Read lunyore YEREMIA 28 Bible Online

YEREMIA 28 - lunyore bible

YEREMIA 28

¹Mumatukhu kene yako mumwesi kwakharano mumuhika kwakhane okwa Sedekia yali niyamihanga, Hanania omusiani wa Asuru, omuroobi okhurula mwitaala lia Gibeoni yal'loma n'nase nindi mu Hekalu. Imbeli wabesaalisi nende abandu bosi yambool'la

²mbu, OMWAMI Wokhunyala Biosi, Nyasaye wa Isiraeli yali khuboola mbu, “Ise funakile tsingufu tsiomuruchi wa Babulonia.

³Mumihika chibili echisaanga nambe ningalusisie ebindu biosi ebiomu Hekalu ebiomuruchi Nebukadinesa yahila Babulonia.

⁴Khandi nangalusie Omuruchi wa Yuda, Yehoyakini omusiani wa Yehoyakimu, halala nabandu bosi ba Yuda abahilwa mubuhambe Babulonia. Yee, nandutuyie tsingufu tsiomuruchi wa Babulonia. Ise OMWAMI mal'le okhuboola.”

⁵Ma imbeli wabesaalisi nende abandu bosi abali nibasinjiye mu Hekalu, ndabool'la Hanania mbu,

⁶“Nakokhuchenya! Subile OMWAMI nakhole yaka! Ndi nobusubili mbu OMWAMI nabukhole oburoobi bubwo okhuba obwatooto ma naleere ebindu biosi ebie Hekalu okhurula Babulonia halala nabandu bosi abafumilwa okhuba abasumba.

⁷Nebutswa hulila akanzia okhuboola khuibe halala nabandu.

⁸Abaroobi abali okhul'loma khale, ibe n'nase nikhusili okhubaho, bali okhurooba mbu lihe inzala, nende obulwaye biakhetse khutsimbia tsinyinji nende khumahanga amakhongo.

⁹Nebutswa omuroobi oboolanga komulembe kwitsanga, anyala okhubalwa singa omuroobi owo MWAMI yaruma tooto nikali oburoobibwe buhesikhanga.”

¹⁰Ma Hanania nahinia likokolo eliali ndili khwikosi lianje, ma naliaraka mubitonye,

¹¹ma naboola imbeli wabandu mbu, “OMWAMI aboolanga nimbwo natonyanie likokolo liomuruchi Nebukadinesa yara mumakosi kabetsimbia bosi; ne nakhole yaka mumihika chibili echisaanga.” Ma nirulaho.

¹²Olunyuma lwe yaka OMWAMI yambool'la

¹³nzie okhubool'la Hanania mbu: “OMWAMI abooye mbu onyala okhufunaka likokolo liolubao, nebutswa ye nakalusieho likokolo liesibia.

¹⁴OMWAMI Wokhunyala Biosi, Nyasaye wa Isiraeli abooye nare likokolo liesibia khubetsimbia tsiosi ne nababe abarumikhili bomuruchi Nebukadinesa wa Babulonia. OMWAMI ubooye mbu kata nakhole tsinyama nabulimo okhurumikhila Nebukadinesa.”

¹⁵Ma nimbool'la Hanania yaka ma khandi nimeeta mbu, “Hulila, Hanania! OMWAMI siyali okhuruma ibe tawe nebutswa obakholanga abandu yaba okhusubila obubehi.

¹⁶Khulwe yako OMWAMI mwene aboolanga mbu yetsa okhukhwiira ibe. Omuhika kuno nikusili okhuhwa ibe nofwe sichila ubooleye abandu okhumufukula OMWAMI.”

¹⁷Ma Hanania nafwa omwesi kwakhane nakhataru omuhika ikwo.