Read lunyore YEREMIA 25 Bible Online

YEREMIA 25 - lunyore bible

YEREMIA 25

¹Mumuhika kwakhane okwa Yehoyakimu omusiani wa Yosia yali omuruchi wa Yuda, ndanyoola amang'ana okhurula khu MWAMI nikal'lomanga khubandu ba Yuda bosi. Yikwo kwali omuhika kwokhuranga okwa Nebukadinesa yali nali omuruchi wa Babulonia.

²Ndabool'la abandu bosi ba Yuda nende Yerusalemu mbu,

³“Khulwemihika amakhumi kabili nachitaru, okhuchiaka omuhika kwelikhumi nakhataru okwa Yosia omusiani wa Amoni yali nali omuruchi wa Yuda, okhwola litukhu lino, OMWAMI yal'lomanga n'nase, ne simbulanga okhumubool'la ako MWAMI yambool'langa tawe. Nebutswa inywe simwabukula muko obukono tawe.

⁴Simwali abanyala okhukahul'la nohomba okhubukulamwo obukono tawe, kata nikali mbu OMWAMI yatsilil'la okhumurumila abarumikhili baabe abali abaroobi.

⁵Bali okhumubool'la murule mutsinjila tsimbi tsiobulamu bwenywe nende ebindi ebibibi ebiamukholanga, kho mube abanyala okhutsilil'la okhumenya musibala sio MWAMI yamuhelesia halala nabakuka benywe okhumenyamwo singa obulaame bwenywe.

⁶Bali okhumubool'la mulekhe okhwekayakaya nende okhurumikhila abanyasaye bandi, khandi muramukhola OMWAMI okhuba noburima khulwo khwekayakaya ebiniini biamwalomba tawe. Mulaba nimwalonda amalako ko MWAMI, khane OMWAMI siyamuhelesia esinyasio tawe.

⁷Nebutswa OMWAMI mwene aboolanga mwali okhusuula okhulonda amalako kaake. Musilenje yisio mwamukhola okhuba nelirima khulwe ebiniini bienywe ma mweler'ra esinyasio sisie khu inywe abene.

⁸“Khulwe yako, sichila simwali okhulonda amalako kaake, OMWAMI Wokhunyala Biosi aboolanga mbu,

⁹‘Nzitsanga okhurumania abandu bosi okhurula esinyolu, nende omurumikhili wanje, omuruchi Nebukadinesa wa Babulonia betse. Nzia okhubaleera okhulwana esibala sia Yuda nende abemenyamwo nende okhulwana nabetsimbia abalondokhan'ne n'nabo. Nzia okhumulula lihanga yili halala nabarende balio, ma ndekhe nilisasikhile khulwe inziayo, ma lilolekhe liibi okhusila khandi eliokhuchenyia mutsimoni tsiabandu. Ise OMWAMI mal'le okhuboola.

¹⁰Nzia okhwikala liyoka liabwe liobusangali nende obuyanzi nende amayoosi kobusangali bwamasabo kabwe kebisel'lo. Sinababe namafura akokhura mutsitaya tsiabwe tawe, khandi sinababekhwo nende obuswache tawe.

¹¹Esibala yisi siosi nasilekhwe nisiasasibwa ne siakhabe esiokhuchenyia khubasilolanga ne amahanga kali oburende n'nasio kakharumikhile omuruchi wa Babulonia khulwemihika amakhumi kane nakataru.

¹²Inyuma we yako ndakhahaane esinyasio khu Babulonia nomuruchi wasio, khulwe tsimbi tsiabwe. Ndakhamume esibala yisio ma ndasilekhe nisiasasikha khulwe inziayo.

¹³Nambelesie Babulonia esinyasio halala nende amakhupako akandali okhuboola ndakhaleere khumahanga olwa ndal'lomela mu Yeremia — amakhupako kosi akahandikwa musitapu yisi.

¹⁴Narunge es'sialia khubandu ba Babulonia khu kosi akabakhola, ma amahanga amenji nende abaruchi abakhongo bakhabakhole abasumba.’ ”

¹⁵OMWAMI, Nyasaye wa Isiraeli yambool'la mbu, “Sino nesikombe siewaini esitsusibwemwo lirima lianje. Bukula ohil'le amahanga kosi akanzia okhukhurumakhwo ma akabool'le kanywele musikombe siene yisi.

¹⁶Olwa betsa okhunywela musio, betsa okhuchenda nibakwil'lana ma bakorwe esiabakholanga khulwe lihe elianzia okhubarumila.”

¹⁷Kho ndamala nimbukula esikombe okhurula mumakhono ko MWAMI ma nimbelesia amahanga kosi ako MWAMI yali niyarumile khuko, ma nimbahelesia esikombe okhunywelamwo lirima lio MWAMI.

