno bool'la abandu ba Yuda nende aba Yerusalemu mbu ndoosianga tsinjila tsiokhubasalisia khandi nderechekhanga okhubahelesia esinyasio. Babool'le balekhe khumenya obulamu bwokhukhola tsimbi — balekhe ifwo yabwe nende ebindu biosi ebiabakholanga.

¹²Nabo nabakalusie mbu, ‘Tawe, busina khulekhe? Ifwe fwesi khulaba abesikala marwi khandi ababi obwa khwakhenyele okhuba.’ ”

¹³OMWAMI yaboola mbu, “Reebakhwo buli lihanga nikali amang'ana keimbila ino kayekholekhakhwo khale. Abandu ba isiraeli bakhol'le esindu esibi okhusila!

¹⁴Mbula amachina kokhubutenje bwa Lebanoni kabulangakhwo ebarafu noho? Mbula emichela eminyifu chiombikulu bia Lebanoni tsikhamangakhwo noho?

¹⁵Nebutswa abandu banje baikhupa omukongo, khandi basambilanga ebiniini obwali. Bayesikar'ra munjila tsiabenyekhanga okhulondamwo, sibasilonda tsinjila tsikhuulu tawe; bachendanga khutsinjila etsiralombwa tawe.

¹⁶Bakhola esibala sino habundu hokhurisia khulwo khuchaaywa khulwe inziayo. Bosi ababir'ranga musio bakhachenyibwe nende akabalolanga. Bakhasunguse emirwe chiabwe khulwo khuchenya.

¹⁷Ndakhasalanie abandu banje imbeli wabasuku babwe, singa olukhuukhi olusalanibwe nende omuyeka okusambanga okhurula ebukwe. Nambakhupe omukongo; sindakhabakhonye olwa amabi ketsa khubo tawe.”

¹⁸Ma abandu nibaboola mbu, “Chende, khuloosie obwakhunyala okhusiemana Yeremia! Nakhubetsenje nende omwesaalisi wokhukhwibaal'la amalako buli khasotso, abandu abachesi abokhuchetsiyia nende abaroobi bokhukamba ling'ana lia Nyasaye. Chende khumuyaale ma khusuule okhuhul'la akakhuboolanga.”

¹⁹Kho ndamala nisaaya mbu, “OMWAMI hulila akamboolanga khandi ohuyie khukabasuku banje baboolanga khu ise.

²⁰Amabi niko omurungo kwokhukhola amalahi noho? Nebutswa bamal'le okhunzabila obuko ngwemwo. Witsul'le singa obwa ndetsa khuibe ma nin'noma ninawe amang'ana kabwe, kho olekhe okhuba nelirima n'nabo olwo kolanga khubikhole biabwe.

²¹Nebutswa luno, OMWAMI, lekha inzala yiire abaana babwe; lekha ber'rwe mwihe. Lekha abakhasi bafwilwe abasaatsa babwe nende abaana babwe; lekha abasaatsa bafwe okhurula khubulwaye ne abasiani ababuukha ber'rwe mwihe.

²²Orume omukanda kwabandu okhuyaaka tsingo tsiabwe bungoyingoyi. Lekha balakaye khulwoburi obukali. Bali okhuyaba obuko mbu ise ngwemwo, khandi balomba emireko mbu ise ndil'lwemwo.

²³Nebutswa OMWAMI, ibe wamanya obusiemani bwabwe khulwo okhunzira. Orakhababeelakhwo khulwamabi kabwe nohomba kata khulwe tsimbi tsiabwe tawe. Lekha balekwe imbeliwo, ma obahe esinyasio olwosili nelirima.”