Read lunyore YEREMIA 23 Bible Online

YEREMIA 23 - lunyore bible

YEREMIA 23

¹Wowe khubaruchi yabo abali singa abaayi abakhuyanga nende okhusalania abandu banje abali singa amakondi!

²Kano niko ako MWAMI, Nyasaye wa Isiraeli aboolanga khu kabaruchi abakhoyele okhulinda abandu baabe: “Inywe simwalinda abandu banje tawe; mwabasalania khandi mwabakhunga okhutsia ehale. Kho luno nzia okhumuhelesia esinyasio khumabi kamukhol'le.

³Nzia okhubunjelesia abandu banje okhurula mubibala ebia ndali okhubasalanisia, ma mbakalusie musibala siabwe. Nabanyoole abaana abenji ma nabametekhe okhuba abenji.

⁴Ndakhahule abaruchi khulwo khubaruka. Abandu banje sibakhabekhwo noburi khandi nohomba kata okhurisibwakhwo tawe. Khandi sinambahekhwo esinyasio tawe. Ise OMWAMI mal'le okhuboola.”

⁵OMWAMI yaboola mbu, “Inyinga yitsanga olwa nanzahule omuruchi oli omulunji okhurula mubolwibulo lwa Daudi, Omuruchi uyo naruke nobuchesi ma nakhole akali amalahi nende akahabwene musibala siosi.

⁶Olwa nabe omuruchi, abandu ba Yuda nababe mumulembe, ma abandu ba Isiraeli nabamenye mumulembe. Omuruchi uyo nalangwe, ‘OMWAMI Omuhonia Wefwe.’ ”

⁷OMWAMI yaboola mbu, “Inyinga yitsanga olwabandu barakhesuye khu ise singa Nyasaye oli mwoyo owali okhuhiinia abandu ba Isiraeli okhurula musibala sie Misiri tawe.

⁸Musilenje isio bakhesuhe khu ise singa Nyasaye oli mwoyo owali khuhinia abandu ba Isiraeli okhurula musibala esili esinyolu nende okhurula mubibala bindi ebiandali nindabasalaniamwo. Nilwo olwa bakhamenye musibala siabwe abene.”

⁹Omwoyo kwanje kutubuywe, ma ise ndekelanga. Khulwa OMWAMI, Khandi khulwa amang'ana kaake amatsienukhu, ise fwana omundu okhol'lwe namalwa, omundu onyweye ewaini inyinji.

¹⁰Esibala siayitsulamwo abandu barali abasubilwa khu MWAMI, bamenya obulamu obusiamu ma barumikhilanga obunyali bwabwe munjila imbi. Khulwe silaamo sio MWAMI esibala siayoma, ne obulimo mubwayilo bwaniala.

¹¹OMWAMI yaboola mbu, “Abaroobi nende abesaalisi nabanasibala. Ndabanyoola nibakholanga tsimbi mu Hekalu mwene.

¹²Tsinjila tsiabalondangakhwo tsiakhabe tsirelele khandi etsiesiilima; ndakhabakhole okhwesikar'ra nende okhukwa. Nzia okhubaleer'ra linyakhano; inyinga yokhubaler'ra linyakhano yitsanga. Ise, OMWAMI mal'le okhuboola.

¹³Mal'le okhulola tsimbi tsiabaroobi ba Samaria: bal'lomanga nibarumikhilanga eliira lia Baali, ma bayemel'la abandu banje mutsinjila tsiobusiamu.

¹⁴Nebutswa ndaluutsi abaroobi bomu Yerusalemu nibakholanga amabi okhuyomba yaka; baheyanga khandi baboolanga obubehi; bakhonyel'langa abandu okhukhola amabi, kho abandu batsilil'langa okhukhola amabi. Khulwanje bosi nababi singa abandu ba Sodoma na Komora.

¹⁵“Khulwe yako, ise, OMWAMI Nyasaye, Wokhunyala Biosi nzia okhuboola kano khubaroobi ba Yerusalemu: Nzia okhubahelesia amatanya amalulu okhulia nende esumu okhunywa. Sichila balandia akarali aka nyasaye musibala siosi.”

¹⁶OMWAMI Nyasaye Wokhunyala Biosi yabool'la abandu ba Yerusalemu mbu, “Murahuyia khukabaroobi baboolanga tawe; bamuretsangamwo amang'ana akalibula okhwekholekha tawe. Bamubool'langa amang'ana kamapaalo kabwe, ne sibamubool'langa amang'ana ake ise mbooye tawe.

¹⁷Khubandu abasulanga okhuhul'la ake ise mboolanga, batsilil'langa okhuboola mbu kosi nakabe amalahi khubo. Ma babool'la buli mundu wekala amarwi mbu ling'ana liibi siliakhekholekhe khuye tawe.”

¹⁸Nase nimboola mbu, “Abulaho kata mulala khubaroobi yaba owamanya amabiso ko MWAMI apaalanga tawe. Abulaho kata mulala khubo owahul'la nohomba owamanyilisia amang'ana ko MWAMI nohomba owateema okhuhuyia nohomba owabukula obukono mu kamboolanga tawe.

