Read lunyore YEREMIA 24 Bible Online

YEREMIA 24 - lunyore bible

YEREMIA 24

¹OMWAMI yaamanyia tsindubi tsibili etsilimwo amakhuyu nitsirenjekhele imbeli we Hekalu. (Yaka kekholekha inyuma womuruchi Nebukadinesa wa Babulonia namal'le okhufumila Yehoyakini omusiani wa Yehoyakimu omuruchi wa Yuda singa omuhambe okhurula Yerusalemu okhutsia Babulonia halala nabemeli ba Yuda, nababaatsi nende abasitsa bokhukhola emilimo.)

²Indubi yokhuranga yalimwo amakhuyu amalahi, akali nikarangile okhwenga; ne indubi yindi yalimwo amakhuyu kabola, akali amabi okhusila akarakhalibwa tawe.

³Ma OMWAMI niyambool'la mbu, “Yeremia, nisina esiololanga.” Nase ningalusia mbu, “Ndolanga amakhuyu. Amakhuyu amalahi, namalahi okhusila, yako akali amabi namabi okhusila, akaranyala okhulibwa tawe.”

⁴Kho OMWAMI niyambool'la mbu,

⁵Ise OMWAMI, “Nyasaye wa Isiraeli, ndolanga mbu abandu abahilwa Babulonia bafwana amakhuyu amalahi yaka, ne nzia okhubakhol'la amalahi.

⁶Nzia okhubalinda ma mbakalusie musibala yisi khandi. Nambombokhe, ne sinambasambule tawe. Nambasimikhe ne sinambakhunyule tawe.

⁷Nambakhole okhumanyilisia mbu Ise nise OMWAMI. Ma bakhabe abandu banje, nase ndakhabe Nyasaye wabwe, sichila nababe nibakalukhile khu Ise nomwoyo kwabwe kwosi.

⁸“Ne khukomuruchi Sedekia wa Yuda, nende khubakhulundu baabe halala nende abandu bandi bosi aba Yerusalemu abasikala musibala muno nohomba abatsia Emisiri. Ise, OMWAMI, nambakhol'le bosi obubi singa amakhuyu yaka akali amabi okhusila akarakhalibwa tawe.

⁹Nambaler're likhupako likali eliakhachenyie abetsimbia bosi. Abandu bakhabatsekhel'le, nende okhubakhol'lakhwo esihenyehenye nokhubakhola ebihingwa nende okhurumikhila eliira liabwe habundu hosi handabasalania singa esilaamo.

¹⁰Ndakhaleere khubo lihe, inzala nende obulwaye okhwola olwa bosi bakhafwile musibala siandabahelesia bo nende abakuka babwe.”