Read lunyore YEREMIA 2 Bible Online

YEREMIA 2 - lunyore bible

YEREMIA 2

¹OMWAMI yambool'la

²nandie amang'ana kano khubandu bosi abali Yerusalemu. “Ise nzitsul'langa singa inywe mwali abasubilwa nimusili abaana, singa obwa mwali khunyanza olwa khwali okhuteesania olwokhuranga; mwali khunonda nimubir'ranga musitsiimi, nende musibala sirali nisiarakwakhwomwo esindu tawe.

³Isiraeli, ibe wali owanje sienyene; ibe wali omukabwa kwanje omutsienukhu. Ndaruma amanyakhano nende amakhupako, khusiomundu wosi owakhusalisia. Ise, OMWAMI, mal'le okhuboola.”

⁴Hulile amang'ana ko MWAMI, inywe abetsukhulu ba Yakobo, inywe tsinzibulo tsia Isiraeli.

⁵OMWAMI aboolanga mbu: “Nibubi sina obwa bakuka benywe banyoola khu ise? Nisina esiachila nibangalukhana? Bekayakaya ebiniini bibula obukhala, ma abene nibakwa ababutswa.

⁶Sibaali okhumendelakhwo tawe, kata nikali ndabahonokosia okhurula Emisiri, ma nimbemel'la okhubir'ra musitsiimi, liloba liesiyeyie nende omuyekhe, liloba eliomu khandi eliokhurisia, homundu wosi aramenyanga tawe, kata sialiho onyala khubir'ra mwo tawe.

⁷Ise ndabalera musibala sie liloba linolu, khulwo khusangal'la amachese kalio nende ebindu bindi bialio ebilahi. Nebutswa bayononia esibala sianje; bali okhufwabia esibala esiandabahelesia.

⁸Abesaalisi sibaali okhureebakhwo, ‘OMWAMI ali hena tawe?’ Abesaalisi banje omwene sibaali okhuumanya ise tawe. Abaruchi bali okhukhol'la indiri; abaroobi bal'lomanga nibarumikhilanga eliira lia Baali, ne nibekayakaya ebiniini bibula obukhala.”

⁹“Khulwe yako, Ise OMWAMI, nzia okhuboola amang'ana kokhumuyaala inywe abandu banje. Nzia okhuhaana ebifune biokhuyaala abetsinzibulo tsienywe.

¹⁰Tsie elubeka lwemasaba khusikhalachinga sia Kupuro, khandi murume omundu elubeka lwebukwe khusibala sia Kedari. Mwitsa okhulola mbu esindu sifwana yisi sisiayekholekhakhwo olundi tawe.

¹¹Libulaho lihanga lindi liosi eliakalukhaniakhwo abanyasaye babwe tawe, kata olwa abanyasaye babwe barali abatooto tawe. Nebutswa abandu banje baindekha Ise, Nyasaye wali khubaler'ra oluyali, ne babukula abanyasaye baranyala okhubakhonya tawe.

¹²Khulwe yako ndakanga likulu okhutechela nobunyali obukali, khandi okhuhuka nende okhung'ang'ala,

¹³sichila abandu banje bakhola amang'ana kabili amabi; bamala khukalukhana okhurula khu ise, ouli esitaho siamaatsi kobulamu, ne bayaba amayabo kokhubiikha amaatsi, amayabo akafutukha akaranyala khubikha amaatsi tawe.”

¹⁴“Isiraeli siali omusumba tawe; siyayibul'lwa mubuhambe tawe. Esichilanga abasuku baabe nibamuhima nisina?

¹⁵Bamuhumilanga singa etsisimba; balomba esibala sisie okhuba esitsiimi, ne amataala kaake kasasibwa, ma kasikala likunda.

¹⁶Yee, abandu ba Mefisi nende aba Tahapanihesi baarakile esihanga sisie.

¹⁷Isiraeli, wali okhweler'ra yaka omwene! Ibe wali khundekha ise, OMWAMI Nyasaye uwo, olwa ndali nikhwemel'langa khunjila.

¹⁸Opaalanga nibukhala sina obwa witsa khunyoola khulwo okhutsia Emisiri, okhunywa amaatsi m'muchela kwa Naili? Opaalanga nibukhala sina obwa nonyoole khulwo khutsia Asiria, okhunywa amaatsi konyone m'muchela kwa Efurate?

¹⁹Tsimbi tsitsio omwene tsilakhuleer'ra esinyasio, ne okhukalukha inyuma khukhwo okhurula khu ise khulakhukhalachila esiina. Ibe naweke okhumanyilisia singa buli bululu khandi obubi, khulwo khundekha Ise, OMWAMI Nyasaye uwo; khandi nende okhubula okhuba omusubilwa khu ise. Ise OMWAMI Nyasaye Wokhunyala Biosi, mal'le okhuboola.”