¹⁹Lirima lilie neimbumbuyeka yesihutsutsu esikali esiakhahutse khumirwe chiabandu ababi,

²⁰ne sikakhahwe okhwola olwa yakhabe nakhol'le kosi aka ye anaayanga okhukhola tawe. Mumatukhu ketsanga abandu baabe bakhamanyilisie akene yaka bulahi.”

²¹OMWAMI naboola mbu, “Sindali okhuruma abaroobi yaba tawe, nebutswa kata mbwo bali okhutsia. Sindali khubabool'la akababoola tawe, nebutswa batsilil'la okhul'loma nibarumikhilanga eliira lianje.

²²Balaba nibamanya amabiso komumapaalo kanje khane balandia amang'ana kanje khubandu banje, ne yako kakhabakhol'le okhulekha okhumenya obulamu obusiamu nende okhukhola ebindu ebibi biabakholanga.

²³“Ise ndi Nyasaye oli habundu hosi, tawe oli habundu halala honyene.

²⁴Abulaho onyala okhwebisa aharanyala okhumulola tawe. Mwamanyakhwo mbu ndi habundu hosi mwikulu nende khusibala?

²⁵Ise ndamanya akabaroobi yabo baboola. Bal'lomanga akobubehi nibarumikhilanga eliira lianje khandi nibaboola mbu Ise ndabahelesia amang'ana kokhuboola mumalooro.

²⁶Abaroobi yaba balatsilil'la okhukosia abandu banje nende obubehi bwa bakulukunzanga okhwola lina?

²⁷Bapaalanga mbu amalooro kababoolanga kakhachila abandu banje banzibil'le singa obwa basamwana bali okhunzibil'la ma nibachaaka okhulonda Baali.

²⁸Omuroobi wosi oloorele amalooro aboole mbu yako namalooro, nebutswa omuroobi omal'le khuhul'la amang'ana kanje, alandie amang'ana yako munjila yobusubilwa. Omukhuutsi kwakhaba omulahi okhuyomba ingano yene noho?

²⁹Ling'ana lianje lifwana omul'lo khandi singa inyundo eyarakanga amachina mubitonye.

³⁰Ise ndasuula abaroobi babukulanga amang'ana kabandu bandi nibakalandia singa amang'ana akarulanga khu ise.

³¹Khandi ise ndasula abaroobi abal'lomanga amang'ana kabwe abene ma baboola amang'ana yako karulanga khu ise.

³²Hulile ake ise, OMWAMI mboolanga! Ise ndasuula abaroobi ababool'langa abandu amalooro kabwe aketsulamwo obubehi. Baboolanga akamalooro yaka ma bahengia abandu banje munjila erali eyahabwene khulwo bubehi nende omwekhonyo kwabwe. Ise sindabaruma kata sindabalakakhwo okhutsia tawe. Kho sibalikhwo nobukhonyi bwosi khubandu tawe. Ise OMWAMI mal'le khuboola.”

³³OMWAMI yambool'la mbu, “Yeremia, mulala khubandu banje, nohomba omuroobi kata omwesaalisi niyakhakhureeba mbu, ‘Amang'ana ko MWAMI kaboolanga sina?’ Ibe omubool'le mbu, ‘Ibe oli omusiko khu MWAMI, ne OMWAMI yetsa okhukhufuuba.’

³⁴Ne mulala khubandu banje nohomba omuroobi kata omwesaalisi niyakharumikhila amang'ana kano mbu, ‘Omusiko kwo MWAMI’, ndakhamuhelesia linyakhano halala nabeinyumba yiye.

³⁵Musilenje yisio, buli mundu areebe abalina baabe nende abekho baabe mbu, ‘Nikalusio sina elio MWAMI ahan'ne? OMWAMI abooyekhwo sina?’

³⁶Kho barakharumikhilakhwo amang'ana mbu, ‘Omusiko kwo MWAMI,’ tawe sichila omundu wosi niyakharumikhila amang'ana yako ndakhakhola amang'ana kanje okhuba omusiko khuye. Abandu barumikhila amang'ana ka Nyasaye wabwe munjila imbi, Nyasaye oli mwoyo, OMWAMI Wokhunyala Biosi.

³⁷Yeremia, reeba abaroobi mbu, ‘Nikalusio sina elio MWAMI amuheye? OMWAMI abooyekhwo sina?’

³⁸Nibakhabula okhulonda lilako lianje ma nibarumikhila amang'ana kano mbu, ‘Omusiko kwo MWAMI.’ Kho obabool'le mbu,

³⁹akatooto kali mbu nambabukule ma nambafuube ehale, bo nende litookho eliandahaana khubo nende khubakuka babwe.

⁴⁰Nambaler're tsisoni tsieinziayo nende es'simba murwe sieinziayo esirakhebil'lwekhwo tawe.”