Read lunyore YEREMIA 19 Bible Online

YEREMIA 19 - lunyore bible

YEREMIA 19

¹OMWAMI yambool'la nzie khukula isongo eyalombwa khwitohi. Khandi niyambool'la mbukulekhwo balala khubemeli babandu nende balala khubesaalisi abakhulundu,

²khandi babir're Musilibwa sie Bikonjio siokhutsia Mwibanda lia Hinomu. Ebwene yiyo nzia khukamba ling'ana lio MWAMI yetsa khumbelesia.

³OMWAMI yambool'la mboole mbu, “Abaruchi ba Yuda halala nabandu ba Yerusalemu, hulile khu ke Ise, OMWAMI Wokhunyala Biosi, Nyasaye wa Isiraeli, nzia okhuboola. Nzia okhuleera amakhupako amabi okhusila habundu hano ma wosi owanokahul'lekhwo nachenye.

⁴Nzia okhukhola yaka sichila abandu bayindekha nende okhufwabia habundu hano khulwo khuhaana emisango khubanyasaye bandi; abanyasaye ba bo nohomba abakuka babwe kata abaruchi ba Yuda baramanyakhwo tawe. Bayitsusia habundu hano nende amatsahi kabandu baralikhwo nesikha tawe,

⁵khandi bayombokhela Baali tsisambwa khulwo okhusambilakhwo abaana babwe mul'lo singa emisango. Ise sindabalaka okhukhola akene yaka tawe, kata khandi sikalikhwo mumapaalo kanje tawe.

⁶Khulwe yako inyinga yitsanga olwa habundu hano harakhalangwekhwo Tofetsi nohomba Libanda lia Hinomu tawe. Musilenje yisio, hakhamanyikhe singa Libanda lio Bwiri.

⁷Habundu hano ndakhakoyanie obuloosie bwabandu ba Yuda nende Yerusalemu. Ndakhalekhe abasuku babwe okhubaleka nende okhuber'ra mwihe. Ndakhahaane emilambo chiabwe khumanyonyi nende khutsinyama nabulimo singa ebiakhulia biatsio.

⁸Ndakhaleere okhukhuywa okhukali khwitookho yili ma siomundu owakhabir'rangeho yakhachenye nende okhuhuka.

⁹Abasuku nabafumbile litookho ma bakhateeme okhwira abandu bamwo. Okhufumbilwa khwelitookho yilio nabasuku khwakhabe okhubi okhusila sichila abandu bomwitookho yimwo bakhalie abasiabwe kata nende okhulia abaana babwe.”

¹⁰Ma OMWAMI niyambool'la nzarake isongo imbeli wabandu bakhwali nikhutsiye n'nabo

¹¹nende okhubabool'la mbu OMWAMI Wokhunyala Biosi abooye mbu “Nafunake abandu yaba nende litookho yili ne nabafwane singa isongo yatikhile yiyi eyalombwa khwitoyi eranyala khwonganibwa khandi tawe. Abandu nabayabile abafu babwe kata mu Tofetsi[2] sichila sihalikhwoho habundu handi habanyala okhuyabilwa tawe.

¹²Musubisianga mbu nanombe litookho yili halala nabandu abamenyamwo okhufwana habundu halangwanga Tofetsi.

¹³Tsinyumba tsiomu Yerusalemu, tsinyumba tsiabaruchi ba Yuda nende tsinyumba tsiosi etsiebilama biatsio biasambilwakhwo obwali bwokhuhanwa khutsinyininyini khandi ahewaini yali okhusundulwa singa omusango khubanyasaye bandi - biosi mbwo biakhabe ebiesifwabwi singa habundu halangwanga Tofetsi.”

¹⁴Kho ndamala nirula Tofetsi, aha OMWAMI yali okhuuruma okhukamba ling'ana lilie. Ndatsia nisinjila mumukitsi kwe Hekalu ma nimbool'la abandu bosi

¹⁵mbu OMWAMI Wokhunyala Biosi, Nyasaye wa Isiraeli, yali khuboola mbu, “Nzia okhuleera khwitookho yili halala nokhumataala kali ahembi khulio, amabi kosi aka ndali okhuboola nandeere sichila inywe muli abesikala marwi ma khandi simulondanga akamboolanga tawe.”