Read lunyore YEREMIA 22 Bible Online

YEREMIA 22 - lunyore bible

YEREMIA 22

¹OMWAMI yali khumbool'la nzie khunyumba yomuruchi wa Yuda ma mboole amang'ana kano:

²“Hulile amang'ana ake ise OMWAMI mboolanga, ibe omuruchi wa Yuda owomulwibulo lwa Daudi nabemelibo nende abandu ba Yerusalemu bosi.

³Ise OMWAMI, ndakanga inywe okhukhola akali akahabwene khandi akatooto. Musoole omundu osandibwanga okhurula khu uyo omusiandianga. Muranyasia nohomba okhubakhupia esibi abarende, ababisandu nohomba abakhasi balekhwa tawe; khandi murer'ra abandu babula esikha habundu hatsienukhu yaha tawe.

⁴Nimwakhakhola yaka kosi akamulachile, kho abolwibulo lwa Daudi bakhatsilil'la okhuba abaruchi. Ne bo halala nabakholi babwe nende abandu babwe betsa khutsilil'la okhubir'ra mubilibwa bie inyumba yoburuchi nibanin'ne khumakari kelihe nende khutsisululi.

⁵Nebutswa nimurakhalonda amalako kanje, kho ndesuhanga imbeli wenywe mbu inyumba yoburuchi iyi, yitsa khukwa ma esasikhe. Ise OMWAMI mal'le okhuboola.

⁶“Singa ndolanga, inyumba yoburuchi ya Yuda neyelikondo lilahi singa esibala sia Gileadi khandi singa ebikulu bia Lebanoni; nebutswa nzia okhuchikhola okhuba likunda ahomundu aramenyanga tawe.

⁷Rumanga abandu okhuchimuma. Bosi nabetse nibali netsimbatso tsiabwe, ma baremake etsisiilo tsiemisiita etsialombwa bulahi, ma batsifuube mumul'lo.

⁸“Olunyuma, abarende abenji bakhabir'reho ne bakharebanenje abene khubene mbu esiachila Ise OMWAMI nikhola esindu sifwana mbu khwitookho likali yili nisina.

⁹Kho bakhakabusie mbu esiachila sili mbu inywe mwafunaka indakano yenywe n'nase, Ise Nyasaye wenywe ma nimwekayakaya nende okhurumikhila abanyasaye bandi.”

¹⁰Abandu ba Yuda, murekhuula omuruchi Yosia tawe; muralakaya okhufwa khukhwe tawe. Nebutswa mwekhuule bululu omusiani uwe, Yoahasi bamuhilanga ehale, sinakalukhe khandi tawe, khandi sialilolakhwo esibala esiayebul'lwamwo tawe.

¹¹OMWAMI yaboola kano khu Yoahasi omusiani wa Yosia, owali okhukalukha musilenje sia papa uwe singa omuruchi wa Yuda; “Umal'le okhurula hano okhutsia ehale, siyakhakalukhekhwo khandi tawe.

¹²Yakhafwile musibala siabamuhila mwo, ma sialilolakhwo esibala sino khandi tawe.”

¹³Alitsiboolelwa omundu uyo owombokhanga inyumba yiye munjila erali yobulunji, khandi ochibambul'langa munjila yobubatsa; owukholanga abandu bomusibala sisie, okhukhola emilimo sila okhunyoolakhwo esindu siosi tawe, khandi siabarunganga omurungo kwabuli mwesi tawe.

¹⁴Alitsiboolelwa omundu uyo oboolanga mbu, “Nandeyombokhele inyumba ingali eyekorofa elimwo ebikoti ebikali.” Kho aretsanga amatilisa munyumba yiye, ma achisimba netsimbao tsiemisiita, nachibakha erangi inzakhanyu.

