Read lunyore YEREMIA 26 Bible Online

YEREMIA 26 - lunyore bible

YEREMIA 26

¹Inyuma wamatukhu matiti aka Yehoyakimu omusiani wa Yosia yali niyakhaba omuruchi wa Yuda,

²OMWAMI yambool'la mbu, “Osinjile m'mukitsi kwe Hekalu ma okambe kosi akandakhulaka okhubabool'la abandubo, abetsa khwitsa okhurula mumataala ka Yuda khulwo khwekayakayilaho. Orakhalekhakhwo ling'ana liosi tawe.

³Haundi abandu betsa khuhul'la ma balekhe okhulonda ake ifwo yabwe imbibibi. Nibakhekalukhania, kho ise ndakhakalukhania inganakani yanje yokhubamuma khulwo bubi bwabwe bwa bakholanga.”

⁴OMWAMI yambool'la kano okhubool'la abandu mbu, “Ise, OMWAMI ndamubool'la mbu okhwola mube abahulili khu ise khulwo okhulonda amebaalo kandamuhelesia,

⁵khandi khulwo khulonda amang'ana kabarumikhili banje abaroobi, abamurumilanga buli khase. Inywe simwakhola akabamubool'la tawe.

⁶Nimutsitsakil'la okhuba abesikala marwi kho nakhole khu Hekalu yiyi akandakhola khu Shilo, ma abetsimbia tsiosi tsiemusibala nabarumikhile eliiralie litookho yili singa esilaamo.”

⁷Abesaalisi, abaroobi, nende abandu bosi bahul'la nimboolanga amang'ana yaka mu Hekalu,

⁸ne olwa ndali nindakhamala okhuboola kosi ako MWAMI yandaka okhuboola, bandiila ma nibahanzukha nibaboola mbu, “Okhoyele wirwe khulwa akene yaka!

⁹Busina norumikhila eliira lio MWAMI okhuboola mbu Ehekalu ino nefwane singa Shilo khandi litookho yili nalikhuywe ne abulakhwoho owanomenyemwo tawe?” Ma abandu nibaafumbila.

¹⁰Olwa abemeli ba Yuda bahul'la akali nikekholekhele, bayuchila okhurula hango homuruchi nibatsia khu Hekalu ne nibasinjila Hasilibwa Esiyia.

¹¹Ma abesaalisi nende abaroobi nibabool'la abemeli nende abandu mbu, “Omundu uyu akhoyele okhukhalachilwa okhufwa sichila ul'lomele obubi khwitookho liefwe. Inywe muhuliye nende amarwi kenywe!”

¹²Ma nase nimboola mbu, “OMWAMI yaarumile okhuboola amang'ana yaka kosi akamuhuliye nimboolanga khumabi ketsa khwekholekha khu Hekalu yiyi nende litookho yili.

¹³Okhwola mwekalukhanie okhurula munjila ya mumenyelangamwo nende ebindu biamukholanga khandi okhwola mube abahulili khu MWAMI Nyasaye wenywe. Nimwakhekalukhania, OMWAMI yetsa khukalukhania inganakani yiiye yokhumukhuya eya yaali nabooye naleere khwinywe.

¹⁴Nebutswa ise, ndi mubunyali bwenywe! Mukhole khu ise akamupaalanga nakahabwene khandi namalunji.

¹⁵Nebutswa mumanye mbu nimwakhanzira, inywe nende abandu belitookho lino, muli nesikha siokhwira omundu orali nesikha tawe sichila OMWAMI niye ourumile okhumubool'la lichetsiyio yili.”

¹⁶Ma abemeli nende abandu nibabool'la abesaalisi nende abaroobi mbu, “Omundu uyu al'lomele khu ifwe muliira lio MWAMI Nyasaye wefwe; siakhoyele okhwirwa tawe.”

¹⁷Inyuma we yako, balala khubemeli basinjila ma nibabool'la omukanda kwabandu abali nibebunjikhile mbu,

¹⁸“Olwa Hesekia yali nali omuruchi wa Yuda, omuroobi Mika wa Moreshetsi yabool'la abandu mbu OMWAMI Wokhunyala Biosi yali khuboola mbu, ‘Sayuni nelimwe singa omukunda, Yerusalemu nayitsulemwo esifuumi siebindu ebiononibwa, ne esikulu sie Hekalu nasikwe omutsuru.’

¹⁹Omuruchi Hesekia nende abandu ba Yuda sibayira Mika tawe. Musilenje yisio Hesekia yahelesia OMWAMI oluyali khandi namureeba mbu amubeele. Ma OMWAMI nakalukhania inganakani ya yali napaal'le eyokhuleera linyakhano khubo. Luno khuli ahembi okhweler'ra linyakhano liibi okhusila.”

²⁰Yaliho omundu undi owalangwa mbu, Uria omusiani wa Shemaya okhurula Kiriatsi Yearimu owarumikhila eliira lio MWAMI okhuboola amabi khwitookho yili nende lihanga yili singa obwa Yeremia yal'loma.

²¹Olwomuruchi Yehoyakimu halala nabasikari baabe nende abemeli bahul'la aka Uria yali nabooye, omuruchi yenya mbu Uria yerwe. Nebutswa Uria yakahul'la, ma niyelukha khulwoburi obukali ma natsia Emisiri.

²²Omuruchi Yehoyakimu yaruma Elinatsani omusiani wa Akibori nende abandu bandi okhutsia Emisiri khulwokhuleera Uria.

²³Bamukalusia khumuruchi Yehoyakimu owamala nalaka yerwe, ma omubili kukwe kufuubwe habundu habandu bosi bayabilwanga.

²⁴Nebutswa sichila ise ndali ningobokhelwanga nende Ahikamu omusiani wa Shafani, sindamala rebwe mumakhono kabandu khulwo okhwirwa tawe.