Read lunyore YEREMIA 20 Bible Online

YEREMIA 20 - lunyore bible

YEREMIA 20

¹Olwomwesaalisi olangwanga Pashuri omusiani wa Imeri, owali nali omwemeli omukali we Hekalu yahul'la ningambanga amang'ana yako,

²yalaka mbu ndiabwe ma mbohwe neminyol'lo echili ahembi musilibwa sia Benjameni esiemukulu we Hekalu.

³Mutsuli kwelitukhu elialondakhwo, olwa Pashuri yali niyambooloye okhurula muminyololo, ise ndabool'la Pashuri mbu, “OMWAMI siyakhuhelesia eliira Pashuri tawe. Eliira liayakhuhelesia ni ‘Ebirisio Habundu Hosi.’

⁴OMWAMI mwene waboola mbu, ‘Nzia okhukhukhola ibe okhuba esirisio khuibe omwene nende khubalina baabo, ne witsa okhulola nibeerwanga nende olukanga lwabasuku babwe. Nzia okhura abandu ba Yuda mumakhono komuruchi wa Babulonia, yetsa okhubukula balala okhuba abasumba musibala sisie ne yetsa okhwira abandi.

⁵Khandi nzia okhulekha abasuku benywe okhuyaaka obuhinda bwosi obwelitookho khandi babukule ebindu biosi ebialombwa nende emiandu, kata nende libiikhilo liabaruchi ba Yuda, ma bahile biosi Babulonia.

⁶Kata ibe, Pashuri, nende abeinyumba yiyo namutiilwe ma namuhilwe Babulonia. Ebwene yiyo nofwileyo, ma noyabilwe halala nabalina baabo abawabool'la obubehi obwinji.’ ”

⁷OMWAMI, ibe wali okhungaata ise, nase ndali okhukaatwa. Ibe oli netsingufu okhunyomba, ma umal'le okhundekel'la. Buli mundu yanzekhel'langa; banzekhel'langa om'basu kwosi.

⁸Lwosi olwa n'nomanga okhwola ndakaye butinyu nende okhukambuukha mbu, “Obulwani! Okhumululwa!” OMWAMI, ise nzekhel'lwanga ninyekwa amatukhu kosi, sichila ngambanga ling'ana lilio.

⁹Ne olwa mboolanga mbu, “Nzia khwibil'la OMWAMI, khandi sinzia okhul'loma nirumikhilanga eliira lilie tawe”, ma ling'ana lilio lifwana omul'lo okusambanga mukari mwanje. Ndemanga akanyala okhulikal'la mukari, nebutswa sindi onyala khutsilil'la okhulikal'la tawe.

¹⁰Mbul'langa buli mundu namonya mbu, “Ebirisio bili siahabundu! Chende khubayaale khubakhongo!” Kata abalina banje bokhumwoyo balindil'langa okhukwa khwanje. Baboolanga mbu, “Haundi anyala khukaatwa, ma ifwe khunyala okhumutiila ma khurunge es'sialia.”

¹¹Nebutswa ibe, OMWAMI oli olubeka lwanje, oli, ne tsingufu nende obunyali, ne yabo bosi abasandianga balakwa. Nabasimbibwe emirwe khulwe inziayo, sichila sibali abanyala okhuhesia akabenyanga tawe. Es'simba murwe siabwe sisiakhebil'lwe tawe.

¹²Nebutswa, OMWAMI Wokhunyala Biosi, ibe oteemanga abalunji habwene, ibe wamanya akali mumioyo chiabwe nende mumapaalo kabwe. Kho lekha ndole ibe norunganga es'sialia khubasuku banje, Sichila ndara amang'ana kanje mumakhono kaako.

¹³Mwembele OMWAMI! Mumwitsoomie OMWAMI! Asoolanga abasandibwanga okhurula mumikhono chiabandu ababi.

¹⁴Esilaamo sibe khwitukhu liandebulwa! Tsikhabi tsirabbakhwo khwitukhu liamama yanzibula tawe!

¹⁵Esilaamo sibe khumundu owachila papa nasangala olwa yamubool'la mbu, “Wibuliywe omwana omusiani!”

¹⁶Lekha afwane amatookho ako MWAMI yamulula sila tsimbabasi. Lekha ahulile okhulakaya khwokhutsunwa mutsuli, nende olwika lwelihe m'mubasu hakari,

¹⁷sichila siyali khunzira nisili khwibulwa tawe. Khane munda mwa mama mwakhabeye esilindwa sianje.

¹⁸Esiachila ninzibulwa nisina? Kali nyoole amanyakhano nende esibeela, nokhumalila obulamu bwanje mus'simba omurwe noho?