¹⁸Yerusalemu nende amataala kosi kesibala sia Yuda, halala nende abaruchi besibala yisio nende abemeli basio bahebwa esikombe yisio okhunywelamwo kho babe abanyala okhukwa esitsiimi, habundu habi khandi ahokhuchenyia, kho abandu babe abanyala okhurumikhila eliira liabwe singa esilaamo; singa balirumikhilanga luno.

¹⁹Kano niko amera ketsimbia tsindi etsianywela musikombe yisio: Omuruchi we Misiri halala nabakhulundu baabe nende abemeli, halala nabandu baabe bosi;

²⁰nende abarende bosi abamenya Emisiri; abaruchi bosi besibala sia Usi; abaruchi bosi bamataala ka Filisiti, (nako ni Ashikeloni, Gasa, Ekironi nende esitonye siabandu abasikala mu Ashitoti);

²¹abandu bosi ba Edomu, Moabu nende Amoni;

²²abaruchi bosi ba, Tiro nende Sidoni; abaruchi bosi bebibala bili ahembi khu Nyanza ya Mediterenia;

²³amataala ka Dedani, Tema nende Busi; nende bosi abali mubibala biehale; abandu bosi ababekanga liswi liabwe;

²⁴abaruchi bosi be Buharabu, abaruchi bosi betsinzibulo etsiamenya musitsiimi;

²⁵abaruchi bosi ba Simuri, Elamu nende Media;

²⁶abaruchi bosi bebibala bie esinyolu, abali ahembi nende ehale, buli siamulala nalondanga oundi; nende amahanga kosi akali khusibala. Ne owokhumal'likha khubosi nomuruchi wa Babulonia owanonywele musikombe yisio.

²⁷Ma OMWAMI niyambool'la mbu, “Bool'la abandu mbu Ise, OMWAMI Wokhunyala Biosi, Nyasaye wa Isiraeli mbalakanga mbu banywe okhwola olwa bameela ma bachiake okhusala, okhwola olwa bakwa hasi ma baramwe okhusinjila khulwe lihe lianderanga khubo.

²⁸Ne nibasuula okhubukula esikombe okhurula m'mukhono kukwo khulwo khunywelamwo, khe obabool'le mbu OMWAMI Wokhunyala Biosi abooye mbu okhwola nabanywele musikombe yisio.

²⁹Nanjiachile emilimo chianje chiokhubakhuya okhurula mwitaala mwanje mwene. En'no bapaalanga sinabanyoole esinyasio tawe? Tawe, nabanyoole esinyasio sichila narume lihe khubandu bosi abomusibala. Ise, OMWAMI Wokhunyala Biosi mal'le khuboola.

³⁰“Ibe, Yeremia okhwola okambe kosi akandakhubool'la. Okhwola abool'le abandu yaba mbu, ‘OMWAMI nahoole okhurula mwikulu, khandi nahukume okhurula hekulu mwikulu. Nahool'le abandu baabe; nakhupe liyoka singa omundu osenanga emisabibu. Buli mundu khusibala namuhulile,

³¹ne amayoosi nakahul'likhe okhwola khundulo khwesibala. OMWAMI ali nomuse khubetsimbia. Yakhaleere abandu bosi okhuyalwa ne ababi bakherwe. OMWAMI umal'le okhuboola.’ ”

³²OMWAMI Wokhunyala Biosi yaboola mbu likhupako litsanga okhurula khwihanga elala nilitsia khulindi, ne imbumbuyeka ingali nechiakile ehale khundulo wesibala.

³³Litukhu yilio emilambo chie yabo abo MWAMI nabe niyeer're nachikone hasi nichisalan'ne okhurula elubeka l'lala lwesibala okhwola elubeka lundi. Abulaho owakhekhuule emilambo yichio khandi sichiakhayabilwe tawe. Chiakhabe hasi singa esifuumi sieimbolela.

³⁴Lakaye, inywe abemeli, inywe abaayi babandu banje, lakaye butinyu nomwoyo omukali! Mwekhuule nende okhukalakala mulukuukhi. Inyinga yakhoola eye inywe okhusinzwa, ne mwitsa khusinzwa singa amamiiku.

³⁵Injila sinebekhwoho eya munyala okhuhonokokhelamwo tawe.

³⁶Hulile okhulakaya khwabayi nende etsikhwisi tsiabemeli bebiayo sichila OMWAMI yahononisio obwayilo.

³⁷Ebikuuri biomulembe bilononibwa khulwoburima obukali obwo MWAMI ali n'nabwo.

³⁸OMWAMI umal'le khwebala abandu baabe singa esimba elekhanga olwanga lwayo. Okhuria okhukali khwo mwihe nende lirima likali lio MWAMI bichil'le esibala siikwiye esitsiimi.