¹⁵Opaalanga wakhaba omuruchi omulahi okhuyomba abandi, noba niwakhombokha tsinyumba tsiemisiita, emilahi okhuyomba etsiabandi? Papa uwo yasangasibwa okhumenya obulamu bwamatukhu amenji. Yali omundu wobukhalachi bwahabwene khandi obwatooto, ma nanyoola amalahi mu kosi akayakholanga.

¹⁶Yayasinjia abatakha munjila yahabwene, ma kosi nikaba amalahi khuye. Yako niko akamanyianga obwokhumanya OMWAMI.

¹⁷Nebutswa onyala okhulola aka khuyanzisianga ibe omwene; ibe wiranga ababula esikha khandi okhupianga abandu baabo esibi. OMWAMI umal'le khuboola.

¹⁸Khulwe yako, kano niko ako OMWAMI aboolanga khu Yehoyakimu omusiani wa Yosia, omuruchi wa Yuda mbu, “Abulaho owakhekhuule okhufwa khukhwe nohomba owakhaboole mbu, ‘E omwana wefwe! E mbotswa!’ Tawe. Abulaho owakhamwekhuule noho owakhamulakaye naboola mbu, ‘Omwami wanje! Omuruchi wanje!’ Tawe.

¹⁹Alayabilwa singa epunda eyabilwanga, nakhweswa okhufuubwa esioba webilibwa bia Yerusalemu.”

²⁰Abandu ba Yerusalemu, tsie Lebanoni ma mukhupe liyoka, tsie musibala sia Bashani ma mulakaye, mulangisie nimuli khusikulu sia Moabu, sichila abalina benywe bamuluywe.

²¹OMWAMI yali khul'loma n'nenywe olwa mwali nemiandu, nebutswa mwasuula okhuhul'la akaboolanga. Yaka niko akamwakhola mubulamu bwenywe bwosi; simwali abanyala okhulonda amalako ko MWAMI tawe.

²²Abemeli benywe nabafubwe ehale nende omuyeka, abakhonyani benywe nababukul'lwe mwihe okhuba abasumba, litookho lienywe lilaba netsisoni khandi lilasimbibwa omurwe khulwe tsimbi tsiosi etsia mwakhola.

²³Muhuluukhanga mumulembe mutsinyumba tsiombokhwa nemisiita okhurula Lebanoni; nebutswa namube nesibeela olwa okhutsunwa nakhumwitsile, okhufwana okhwomukhasi oli neinumwa.

²⁴OMWAMI yabool'la omuruchi Yehoyakini omusiani wa Yehoyakimu wa Yuda mbu, “Singa tooto ndi Nyasaye oli mwoyo, ne kata nawe olaba noli ingaka yoburuchi khumukhono kwanje omulunji,

²⁵ndakhakhuhinisie ma khure mumakhono kabandu abawaria, abandu abenyanga okhukhwiira. Ndakhakhuhan'ne mumakhono komuruchi Nebukadinesa wa Babulonia nokhubasikari baabe.

²⁶Ise nzia okhuhakia ibe nende mama uwo okhuhilwa mubuhambe. Namutsie musibala esia muraibul'lwamwo tawe, ne mwembi mulifwila musibala isio.

²⁷Muliekomba okhulola esibala sino khandi, nebutswa simwakhakalukhemwo khandi tawe.”

²⁸Nase nireeba mbu, “Omuruchi Yehoyakini akhali singa isongo eyatikha ma eyafuubwa esioba ma sialiho ochienyanga tawe noho? Yako niko akachila ye halala nabaana baabe nibahilwa mubuhambe musibala siabaramanyilekhwo esindu siosi tawe?”

²⁹E, esibala, esibala, esibala! Hulila khuko MWAMI abooye kano:

³⁰“Omundu uyu wakhalachilwa okhukosia abaana baabe, okhuba omundu oranyala khunyoola amalahi. Sialibakhwo nende abetsukhulu abakhamihe musibala sia Yuda, singa abokhukalukha musilenje sia Daudi tawe. Ise, OMWAMI, mal'le okhuboola.”