Read lunyore YEREMIA 21 Bible Online

YEREMIA 21 - lunyore bible

YEREMIA 21

¹Omuruchi Sedekia wa Yuda yaruma Pashuri omusiani wa Malikia nende omwesaalisi Sefania omusiani wa Maaseya okhwitsa okhumomba mbu:

²“Noyanza khul'lomele khu MWAMI sichila omuruchi Nebukadinesa wa Babulonia halala nabasikari baabe bafumbiye litookho. Haundi OMWAMI yetsa khumanyia akamangalimwa kaake ma ahakie Nebukadinesa okhulekha okhukhuseera.”

³Kho OMWAMI yal'loma n'nase, nase nimbool'la abandu bali nibarumilwe khu ise

⁴okhubool'la Sedekia mbu OMWAMI Nyasaye wa Isiraeli abooye mbu, “Sedekia, Ise nzia okhuleka abasikari baabo abalwananga omuruchi wa Babulonia halala nabasikari baabe. Nzia okhubunjikha ebilasan'nwe biabasikari baabo hakari welitookho.

⁵Nzia okhulwana ibe nobunyali bwanje bwosi nelirima lianje liosi nobululu bwanje bwosi nende lileko liosi.

⁶Nanzire abandu bosi abamenyanga mwitookho yili; abandu nende emiruko biosi bitsa khufwa okhurula khubulwaye obubi okhusila.

⁷Nebutswa ibe, nende abakholi baabo, nende yabo bosi abarayir'rwa mwihe, neinzala nende obulwaye, namulekhe inywe mwesi mutilwe nende omuruchi Nebukadinesa halala nabasuku benywe abenyanga okhumwira. Nebukadinesa yetsa okhumwira ne sietsa okhulekhelakhwo omundu wosi nohomba amanyie aketsimbabasi nohomba abelel'lekhwo omundu wosi khu inywe tawe. Ise OMWAMI mal'le khuboola.”

⁸OMWAMI yambool'la mbool'le abandu mbu, “Hulile! Ise OMWAMI muhelesianga okhwahula hakari weinjila yokhutsia mubulamu nende injila yokhutsia mukhufwa.

⁹Omundu wosi owanosikale mwitookho alafwila mwihe nohomba alafwa khulwe inzala nohomba khulwobulwaye. Nebutswa omundu wosi owanorule mwitookho okhutsia okhwehaana khubasikari ba Bababulonia abali mwiseera litookho luno, sinayerwe tawe; alahonia obulamu bubwe.

¹⁰Mal'le okhukhalaka mumakani kanje mbu sinambelel'lekhwo litookho yili tawe, nebutswa nandimulule. Nalihaanwe mumakhono komuruchi wa Babulonia naye nalisambe liosi pe. Ise OMWAMI, mal'le okhuboola.”

¹¹OMWAMI yambool'la mbool'le abeinyumba yoburuchi ya Yuda, amang'ana yaka:

¹²“Hulile amang'ana ake ise OMWAMI mboolanga khu inywe abolwibulo lwa Daudi. Mulole mbu obukhalachi bwahabwene bukholwanga buli litukhu. Musoole omundu osandibwanga okhurula khu uyo omusandianga. Nimurakhakhola mbwo tawe, tsimbi atsiamukholanga tsilachila oburima bwanje okhwatukha singa omul'lo okurakhanyala khusimibwa tawe.

¹³Ibe Yerusalemu, wikhaye ikulu wa mabanda singa olwanda olurambi olulolekhelanga ikulu wesipaapi. Nebutswa nzia okhukhulwana ibe. Oboolanga mbu abulaho onyala okhukhuseera nohomba owakhafunaka amasisi kelitookho.

¹⁴Nebutswa nakhuler're esinyasio okhulondokhana nende akookhol'le. Nzia okhuhambia omul'lo munyumbayo yoburuchi, ne omul'lo kwitsa okhusamba siosi esiba nisili ahembi khunyumba iyo. Ise OMWAMI mal'le khuboola.”