Read lunyore YEREMIA 27 Bible Online

YEREMIA 27 - lunyore bible

YEREMIA 27

¹Mumatukhu kokhuranga olwa Sedekia omusiani wa Yosia yali nali Omuruchi wa Yuda, OMWAMI yambool'la

²ndelombele likokolo omwene okhurula khumikoye chieliseelo nende olubao lwokhurebwa khumabeka ma ndebiikhe.

³Ma OMWAMI niyambool'la rume amang'ana khubaruchi ba Edomu, Moabu, Amoni, Tiro nende Sidoni okhubir'ra khubarume babwe abali nibetsele Yerusalemu okhulola omuruchi Sedekia.

⁴OMWAMI Wokhunyala Biosi, Nyasaye wa Isiraeli yambool'la mbalake babool'le abaruchi babwe mbu OMWAMI aboola mbu:

⁵“Khulwo bunyali bwanje obukali nende tsingufu tsianje ndalomba esibala, nabandu halala netsinyama tsimenyele khusibala; ne nyala khusihelesia omundu wosi owamba ninzel'le.

⁶Nise omwene oreye tsimbia yitsi mumakhono komurumikhili wanje, Nebukadinesa wa Babulonia ma kata nombele tsinyama tsiomumutsuru okhumurumikhila.

⁷Tsimbia tsiosi natsimurumikhile, khandi tsiakharumikhile omusiani uwe halala nomwitsukhulu uwe okhwola olwe inyinga eliola eyelihanga lilie liakhakwe. Olwene yilwo lihanga lilie liakhurumikhile amang'ana kandi aketsingufu nende abaruchi abakhongo.

⁸“Nebutswa ndwakhabaho oluyia nohomba lihanga liosi eliakhasuula okhuba hasi hoburuchi bubwe, kho ndakhahaana esinyasio khwihanga yilio khulwo khulilerela lihe, inzala nende obulwaye okhwola olwa ndekha Nebukadinesa okhulimulula kupu.

⁹Murahuyia akabaroobi benywe tawe nohomba khumundu wosi oboolanga anyala khurooba aketsanga munjila yamalooro nohomba khulwo khulanga emioyo chiabandu bafwa, nohomba khulwe injila yobufumu tawe. Bosi bamubool'langa murahuchil'la okhurukwa nende omuruchi wa Babulonia tawe.

¹⁰Bomukaatanga ma nabachile namuhilwe ehale okhurula musibala sienywe. Ise namwilusie okhutsia ehale nenywe namumumwe.

¹¹Ne lihanga liosi ndiakhahuchil'la okhurukwa nende omuruchi wa Babulonia ma limurumikhile, kho nzia okhulekha libe musibala siabwe khulwo khurakamwo ebiraakwa nende okhumenyamwo. Ise, OMWAMI mal'le okhuboola.”

¹²Ndaboola amang'ana amatelwa yako khumuruchi Sedekia wa Yuda mbu, “Huchil'la okhurukwa nomuruchi wa Babulonia. Omurumikhile halala nabandu baabe, ne olatsilil'la okhuba mwoyo.

¹³Esichila ibe nende abandu baabo mufwile mwihe nohomba mufwe khulwe inzala nohomba obulwaye bubere nisina? Yako niko ako MWAMI yaboola nakekholekhe khwihanga liosi elirahuchil'lwa okhurukwa nomuruchi wa Babulonia.

¹⁴Muralonda akabaroobi abamubool'langa mulekhe okhuhuchil'la okhurukwa n'naye tawe. Yabo bomukaatanga.

¹⁵OMWAMI mwene aboolanga mbu siyabaruma tawe, khulwe yako bamubool'langa obubehi nibarumikhilanga eliira lilie. Khulwe yako namukhunge ma namwirwe, inywe halala nabaroobi abamubool'langa obubeyi.”

¹⁶Kho ndamala nimbool'la abesaalisi nende abandu mbu OMWAMI yaboola mbu, “Murahuyia khukabaroobi ababoolanga mbu libiikhilo lie Hekalu nalikalusibwe bwangu okhurula Babulonia tawe. Bomukaatanga.

¹⁷Murahuyia khukababoolanga tawe! Muhuchil'le okhurukwa nomuruchi wa Babulonia ne mulaba mwoyo! Esichila litookho lino libe esifuumi siebindu biononibwa nisina?

¹⁸Nibali abaroobi batooto khandi nikali bali nende amang'ana kanje, lekha bareebe ise, OMWAMI Wokhunyala Biosi rahuchil'la okhulekha ebindu biasikala mu Hekalu nende munyumba yoburuchi okhuhilwa Babulonia tawe.”

¹⁹Kano niko ako MWAMI Wokhunyala Biosi yaboola khuketsisiilo, khukelitanji liomukasa, khukelikari nende khukebindu biosi ebiabiikhwa mu Hekalu

²⁰ebiomuruchi Nebukadinesa wa Babulonia yali okhulekha mwitookho lia Yerusalemu olwa yafumila Yehoyakini omusiani wa Yehoyakimu omuruchi wa Yuda namuhila mubuhambe Babulonia halala nabemeli ba Yuda nende Yerusalemu.

²¹“Hulile khuke ise, OMWAMI Wokhunyala Biosi, Nyasaye wa Isiraeli ndali okhuboola khukebindu ebialekhwa mu Hekalu nende hango homuruchi mu Yerusalemu:

²²Nabihilwe Babulonia ma khandi nabimenyeyo okhwola olwe ise omwene ndakhabikanakanekhwo. Ma nilwo olwa ndakhabikalusie nimbiikha habundu hano. Ise, OMWAMI mal'le okhuboola.”