²⁰OMWAMI Nyasaye yaboola mbu, “Isiraeli, amatukhu ka khale ibe wasuula okhuba hasi wobunyali bwanje, ibe wasuula okhulonda amalako kanje nende okhundekayakaya. Khubuli esikulu esirambi khandi hasi wabuli omusaala omubisi, wakhola obutamba khulwokhuyanzisia abanyasaye bolwibulo.

²¹Ndali okhukhuraaka singa omusabibu omulahi, okhurula khu imwo indahi okhusila. Nebutswa henga olole singa ofwana! Ibe ofwana singa omusabibu okwabola okubula obukhala.

²²Kata niwakhesaaba nesabuni inyinji, Ise nanzilil'la okhulola esipala sietsimbi tsitsio.

²³Wakhaboola mbwena siwefwabisie tawe, mbu osili okhwekayakayakhwo Baali tawe? Henga olole singa wali okhwona noli mwibanda; koola olole akawakhola. Ofwana butswa singa ingamia yomubulimo eyenyanga khuruma, eyilukhananga yiyi ne yiyi

²⁴nekulumanga okhutsia musitsiimi. Olweba niyenya okhuruma, niwina onyala okhuchikal'la? Ingamia isaatsa eba nechienya, sienyakhanangakhwo okhuchiruna tawe, sichila ikhasi yene yitsanga butswa amatukhu kokhuruma nikol'le.

²⁵Isiraeli, oralekha ebilenje bibio bichonye tawe, kata oralekha mwikosi mumwo mwome khulwo khuruna abanyasaye bandi tawe. Nebutswa oboolanga, ‘Tawe! Sindi onyala okhukalukha khu ibe tawe. Ndayanza abanyasaye betsimbia tsindi ne nambalonde.’ ”

²⁶OMWAMI yaboola mbu, “Singa obwomwibi asimbibwanga omurwe natil'lwe, nimbwo inywe abandu bosi ba Isiraeli bakhasimbubwe emirwe — abaruchi benywe, abemeli benywe, abesaalisi, nende abaroobi benywe.

²⁷Inywe mulisimbibwa emirwe — inywe ababoolanga mbu omusaala nikwo Papa wenywe ne olwanda nilwo mama wenywe. Yaka kakhekholekhe sichila inywe mwali okhukalukha inyuma musilenje siamwakhetsele khu ise. Nebutswa nimuli mumanyakhano, muureebanga ise nzitse okhumukhonya.

²⁸“Abanyasaye bamwelombela bali hena? Olwa muba nimuli mumanyakhano mubabool'le bamukhonye — nikali bakhanyala! Ibe Yuda oli nabanyasaye abenji singa amatookho koli n'nako.

²⁹Nisina esichilanga nimundekaana? Inywe mwesi mwaikhol'la indiri!

³⁰Ndali okhumuhelesia esinyasio, nebutswa sisiamukhonya tawe; simwali okhumbuchil'la okhumukol'losia tawe. Singa esimba elul'le p'pa, mwayira abaroobi benywe.

³¹Abandu ba Isiraeli, hulile akambool'langa. Ise ndakhafwana singa esitsiimi khwinywe nohomba singa esibala siesiilima khwinywe noho? Nisina esiakhachila nimuboola munyala okhukhola kosi akamwenya khandi simwakhakalukha khu ise tawe?

³²Mbula omukhaana omubuukha yebil'langakhwo ebimili bibie, nohomba omweha yebil'langakhwo tsingubo tsies'sel'lo noho? Nebutswa abandu banje bainzibil'la khulwa amatukhu amenji.

³³Siahene mwamanya obwokhukhaba abalina bakhasi. Kata abakhasi ababi okhusila banyala okhweka okhurula khwinywe.

³⁴Tsingubo tsienywe tsilikhwo ebipala biamatsahi kabandu abatakha nende ababulakhwo esikha tawe, ne sitsilikhwo nebipala biamatsahi kabebi abafunakanga tsinyumba tawe. “Nebutswa mu yaka kosi,

³⁵ibe oboolanga, ‘Ise mbula esikha tawe; akatooto OMWAMI siasili nelirima n'nase tawe.’ Nebutswa Ise, OMWAMI nzia khuhaana esinyasio khuibe sichila okayanga mbu siwayona tawe.

³⁶Wayekhola omundu orali matsami khulwokhulonda abanyasaye bandi betsimbia. Olasimbibwa omurwe nende Emisiri; singa obwa wali khusimbibwa omurwe nende Asiria.

³⁷Olakalukha okhurula Emisiri, niwinamisie omurwe kukwo khulwe es'simba murwe. Ise OMWAMI ndamala okhubasula yabo abawasubila; sinonyoolekhwo esindu siosi okhurula khubo tawe.”